Jeremi 33 - Gourmanchéma Bible

¹ Li Miali Diedo go den maadi leni Jelemi wan da den baa tie kpaadili li kpaadidieli luolu nni yaa yogunu.

² Li Miali Diedo yua n tagi ki tinga ki bili ga kaanyendu, wani yua yaa yeli n tie Li Miali Diedo yedi mine:

³ «Yini nni n baa guani apo N baa waani a yaa bonla n yaba, Yaa bonla n wuo ke ŋaa den bani la.

⁴ Kelima Li Miali Diedo Isalele Tienu maadi U naa dogu diedi maama, leni Juda badiba diedi maama ki yedi: Bu toabu teni ke laa diedi tua diegbendi.

⁵ Laa pia yipo todimaba kuli ki ña ke yi baa koani leni Babilona yaaba. Bi baa gbieni yi dogu leni bi tinkpiba bebe Min baa pua ki kpa yaaba n pabiencianli nni. Jelusalema dogu niba biadima po teni ke n buli ba n nunga.

⁶ Diidi mani n baa paagi u dogu yeni cain. N baa paagi u niba mo. N baa pa ba laafia leni mi yanduanma.

⁷ N baa teni Juda leni Isalele niba yaaba n ye ti yonbidi N guani, min goa ki kaani ba nani kpiama yeni.

⁸ N baa ŋuudi ki ŋanbi ba Leni ban den tieni yaa *tuonbiadi kuli ki tudi npo. N baa tieni bipo sugili leni ban den tudi npo Ki tieni yaa tuonbiadi leni ban den fii npo leni yaa yiema.

⁹ Diidi u naa dogu baa tua npo pamanli leni jigidi bonla, Ki tinga nibuoli kuli siiga. Laa nibuoli gbadi min tieni ba yaa ŋanma. Li baa paki ba bi gbani n jeli kelima mi yemanma Leni min baa pa ba yaa baali kuli yaa po.»

¹⁰ Li Miali Diedo yedi mine: «Yinba Juda yaaba, yi kpaagi ki tua Ke yi diema pua nafanu, Niba ki ye mi niinni ki buali yandi. Moamoane! Dinla po wani, Juda dogi nni Leni Jelusalema sani nni, Niba ki ye ki buali yandi. Ama n yedi yi ke mi naa diema nni yi go baa gbadi:

¹¹ I pamandanyani, i pamankandike yani, togibaa leni toginaa yani. Yi go baa gbadi ke bi niba yiini ki tua: ‹Pagi mani Li Miali Diedo U Paaciamu Kuli Daano Kelima o ŋani, o *ŋanbili mo ye hali yaa yogunu kuli!› Yi go baa gbadi yaaba n cuani i tuondi pada yani Li Miali Diedo diegu nni. Kelima n baa teni yaaba n den ye ti yonbidi n goa ki kpeni Min kaani ba nani kpiama yeni. Li Miali Diedo n yedi yeni.»

¹² Li Miali Diedo, U Paaciamu Kuli Daano yedi nanda: «Yaa kaanu n tie diegbena kaa pia niba, Kaa pia yandi leni li dogi nni kuli, A yanlola baa yaa ye bi yankpaaba po bi yandi n baa yaa ye naani.

¹³ A juana dogi nni, Sefela dogi nni, Niganu dogi nni, Benjamina dogi nni, Leni yaa dogi n gaani ki lindi Jelusalema leni Juda dogi nni kuli, Ti yanbidi go baa yaa ye yua coadi ba yaa nuu nni. Mini Li Miali Diedo n yedi yeni.»

U Tienu kan goa ki ga wan niani yaala

¹⁴ Li Miali Diedo yedi: «Diidi a dana kpendi ke n baa tieni Juda leni Isalele yaaba po Min den niani ba yaa ñoanianu yeni.

¹⁵ Li yogunu yaa pundi, N baa teni Dafidi n maa yaa biga n bua mi *teginma, Ki ŋua yaa bujiali n tiegi ki tiendi mi teginma mi diema nni.

¹⁶ Laa yogunu Juda baa baa mi *faabima, Jelusalema baa yaa pia mi yanduanma. Diidi mani ban baa yaa yi Jelusalema maama: “Li Miali Diedo ti teginma.”

¹⁷ Kelima Li Miali Diedo yedi nanda: ‹Dafidi kan luo yua baa kali ti gbandi po, Ki ga o kaanu Isalele yaaba diema nni.

¹⁸ Bi kopadicianba Lefi buolu yaaba Kan luo bi puoliŋuani siiga yaaba N baa ga bi tuonli bi puoli po, Ki yaa padi a *padijuukaana ki juugi a *dugibila Leni bu paabu ki yaa padi a pada daali kuli.› »

¹⁹ Li Miali Diedo maadi leni Jelemi ki yedi:

²⁰ «Mini Li Miali Diedo yedi ke yi yaa baa fidi Ki biidi min kuani yaa *ŋantaado leni u yensiinu, Leni min kuani yaa ŋantaado leni ku ñiagu Hali maama ke bi kan go yaa tie ñiagu leni yensiinu li yogunu yaa pundi,

²¹ Lanwani min kuani yaa ŋantaado leni n naacemo Dafidi Moko baa biidi maama ke o kan baa yaa biga n baa kali ti gbandi po Leni bi kopadicianba Lefi buolu yaaba, Bani yaaba n tuuni npo yeni.

²² Nani ban kan fidi coadi tanpoli ŋmabila maama kelima a yabinu po, Bi ki biigi mi ñincianma tanbiima maama yeni, Moko n baa teni n naacemo Dafidi puoliŋuani Leni bani Lefi buolu yaaba, yaaba n tuuni npo n pili yene.»

²³ Li Miali Diedo go den maadi leni Jelemi ki yedi:

²⁴ «Naani ŋaa gba bi niba nne n maadi yaa maama? Bi tua: ‹Li Miali Diedo n den gandi yaa dieliediti, o ŋa ti.› Yeni, bi fali n niba, Bi yaa po wani, baa go tie nibuolu moko.

²⁵ Li Miali Diedo yedi nanda: ‹N yaa den kuani o ŋantaado leni u yensiinu leni ku ñiagu, Ki bili ki tinga leni tanpoli n baa cuoni maama,

²⁶ Lanwani n bi baa fidi ki ŋa Jakobo leni n naacemo Dafidi puoliŋuani Ki da go gandi bi puoliŋuanu siiga yaaba n baa gobidi Abalahama, Isaaka leni Jakobo puoliŋuani. N baa teni bi niba yaaba n gedi ti yonbidi n kpeni. N baa gbadi bipo mi niñima.› »