Jeremi 4 - Gourmanchéma Bible

¹ Isalele, mini Li Miali Diedo n yedi a, A yaa guani, a yaa guani n kani, A yaa ñani a cagindi kuli n nintuali, A yaa cedi ti puagidi,

² A yaa poli ki yedi: «Li Miali Diedo fo!» Ke li tie moamoani, leni yantugupiengu leni mi *teginma, Lanwani i nilanbuoli baa yedi Ke bi baa li seli o yaa niinni, Bi baa diidi wane ki jigini bi yula.

³ Li Miali Diedo yedi yinba Juda leni Jelusalema yaaba po Yaa maama n tie na: «Kaagi mani u koapaanu yi yula po Yin da buli mani ku konkongu nni.

⁴ Kua mani ku koanciagu Li Miali Diedo po Lebidi mani yi pala Juda leni Jelusalema yaaba Lani n tie n pali n da be ki cuo nani mi fantama yeni, Ki cuo yaa cuoma ke bi kan fidi ki gbindi ma Kelima yi tuadibiada n gundi maama po.

⁵ Pa mani o naa laabaalo Juda diema nni Ki waani Jelusalema mo ki yedi: ‹Piebi mani li naatuntunli mi diema nni.› Kpaani mani boncianla ki yedi: ‹Taani mani tin gedi ti dopaali po!›

⁶ Baa mani yin baa sieni yaa maalima bonla Ki goa Siyono po. Sani mani! Da sedi mani! Kelima n teni ke mi yebiadima ñani nijienu po Ki kpendi leni li yuboancianli!

⁷ O yangbanlo sani ki ñani o wuonkaanu Yua bolindi i nibuoli fii ki cili li cenli. O ñani o deni Ki baa kuani mi diema nni li paboanli. A dogi baa le boni Nilo kan sieni i niinni.

⁸ Lani yaa po, yie mani li paboanli tiadi Nani ti gbanñagidi yeni. Biidi mani yi pala, yaa kaliti mani Kelima Li Miali Diedo pabiencianli kan cedi yi.»

⁹ Laa daale ke mini Li Miali Diedo yedi: «O bado leni o koanbala jigi baa cie, Bi kopadicianba pala baa biidi Li pakili baa paki bi sawalipuaba.»

¹⁰ N den yedi: «Ŋain n Diedo Li Miali Diedo! A taani ki boandi Jelusalema dogu Leni bi naa niba kuli, ki yedi ba: ‹Yi baa baa mi yanduanma! Ke bu toabu mo nan cua ki baa ñani ti miali.› »

Yibalinba ñani i kaani kuli

¹¹ Laa yogunu bi baa yedi laa niba leni Jelusalema dogu: «Mi fawatonma ñani hali mi fanpienma po Ki piebi Jelusalema dogu niba po. Laa piebi ki baa lendi mi bima ka.

¹² Laa faagu pia mi jama. Mini n yedi ke kun ña lipo ki cua Moala n baa jia leni ba ti buudi.»

¹³ Diidi wani n do tanpoli nani ti tawadi yeni. O teliti tie nani o pinpinja yeni O taami jaligi ki cie jiebaninba. Ti bia n yeni! Bi soani ti tuonli!

¹⁴ Jelusalema, ñani a pali nni mi biadima Lani n tie ŋan baa mi *faabima. Hali u laa yogunu yo ke a baa waagi Ki kubi a pali nni ti yantiabiadi?

¹⁵ Kelima laabaalibiado ñani hali Dana diema. Hali Efilayima juana po yo ke bi puuni laa laabaalo.

¹⁶ Tiadi mani i nibuoli line, Teni mani Jelusalema dogu n bandi Ke bi niba ñani li banfoagili ki cua ki baa baa yi. Bi kuudi bu toabu kuudi ki cidi Juda diema dogi.

¹⁷ Nani yaaba n guu u kuanu, Bi gaani ki lindi Jelusalema dogu Kelima laa dogu fiini npo mi yiema. Mini Li Miali Diedo n yedi yeni.

¹⁸ A tagu leni a bontienkaala N cuani apo yaali n yeni. Diidi a biadima li to wani lige Laa bonla baa nandi hali a pali.

Jelemi jigi cie leni wan nua ke fala kpendi

¹⁹ Ŋain n tugu, n tugu koani! Ŋain n tugu nni, n tugu nni! Ŋain n pali koani! N tugusoama sani, n kan fidi ki yaa ŋmini N gba li naatuntunli piebima Leni bu toabu kuudi.

²⁰ Bi puuni laabaalibiado n tu laabaalibiado Mi diema kuli jugi cain. Bi li cua ki ludi ti yenme ki jugi ti gbandiena. Bi li cua yenme ki bolini ti diena.

²¹ Hali u laa yogunu yo ke n baa yaa baa ki nua li *tuudicabili Ki go gbadi li naatuntunli piebima?

²² N niba ye leni mi yanpiima Baa bani nni. Bi tie yanluodanbe Baa pia yama. Ban li bani ki tieni yaala bebe n tie mi biadima. Ama baa bani ki tieni yaala n ŋani.

²³ N diidi ki tinga ki sua kaa pia nunga Puu ki ye ki niinni mo. N diidi tanpoli mo ki sua yenma ki go ye.

²⁴ N diidi a juana, ŋani mo bendi ki baali, A joabila kuli begibi.

²⁵ N diidi ki sua niba ki go ye Tanpoli nuani mo kuli sani.

²⁶ N diidi ki sua ke Kalimeli Kpandi ki tua fanpienma. O dogi mo taani ki tie yoala Li Miali Diedo nintuali, Kelima o pabienkandikaali po.

²⁷ Kelima Li Miali Diedo yedi mine: «Mi diema kuli baa jugi, Ama n kan bolini mi kukuli.

²⁸ Lani n teni ke mi diema ye leni li paboanli, Ke tanpoli mo biigi Kelima lani n tie min jagi yaala. N kan lebidi puu mo N kan sudi puoli mo.»

Bi nikpaba kua Siyono dogu nni

²⁹ Bi tanjagiba leni a dabantuada lanbu teni Ke u dogu nni yaaba kuli sani. Bi tiini ki kua ti fatudi nni Bi tiini ki do ti tanciandi po. U dogu kpandi dokuomu Nilo kuli ki go ye u niinni.

³⁰ Fini Jelusalema ban jugi yua, a go baa tieni be? Naani a go baa laa yaa tiadi n moani colicoli Ki go bogidi aba leni wula tiadi Ki go tieni a nuni cilo? A bobi ki ŋanbidi a yuli fanme A jaconcona fali a, Bi bua a kuuma.

³¹ N gba li dunli, nani yaa pua n gbaani Ki bua ki maa yaa dunli yeni, N gba i yanbani ñiindi nani yaa posiaga n da baa kpa maa o cicilimadi yeni, Siyono badisalo yaa nialu yo. O fuo ki jiindi O tandi o nii ki yedi: «N bonla pia mi niñima, Bi nikpaba baa pua ki kpa nni.»