Jeremi 34 - Gourmanchéma Bible

¹ Li Miali Diedo n den maadi yaa maama Jelemi yaa yogunu, li sua ke Babilona bado Nebukanesa leni o toagola, leni wan paadi yaa diema kuli yaa niba kuli tieni bu toabu leni Jelusalema dogu leni Juda dogi kuli.

² Li Miali Diedo Isalele Tienu yedi mine: «Gedi ki ban maadi leni Sedesiasi Juda bado ki yedi o: ‹Li Miali Diedo yedi nanda: Diidi n taa u naa dogu ki ŋa u Babilona bado nuu nni. O baa juu u mi fantama.

³ Amo kan ŋmadi o nuu nni. Bi baa cuo ŋa leni u paalu ki ŋa ŋa o nuu nni. A nuni baa le Babilona bado nuni. Yi baa kadi leni yiyaba nungbaana naa. A baa gedi Babilona.›

⁴ Fini Juda bado Sedesiasi, cengi Li Miali Diedo maama! Li Miali Diedo maadi yaa maama n tie na apo: ‹Ki jugisiega ka baa kpa ŋa.

⁵ Ama a baa kpe leni mi yanduanma. Nani ban den juu tulale a baanba leni bi badikpeliba po maama yeni, bi baa juu a moko yaa po yene.› Bi baa ŋanbi a kuuma ki mua ki yedi: ‹Ŋain canbaa!› Mini Li Miali Diedo n yedi yeni.»

⁶ O sawalipualo Jelemi den maadi laa maama kuli Juda bado Sedesiasi Jelusalema dogu nni.

⁷ Babilona bado toatieba den tuogi leni Jelusalema leni Juda dogi yi n sieni. Bi go den tuogi leni Lakisi leni Aseka, kelima Juda dogi yi n den pia u paalu kuli siiga laa doliedi n den sieni.

Yaa yonbi n faabi ke bi canbaanba goa ki cuo ba

⁸ Li Miali Diedo den maadi leni Jelemi yaa yogunu ke o bado Sedesiasi den kuani o *ŋantaado leni Jelusalema niba ki kpaani ki waani ke i yonbi baa baa mi *faabima.

⁹ Yua kuli n ŋa o yonbo lan tie ja bi pua, ki tie Ebilu buolu yua kuli. Oba kuli mo n da go kubi o nikpiilo Jufi buolu yua wan tua o yonbo.

¹⁰ A koanbala, li nitaanli leni yaaba n den taani ki kuani o ŋantaado den tuo ki baa faabi bi yonbi leni bi potuada ki kan go kubi ba ti yonbidi nni. Bi den tuo ki faabi ba ki ŋa ba.

¹¹ Ama bi go den ti yuandi ki lebidi bi yama ki goa ki cuo ban den ŋa yaa yonbi leni yaa potuada ki teni ke bi goa ki tua yonbi leni potuada tiladi.

¹² Lanwani Li Miali Diedo den maadi leni Jelemi ki yedi:

¹³ «Li Miali Diedo Isalele Tienu yedi nanda: ‹N kuani o ŋantaado leni yi baanba yaa daali ke n ñani ba Ejipiti diema nni ban den ye yaa diegu nni ti yonbidi ki yedi ba:

¹⁴ Ne leni bina lele, yi siiga yua kuli baa cabi o nikpiilo Ebilu yua, yua n cua ki kuadi o yuli opo. O baa soani opo bina luoba, li yaa yuandi a baa cabi o.› Ama yi baanba naa den ga n maama, baa den diadi bi tuba ki cengi n maama.

¹⁵ Yinba yi guani dinla, yi tieni yaala n dagidi n nuni po ki kpaani ki yedi ban ŋa yi nisaalilieba. Yi kuani o ŋantaado n nintuali ban taagi n yeli yaa dieli yaa niinni.

¹⁶ Ama yi goa ki lebidi yi yama, ki fali n yeli, yikuli yendo yendo goa ki cuo yi yonbi leni yi potuada yin den cabi yaaba ki guani ba leni u paalu ki teni ke bi goa ki tua yi yonbi leni yi potuada.

¹⁷ Lani n teni ke Li Miali Diedo yedi nanda: Nani yin naa tuo n maama ki kpaani ke yua kuli n faabi o nikpiilo yeni, diidi mini Li Miali Diedo n fii ki sedi yipo. N baa ŋa yi leni bu toabu, u yianbiadipuodiko leni mi koma, ki teni ki tinga nibuoli, yaaba n baa le yi kuli, ti jawaanciandi n cuo ba.

^18-19 Juda leni Jelusalema paatieba, li nikpiaga, li kopadicianba leni mi diema niba kuli, den kuani o ŋantaado leni nni ki padi ki naabiga, ki jia ga bonjena lie ki poandi a siiga. Ama laa niba den miidi o ŋantaado yeni ki naa kubi bi ñoaniani.

²⁰ Lani n teni ke n baa ŋa ba bi yibalinba yaaba n bua ki ñani bi miana yeni nuu nni. Bi tinkpiba baa tua jiema tanpoli nuani leni tinga yandi po.

²¹ N baa ŋa Juda bado Sedesiasi leni o koanbala bi yibalinba yaaba n bua ki ñani bi miana yeni nuu nni. N baa ŋa ba Babilona bado toagoli nuu nni yua n kan go yaa pia ŋantaadoba leni yi yeni.

²² Diidi n baa waani yi n ñoabonbilikaana. Mini Li Miali Diedo n yedi yeni. N baa teni ban cua ki baa u naa dogu. Bi baa koani leni u, ki paadi u, ki juu u mi fantama. N baa teni Juda dogi n kpandi diegbendi, niba n ki ye naani.»