Jeremi 35 - Gourmanchéma Bible

¹ Juda bado Josiasi bijua Yeojakimi n kaa ti gbandi po yaa yogunu Li Miali Diedo den maadi Jelemi yaa maama n tie na:

² «Gedi Lekabi yaaba kani ki maadi leni ba. Ŋan gobidi ki gedini ba Li Miali Diedo diegu diena siiga dieyenli nni ki pa ba mi daama ban ño.»

³ N den taa Yaasania, Jelemi bijua, Abatisinia yaabili, o kpiiba, o bijaba kuli leni Lekabi buolu yaaba kuli.

⁴ N den gedini ba Li Miali Diedo diegu nni, Gedalia bijua Amana U Tienu nilo ŋoadikaaba dieli nni. Laa dieli den kuu leni a koanbala dieli, ki ye Salumi bijua Maseya yua n guu li cuuli dieli yuli po.

⁵ N den sieni Lekabi buolu yaaba nintuali yaa boba n gbie leni mi daama leni mu tadiñokaamu ki yedi ba: «Ño mani mi daama!»

⁶ Ama bi den goa ki yedi: «Ti kan ño daama kelima ti yaaja Lekabi bijua Yonadabi den teni li naa ñoabonli: ‹Yinba leni yi puoliŋuani kuli kan ño daama.

⁷ Yin da maa diena Yin da buli liba kuli Yin da ŋuu duven tiidi Yin da baa piama. Yi miali yema kuli yin yaa ye a gbandiena nni. Lani n tie yin waagi ki ye Li Miali Diedo n puni yi yin kali ku cangu naankani.›

⁸ Ti ŋua ti yaaja Lekabi bijua Yonadabi n puogi ti yaala kuli, tinba, ti puoba, ti bijaba leni ti bisiaba, tii ñu daama ti miali yema nni kuli.

⁹ Tii maa diedi ki baa yaa ye lienni. Tii pia duven tiidi kuanu, tii pia kuani. Tii pia tinmu ban coagi naani.

¹⁰ Ti ye a gbandienba nni, ki ŋua ki tiendi Yonadabi ti baa n puogi ti yaala kuli.

¹¹ Nebukanesa Babilona bado n den cua ki baa mi naa diema, ti den yedi: ‹Fii mani tin gedi Jelusalema ki sani Babilona yaaba toatieba leni Sili yaaba toagoli. Li ga yene ke ti cua ki kali Jelusalema dogu nni.› »

¹² Li Miali Diedo yedi Jelemi yaa maama n tie na:

¹³ «Li Miali Diedo Isalele Tienu maadi yaa maama n tie na: Gedi ki ban yedi Juda niba leni yaa niba n kaa Jelusalema: Naani yi kan cengi n maama ki fangi yi yula? Li Miali Diedo n yedi yeni.

¹⁴ Bi kubi bi yaaja Lekabi bijua Yonadabi maama wani yua n den yedi o bijaba n da ño daama, baa ko ñuni mo hali dinla. Bi tuo bi baa maama. N mo te? N maadi ki maadi leni yi hali yaa yogu ki naa cedi, ama yi naa ga n maama.

¹⁵ N den tuuni yi kani n naacenba bi sawalipuaba u yogunu kuli ki naa cedi, ke ban yedi yi: ‹Yua kuli n pegidi ki ŋa o sanbiadu, lebidi mani yi bontienkaala, da pia mani*ŋantaado leni i *buli ki baa kpiagidi yi. Yaa ye mani yeni, min puni yi yaa diema nni yinba leni yi baanba.› Ama yi naa cengi. Yi naa diadi yi tuba ki ga n maama.

¹⁶ Lekabi bijua Yonadabi yaa bijaba, tuo ki kubi bi baa n bili bipo yaa ñoabonbilikaana. Ama bi naa niba wani naa tuo n maama!

¹⁷ Mini Li Miali Diedo U Paaciamu Kuli Daano, Isalele Tienu yedi: N den maadi leni ba, ama baa cengi. N den yini ba, baa guani npo. Lani yaa po n baa teni min den waani ke yaa fala n baa baa Jelusalema leni Juda yaaba yeni n nandi ba.»

¹⁸ Jelemi den yedi Lekabi yaaba: «Li Miali Diedo U Paaciamu Kuli Daano, Isalele Tienu yedi nanda: ‹Kelima nani yin tuo ki kubi yi baa Yonadabi maama, ki tieni wan yedi yi yaala kuli yeni,

¹⁹ lani yaa po Li Miali Diedo U Paaciamu Kuli Daano Isalele Tienu yedi ke Lekabi bijua Yonadabi, kan luo yaa puoliŋuani n baa yaa ye ne n nintuali.› Lani n tie Li Miali Diedo Isalele Tienu n yedi yaala.»