Jeremi 38 - Gourmanchéma Bible

¹ Matana bijua Sefatia, Pasehuli bijua Gedalia, Selemia bijua Yukali, Malikia bijua Pasehuli, den gbadi Jelemi n den maadi leni bi niba yaa maama ki tua:

² «Li Miali Diedo yedi nanda: Yua n baa sieni ki yaa ye u naa dogu nni ki jugisiega, mi koma, leni u yianbiadipuodiko n baa je o. Ama yua n ñani ki baa teni o yuli Babilona yaaba, baa yaa ye leni li miali.

³ Li Miali Diedo yedi nanda: ‹Moamoani n baa taa u naa dogu ki teni Babilona bado toagoli wan diedi li dogu.› »

⁴ O bado koanbala den yedi o bado: «Teni ban kpa o naa ja kelima o teni ke yaa toatieba n sieni u dogu nni leni bi niba kuli gbani baa wudi kelima o maama po. O ja ne ki lingi bi niba ŋamu ka, o lingi bi yebiadima yo.»

⁵ O bado Sedesiasi den yedi: «Wani nne, o ye yi nuu nni kelima baa ke n tie bado n nan kan fidi ki yie yipo liba kuli.»

⁶ Lanwani bi den taa Jelemi ki luni o o bado bijua Malikia cakuonli nni yaali n den ye badidiegu kpaadidielieli luolu nni. Bi den jiini Jelemi leni i baabi li caali yeni niinni. Ñima ki den ye lienni. Ama li ŋoabili bebe n den ye ke Jelemi den feli li niinni.

⁷ Ebedi-Meleki, Etiopi diema yua n den tuuni badidiegu, den gbadi ke bi luni Jelemi li cakuonli nni. O bado den kaa Benjamina dogu buliñoabu kani.

⁸ Ebedi-Meleki den ñani badidiegu ki maadi leni o bado ki yedi:

⁹ «O bado, n diedo, bi naa niba ki ŋanbi leni ban tieni o sawalipualo Jelemi yaala ki luni o li cakuonli nni. Mi koma baa kpa o lienni kelima u dogu nni kuli dupen naa go ye.»

¹⁰ Lanwani o bado den yedi Etiopi diema ja Ebedi-Meleki: «Ban lingi niba piitaa yin gedi ki ban ñani o sawalipualo Jelemi li cakuonli nni hali ke o daa kpe.»

¹¹ Ebedi-Meleki den taa i nipiitaadi yeni ki gedi badidiegu ki ban kua yaa dieli n den ye o bado ŋalimano dieli tiipo. Bi den baa lienni i kpacabaani leni a kpacakpela ki kpieni likuli li cakuonli nni Jelemi kani leni i baabi.

¹² Ebedi-Meleki Etiopi yua den yedi Jelemi: «Taa i naa kpacabaani leni a naa kpacakpela ki tieni likuli a boalogi nni i baabi tiipo.» Jelemi den tieni yeni.

¹³ Bi den dadi ki ñani Jelemi leni i baabi li cakuonli nni. Jelemi den ye badidiegu kpaadilieli luolu nni.

O bado Sedesiasi didi cua ki buni Jelemi

¹⁴ O bado Sedesiasi den soani ke bi yini o sawalipualo Jelemi ki teni ke o cua o kani Li Miali Diedo cubuliñoataabu kani. O bado den yedi Jelemi: «N bua ki buali a bonyenla bebe yo, da wuoni nni liba.»

¹⁵ Jelemi den goa ki yedi Sedesiasi: «Naani n yaa waani a yaala n baa tieni, a kan kpa nni? N yaa puni a tundi mo, a kan ga yi.»

¹⁶ O bado Sedesiasi den niani o sawalipualo Jelemi ŋasiili nni u ñoanianu ki poli ki yedi o: «Li Miali Diedo yua n puni ti li miali yeni fo! N kan kpa ŋa. N kan teni a yaaba n bua ki ñani a miali nuu nni.»

¹⁷ Lanwani Jelemi den yedi Sedesiasi: «Li Miali Diedo U Paaciamu Kuli Daano, Isalele Tienu yedi mine: ‹A yaa tuo ki ñani ki ban teni a yuli Babilona bado koanbala, a baa faabi a miali, mi fantama mo kan sia u naa dogu. Fini leni a diegu nni yaaba kuli baa faabi.

¹⁸ Ama a yaa ñani ki ban teni a yuli Babilona bado koanbala, n baa teni bani Babilona yaaba u naa dogu. Bi baa juu u mi fantama, a moko kan ŋmadi bi nuu nni.› »

¹⁹ O bado Sedesiasi den yedi Jelemi: «N pia i yanbani yaa Jufinba n taa bi yula ki teni Babilona yaaba po. N jie ban da ti ŋa nni bi nuu nni ban waani nni fala.»

²⁰ Jelemi den goa ki yedi o: «Bi kan ŋa ŋa bi nuu nni. A yaa cengi Li Miali Diedo n puogi nni min yedi a yaa maama yeni, a baa sua ke li ŋani apo. A baa faabi a miali.

²¹ Ama a yaa yie ke a kan ña ki ban teni a yuli mo, Li Miali Diedo n waani nni yaala n ne:

²² ‹Bi baa gedini Juda bado diegu nni puoba yaaba n sieni kuli, Babilona bado koanbala kani.› Lani bi puoba yeni baa yedi: ‹A den teni ke yaaba n maadi leni a Mi yanduanma boandi a ki diedi a. A taana feli ti moamoadi nni, Ke bikuli sani ki yadi ki ŋa ŋa.› »

²³ Bi baa gedini a puoba kuli leni a bijaba, Babilona yaaba po. Fini aba a moko kan ŋmadi bi nuu nni. Babilona bado baa cuo ŋa wani yua baa juu u dogu leni mi fantama yeni.

²⁴ Sedesiasi den yedi Jelemi: «Niloba kuli n da bandi laa maama, lani a kan kpe.

²⁵ A koanbala yaa bandi ke n maadi leni a ke bi cua ki yedi a: ‹Waani ti ŋan yedi o bado yaala leni o bado mo n yedi a yaala. Da wuoni ti liba kuli, ti kan kpa ŋa.›

²⁶ Ŋan goa ki yedi ba: ‹N cuani n miabu yo o bado kani ke wan da guani nni Jonatan diegu nni ke min da ban kpe lipo.› »

²⁷ A koanbala kuli den cua Jelemi kani ki buali o i buali. O den guani ba nani o bado n den yedi wan guani ba maama yeni. Bi den tieni dindini ki sani ki lebidi kelima laabaali naa den yadi.

²⁸ Jelemi den li baa ye badidiegu kpaadidieli luolu nni hali ban fie Jelusalema yaa daali. Diidi lan ga maama n yeni ke bi fie Jelusalema dogu.