Jeremi 39 - Gourmanchéma Bible

¹ Juda bado Sedesiasi bali binyiali binli, cipiiga nni, Babilona bado Nebukanesa den cua leni o toagola kuli ki baa Jelusalema.

² Sedesiasi bali piiga n binyenli binli cinaa dayiali, u dogu bilini den yagidi.

³ Lanwani Babilona bado koanbala kuli den kua ki ban kali u juogu u dogu siiga nni buliñoabu kani. Bani n tie ne: Nedigali-Saleseli bi toatieba yudaano, Samigali-Nebo, Sali-Sekimi mu moagilimu yudaano leni o koanbala yaaba n sieni.

⁴ Juda bado Sedesiasi leni bi toatieba kuli n den laa ba, bi den sani ki ñani u dogu nni ku ñiagu ki tagini o bado tikuanu sanu ki baa ña a goanlieda buliñoabu kani ki tagini Alaba sanu.

⁵ Ama Babilona yaaba, bi toatieba den ŋoadi ki deli ba ki ban nandi Sedesiasi Jeliko tialu nni. Bi den cuo ki gedini o Babilona bado Nebukanesa kani Libila dogu nni, Hamati diema nni, ki den jia leni o ti buudi.

⁶ Libila dogu nne ke Babilona bado den teni ke bi kodi o bado Sedesiasi bijaba o nunbu nni ki taani leni mi diema bulicinba kuli.

⁷ Lan yuandi o den teni ke bi fiadi Sedesiasi nuni ki teni ke bi loli o leni ti kumoandi gaali ki gedini o Babilona diema nni.

⁸ Babilona yaaba den juu o bado diegu leni bi niba diedi leni mi fantama. Bi den pua ki guli Jelusalema bilini kuli.

⁹ Yaa niba n den sieni u dogu nni, yaaba n den taa bi yula ki teni Nebusaladani, badidiegu guuda yudaano leni yaaba n ki den gedi kaanuba, den gedini ba ti yonbidi.

¹⁰ Ama u dogu nni a luodimoana wani, Nebusaladani badidiegu guuda yudaano den tuo ban yaa ye Juda diema nni. O den puni ba lan daali duven tiidi leni i kuani.

Jelemi baa mi faabima

¹¹ Babilona bado Nebukanesa den teni Nebusaladani, badidiegu guudo yaa ñoabonli n tie ne Jelemi po.

¹² «Gedi ki ban taa o ki yaa faami opo, da tieni o yaala n bia kuli, ŋan tieni opo wan yedi a maama.»

¹³ Bi guudikaaba yudaano Nebusaladani, o bado moagilimu yudaano Nebusasibani, bi yanfodanba yudaano Nedigali-Saleseli leni Babilona bado toatieba yudanba kuli,

¹⁴ den soani ke bi ñani Jelemi badidiegu luolu nni ki teni o Ahikami bijua Gedalia, Safani yaabili ke wan gedini o o yaa denpo. Yene ke Jelemi den ye bi niba siiga.

Yaa laabaalo n ye Ebedi-Meleki po

¹⁵ Li Miali Diedo den maadi leni Jelemi wan den ye li kpaadidieli nni yaa maama n tie ne:

¹⁶ «Gedi ki ban maadi leni Ebedi-Meleki Etiopi diema yua ki yedi o: Li Miali Diedo U Paaciamu Kuli Daano, Isalele Tienu yedi nanda: ‹Diidi n baa cuani u naa dogu po min maadi yaa yebiadima yeni maama ke li kan tua bi ŋamu po. Laa bonla kuli baa tieni a nunbu nni.

¹⁷ Ama laa daali n baa faabi a. Li Miali Diedo n yedi ke bi kan taa ŋa ki teni a ŋan jie yaaba nuu nni.

¹⁸ N baa teni ŋan cia ki jugisiega kan kpa ŋa. A baa ga a miali kelima a dugi npo.› Li Miali Diedo n yedi yeni.»