Jeremi 40 - Gourmanchéma Bible

¹ Li Miali Diedo den maadi leni Jelemi yaa yogunu ke badidiegu guuda yudaano Nebusaladani den ñani o Lama dogu nni. O den teni ke bi gedi ki ban taa o yaa yonbi n sieni kuli yaa siiga. Jelemi den luoluo leni i kugaali Jelusalema yonbi leni Juda yonbi kuli siiga ke bi caani ba ti yonbidi Babilona po.

² Badidiegu guuda yudaano den yini Jelemi ki yedi o: «Li Miali Diedo a Tienu den tuodi ki waani a yaa fala n baa nandi u naa kaanu.

³ Li Miali Diedo teni ke wan den maadi yaala yaa maama cua. O tieni wan den yedi yaala kelima yi tieni ti*tuonbiadi, Li Miali Diedo po ki naa cengi o maama. Lani n teni wan den yedi yaala kuli nandi yi.

⁴ Moala n faabi a leni yaa kugaali n luo a nii. A yaa sua ke li dagidi apo ŋan cua Babilona po leni nni, ŋan cua, n baa yaa faami apo bonŋanla. A yaa sua ke laa dagidi ŋan cua leni nni Babilona po mo ŋan da cua. Diidi mi diema kuli bili a nintuali, gedi ŋan sua ke naani n mani ki go dagidi apo.»

⁵ Nani Jelemi n ki den tua liba yeni, Nebusaladani den goa ki yedi o: «A fidi ki guani Safani yaabili Ahikami bijua Gedalia po, Babilona bado n dini yua Juda diema dogi bali yeni po. Ŋan kali a niba siiga bi ŋan gedi ŋan sua ke naani n dagidi apo kuli.» Badidiegu guuda yudaano den puni o li bonjekaala leni bu paabu ki yuandi ki cabi o.

⁶ Jelemi den gedi Ahikami bijua Gedalia po Mitisipa po ki ban ye leni o yaa niba n den ye mi diema nni siiga.

Juda yaaba taani ki tu ñoabu leni Gedalia

⁷ Bi toatieba yudanba yaaba n den ye ku muagu nni den gbadi bani leni bi niba, ke Babilona bado den dini mi diema po li bali Ahikami bijua Gedalia ki puogi o wan yaa die bi jaba, bi puoba, a bila leni yaaba n tie luodimoana ban kaa den gedini yaaba ti yonbidi Babilona diema nni.

⁸ Laa toatieba yudanba leni bi niba den gedi ki ban laa Gedalia Mitisipa po. Bani n den tie bine: Netania bijua Isimayeli, Yohanana leni Jonatan, bani bonba lie kuli tie Kalea yaa bijaba, Tanehumeti bijua Selaya, Efayi bijaba Netofa yaaba leni Yaasania Maaka yua.

⁹ Ahikami bijua Gedalia, Safani yaabili den poli ki niani ba u ñoanianu ki yedi ba: «Da jie mani Kalide diema yaaba, tuo mani ban yaa die yi, yaa ye mani mi diema nni, yaa tuuni mani Babilona bado po yi baa sua ke yi yema mani yipo.

¹⁰ Diidi mani, n baa yaa ye Mitisipa ki yaa guu Babilona yaaba, yaaba n baa cua tikani. Yinba wani, yin ban ñani duven tiidi bonluonkaala, leni yaa bonluonkaala n pugidi, leni mi kpama ki tieni likuli yi tiadi nni. Yaa ye mani yin baa goa ki kali yaa dogi nni.»

¹¹ Yeni moko Juda yaaba, yaaba n den ye Moabi diema nni, Amoni yaaba diema nni, Edomi diema nni leni dietoama nni kuli den gbadi ke Babilona bado ŋa Juda niba yaaba n sieni po u kaanu ki den dini Ahikami bijua Gedalia, Safani yaabili li bali.

¹² Juda yaaba leni ban den yayadi ki ye naanpo kuli den goa ki cua Mitisipa dogu nni Juda diema nni, Gedalia kani. Bi den sobidi duven tiidi leni yaa tiidi n pugidi yaa bonluonkaala kelima laa binli i tiidi kuli den loni hali boncianla.

Bi ku Gedalia

¹³ Kalea bijua Yohanana leni bi toatieba yudanba kuli yaaba n den ye ku muagu nni den cua Gedalia kani Mitisipa po.

¹⁴ Bi den yedi o: «Naani a bani ke Amoni bado Baalisa soani Netania bijua Isimayeli ke wan cua ki pua ki kpa ŋa?» Ama Ahikami bijua Gedalia naa den daani ke bi maama tie moamoani.

¹⁵ Kalea bijua Yohanana den yedi Gedalia ŋasiili nni Mitisipa dogu nni: «Pa nni u sanu min gedi ki ban pua ki kpa Netania bijua Isimayeli. Oba kuli kan bandi moko. Be yaa po yo ke o baa pua ki kpa ŋa? Be yaa po yo ke Juda yaaba, yaaba n taani ki gaani ki lindi a kuli baa yadi, yaala n sieni Juda diema nni mo n bia?»

¹⁶ Ahikami bijua Gedalia den goa ki yedi Kalea bijua Yohanana: «Da tieni yeni kelima ŋan maadi yaala Isimayeli po yeni naa tie moamoani.»