Jeremi 36 - Gourmanchéma Bible

¹ Juda bado Yeojakimi, Josiasi bijua bali binnaali nni Li Miali Diedo den maadi leni Jelemi ki yedi:

² «Taa li tigbabikaali ki diani min maadi a yaa maama Isalele, Juda leni li nibuoli po ki cili hali min kpa maadi leni a yaa daali Josiasi yogunu ki ban pundi hali dinla.

³ Li fidi ke Juda yaaba n faami min jagi ki baa tieni ba yaa bonbiadila kuli. Lani n tie yua kuli n ŋa o tuadibiada. Yeni, n baa tieni bipo sugili bi tagili leni bi *tuonbiadi po.»

⁴ Jelemi den yini Neliya bijua Baluki ki den maadi ki teni ke o dangi li tigbabikaali nni Li Miali Diedo n den yedi wani Jelemi yaa maama kuli.

⁵ Lan yuandi Jelemi den puogi Baluki line: «N nuu ki ya, n kan fidi ki gedi Li Miali Diedo diegu po.

⁶ Fii ki gedi ki ban cogi min maadi ki teni ke a diani yaa tigbabikaali yaa niinni Li Miali Diedo maama. Cogi ma bi niba nintuali Li Miali Diedo diegu nni mi ñoalolima daali. Ŋan cogi ma Juda yaaba leni yaa dogi n gaani ki lindi ba kuli po.

⁷ Daalinba bi sugili miama baa pundi Li Miali Diedo nintuali. Bi siiga yua kuli n ŋa o tuadibiada kelima Li Miali Diedo pabienli n kandi maama po. O pali fii hali boncianla bi naa niba po.»

⁸ Neliya bijua Baluki den tieni o sawalipualo Jelemi n den puogi o yaala kuli ki cogi li tili nni Li Miali Diedo maama Li Miali Diedo diegu nni.

⁹ Josiasi bijua Yeojakimi bali binmuuli binli, ciyia niinni, bi den kpaani Li Miali Diedo nintuali ki bili li daali mi ñoalolima po Jelusalema niba leni yaa niba n ñani Juda dogi ki cua Jelusalema kuli po.

¹⁰ Baluki den cogi li tili, Li Miali Diedo diegu tugu nni Jelemi maama n den diani yaa tili nni bi niba kuli nintuali. O den ye Safani bijua Gemalia o tidianlo dieli nni, tanpoli luolu nni Li Miali Diedo diegu buliñoapanbu buliñoatuogili kani.

¹¹ Gemalia bijua Mise, Safani yaabili den gbadi Li Miali Diedo maama yaama n den ye li tili nni.

¹² O den fii ki gedi badidiegu o tidianlo dieli nni, a koanbala kuli n den ye naani, Elisama o tidianlo, Semaya bijua Delaya, Akiboli bijua Elinatani, Safani bijua Gemalia, Hanania bijua Sedesiasi leni yaa koanbala n sieni kuli.

¹³ Mise den togidi ba wan den gbadi yaa maama kuli, Baluki n den cogi yaama li tili nni bi niba nintuali yaa yogunu.

¹⁴ Lanwani a koanbala kuli den taani ki soani Baluki kani, Netania bijua Yehudi, Selemia yaabili, Kusi yaabili ke wan yedi o: «Taa ŋan cogi yaa tigbabikaali bi niba nintuali yeni ki cua ne.» Neliya bijua Baluki den taa o nuu nni li tigbabikaali ki gedi bikani.

¹⁵ Bi den yedi o: «Kali nekanba ki cogi tipo.» Baluki den cogi bipo.

¹⁶ Ban den gbadi laa maama bi den diidi biyaba leni i jawaandannuni ki yedi Baluki: «Ti baa waani o bado mi naa maama kuli.»

¹⁷ Bi den buali Baluki ki yedi: «Waani ti lan tieni maama ke o maadi ke a diani mi naa maama kuli.»

¹⁸ Baluki den goa ki yedi ba: «O den li kpaane ki maadi yaa maama n tie na ke n mo dangi leni u tidianmuanu leni u ñima.»

¹⁹ A koanbala den yedi Baluki: «Sani ki ban wuoni fini leni Jelemi. Niloba kuli n da bandi yin ban wuoni naani.»

²⁰ Lanyuandi bi den fii ki gedi badidiegu po o bado kani, ki ŋa li tili ke li bili Elisama, o tidianlo dieli nni, ki togidi o bado po yaala n den tieni kuli.

²¹ O bado den soani Yehudi ke wan ga li tigbabikaali. Yehudi den ga li Elisama o tidianlo dieli nni ki cogi li o bado leni o koanbala yaaba ye o kani kuli nintuali.

²² O bado den kaa ti wadi yogunu yaa diebili nni ke mi fantama co o nintuali. Li den tie ciyia yaa ŋmaalo nni.

²³ Yehudi yaa den cogi kaani taa bi kaani naa, o bado den yen taa o tidianlo juga ki jia wan cogi yaala li tili nni yeni ki lu mi fantama nni, hali li tigbabikaali n ban juu ki gbeni.

²⁴ O bado leni o naacenba yaaba n den gbadi laa maama kuli jawaandi naa den cuo ba, bi naa den padi bi tiadi.

²⁵ Ama Elinatani, Delaya leni Gamalia den mia mia o bado ke wan da sia li tigbabikaali, ama o naa den cengi ba.

²⁶ O bado den soani o bijua Yelameeli, leni Selaya Asilieli yaa bijua leni Selemia Abideeli bijua ke ban cuo o tidianlo Baluki leni o sawalipualo Jelemi. Ama Li Miali Diedo den wuoni ba.

²⁷ O bado den juu Jelemi n den maadi ki teni ke Baluki diani yaa tigbabikaali. Lani n pendi yo ke li yaa puoli po Li Miali Diedo den yedi Jelemi:

²⁸ «Goa ki baa tigbabikatoali. Ŋan goa ki diani yaa maama n den ye Juda bado Yeojakimi n den juu yaa tili yeni niinni kuli.»

²⁹ Ŋan fu leni Juda bado Yeojakimi ki yedi o: «Li Miali Diedo yedi nanda: Fini n sia laa tigbabikaali ki tua: Li ga lede ke a diani yaa maama n tie na? ‹Babilona bado baa cua laa pia kuli tama ki bolini yaa diema n tie na, mi niba leni mi yandi kuli.›

³⁰ Li tie lani yaa po yo ke Li Miali Diedo maadi Juda bado Yeojakimi po yaa maama n tie na: Oba kuli o buolu nni kan kali Dafidi bali gbandi po. Bi baa ña ki bili o tinkpilo niini u yienu n puli o u yensiinu, ti wadi mo n gbadi o ku ñiagu.

³¹ N baa fii ki sedi fini leni a puoliŋuanu leni a naacenba po kelima bi tagili po. N baa teni min den waani ke yaa fala n baa cua, ke baa cengi yeni n baa Jelusalema leni Juda yaaba po.»

³² Jelemi den taa tigbabikatoali ki teni Neliya bijua Baluki. O tidianlo Baluki den diani Jelemi n den maadi o yaa maama n den ye Juda bado Yeojakimi n den sia yaa tili yeni niinni kuli. Mi maama boncianla yaama n naani leni ma go den pugini.