Jeremi 41 - Gourmanchéma Bible

¹ O cileleelo Netania bijua Isimayeli, Elisama yaabili yua n den tie badibuolu yua den yegi leni o bado nikpiaga leni niba piiga ki gedi Ahikami bijua Gedalia kani Mitisipa po. Lankani bikuli den taani ki kali ki dini Mitisipa dogu nni.

² Lanwani Netania bijua Isimayeli den fii leni wan den yegi leni yaa nipiiga yeni ke bi pua ki ku Ahikami bijua Gedalia, Safani yaabili leni ki jugisiega. Bi den tieni yene ki ku Babilona bado n den dini yua li bali mi diema nni.

³ Isimayeli go den ku Juda yaaba, yaaba n den ye Gedalia kani kuli Mitisipa po leni Babilona jakoanda yaaba n den ye likani kuli.

Isimayeli ku sancenba piinii

⁴ Gedalia n den kpe, li den pundi dana lie ke oba kuli daa den pia laabaali.

⁵ Jaba piinii yaaba n den kuo bi langbiadi ki yie yaa tiadi n padi, ke bi gbani mo den jia jia den pundi Sikema, Silo leni Samali diema ki kubi bu paabu pada leni a *dugibila ki baa cuani la Li Miali Diedo diegu nni.

⁶ Netania bijua Isimayeli den ñani Mitisipa ki tuogi ba. O den cuoni ki buudi ki togidi ba. Wan den pundi bikani o den yedi ba: «Cua mani Ahikami bijua Gedalia kani.»

⁷ Ama ban den pundi u dogu siiga nni yaa yogunu, Netania bijua Isimayeli leni yaa jaba n den pugidi opo den todi ke o kodi ba ki luni ba li cakuonli nni.

⁸ Ama bi siiga den pia niba piiga yaaba n den yedi Isimayeli: Ŋan da kpa ti kelima ti pia ŋalimani ke li wuo ku muagu nni: *ŋalikama, *olije, mi kpama leni ti siadi. Lanwani o den bili ke o kan kpa ba nani bi lieba yeni.

⁹ Isimayeli n den ku yaa niba kuli, o den luni ba li cakuonli nni. Juda bado Asa den gbini laa cakuoncianli Isalele bado Bayesa n den baa o bu toabu yaa yogunu. Netania bijua Isimayeli den gbieni line leni bi tinkpiba.

¹⁰ Isimayeli den gedini yaa niba n den sieni Mitisipa po kuli ti yonbidi. Bani n tie: o bado bisiaba leni yaaba n bi sieni Mitisipa Nebusaladani badidiegu guuda yudaano n den piani Ahikami bijua Gedalia yaaba. Netania bijua Isimayeli den gedini ba ti yonbidi ki den fii ki caa Amoni yaaba diema nni.

Isimayeli kpaada baa mi faabima

¹¹ Kalea bijua Yohanana leni bi toatieba yudanba yaaba n den ye leni o den gbadi Netania bijua Isimayeli n den soani yaa tuongunda kuli.

¹² Bi den taa bi jaba kuli ki gedi ki baan baa Netania bijua Isimayeli bu toabu. Bi den ŋoadi ki nandi o yaa ñincianma n ye Gabaono kani.

¹³ Isimayeli n den cuo yaaba yaa niba ti yonbidi n den laa Kalea bijua Yohanana leni bi toatieba yudanba, bi pala den mangi.

¹⁴ Isimayeli n den caani yaa niba ti yonbidi kuli den lebidi ki taani Kalea bijua Yohanana po.

¹⁵ Ama Netania bijua Isimayeli den sani ki cia wani leni niba nii ki gedi Amoni yaaba diema nni.

¹⁶ Kalea bijua Yohanana leni bi toatieba yudanba yaaba n ye leni o den taa yaa niba n sieni, yaaba n baa pia li miali ki tie Netania bijua Isimayeli n den ñani yaaba Mitisipa siiga wan den ku Ahikami bijua Gedalia yaa yogunu. O den ñani Gabaono po, a jakoanda, bi puoba, a bila, mu moagilimu kuli ki kpenni ba.

¹⁷ Bi den fii bi cenli ki ban pundi yaa candiegu n kuu leni Betelema dogu ki yi Kimihami ki ban yuandi ki suagi Ejipiti.

¹⁸ Bi foagidi leni Babilona yaaba ban jie yaaba kelima Netania bijua Isimayeli den pua ki ku Ahikami bijua Gedalia Babilona bado n den dini yua mi diema bali.