Jeremi 32 - Gourmanchéma Bible

¹ Li Miali Diedo n den maadi Jelemi yaa maama Juda bado Sedesiasi bali binpiiga binli, li den tie Babilona bado Nebukanesa mo yaa bali piiga n binniili binle.

² Laa yogunu yo ke Babilona bado toagola den gaani ki cebini Jelusalema. O sawalipualo Jelemi den lo li kpaadidieli luolu yu n den ye Juda bado diegu nni.

³ Juda bado Sedesiasi den teni ke bi luoni o ki yedi: «Be yaa po yo ke a pua sawali ki tua: ‹Li Miali Diedo yedi: Diidi n puni Babilona bado u naa dogu. O baa diedi u moko.

⁴ Juda bado Sedesiasi kan cia Babilona yaaba nuu nni. Ama Babilona bado li baa muubi o bonŋanla. O baa maadi leni o ban kadi leni biyaba nungbaana naa.

⁵ Babilona bado baa gedini Sedesiasi Babilona po. O baa yaa ye lanpo hali min baa cua ki le o yaa yogunu. Li Miali Diedo n maadi yi. Yi yaa tieni bu toabu leni Babilona yaaba, yi kan paadi ba.› »

⁶ Jelemi den yedi ke Li Miali Diedo maadi leni o ki yedi:

⁷ «Diidi a yiado Salumi bijua Anameeli baa cua a kani ki yedi a: ‹Daa n kuanu yu n ye Anatoti, kelima a pia u sanu ki daa ki diedi u kuanu yeni.› »

⁸ Lanwani Anameeli n yiado bijua den cua n kani nani Li Miali Diedo n den maadi maama yeni li kpaadidieli luolu nni ki yedi nni: «Daa n kuanu yu n ye Anatoti Benjamina diema yeni nni kelima a pia u sanu ki diedi u ki go da u moko.» Lanwani n den bandi ke li den tie Li Miali Diedo yaa maame.

⁹ N den da n yiado bijua Anameeli kani yaa kuanu n ye Anatoti ki biigi u ligi: piiga n kujapiena lele.

¹⁰ N den baa li tili ki diani ti *ŋantaado maama ki baa siedinba ki biigi i ligi yeni kpiagu li *bonbiigikaala nni.

¹¹ N go den taa mi kuadima ŋantaaditili yaali n den pia mi maalima bonla nani lan den bili maama, leni yaa tili n den poabidi kuli.

¹² N den taa mi kuadima ŋantaaditili yeni ki teni Neliya bijua Baluki, Maseya bijua, n yiado bijua Anameeli nunbu nni leni siedi yaaba moko n den diani li ŋantaaditili yeni nintuali leni Jufinba yaaba n den ye li kpaadidieli luolu nni kuli nintuali.

¹³ Bikuli nintuali n den yedi Baluki yaa maama n tie na:

¹⁴ «Li Miali Diedo U Paaciamu Kuli Daano, Isalele Tienu yedi yaa maama n tie na: ‹Taa a naa ŋantaaditila ya n pia mi maalima leni yaali n poabidi ki kpieni a a tanboba nni, lani n tie ŋan waagi ki ye.› »

¹⁵ Kelima Li Miali Diedo U Paaciamu Kuli Daano, Isalele Tienu yedi: «Bi go baa yaa da ti diedi, i kuani leni duven tiidi kuani mi naa diema nni.»

Jelemi jaandi

¹⁶ Min den teni Baluki Neliya bijua mi kuadima ŋantaaditili, n den jaandi ki mia Li Miali Diedo ki yedi:

¹⁷ «Fini Li Miali Diedo, a tagi tanpoli leni ki tinga ki doagidi a paaciamu leni a banma. Liba kuli ki pa apo.

¹⁸ A tiendi mi ŋanma hali nifiima tudili po. Bi bidanba tagili panpaani, a teni ke li nandi bi bila yaaba n ŋua bi puoli po. A tie U Tienu yua n yaba, yua tie U Paaciamu Kuli Daano.

¹⁹ A yanjagili yaba a bontienkaala mo ki pia lie. A nuni kuli ŋubidi ki nua bi nisaaliba tuada kuli ki baa pa yua kuli o tuona panpaani.

²⁰ A tieni mi bancianma leni li bonlidikaala Ejipiti diema nni. Hali dinla Isalele diema nni leni bi niba kani, a yeli ñani dinla nani tin nua maama.

²¹ A tieni yaa bonlidikaala n pia i jeje ki doagidi a paaciamu leni a bancianma ki ñani a niba Ejipiti diema nni.

²² A puni ba mi naa diema ŋan den niani ke a baa pa bi baanba yaama, mi naaŋanma leni ti siadi n dua yaa diema nni.

²³ Bi cua ki diedi ma, ama bi naa cengi a maama, baa cuoni nani a *balimaama n den bili bipo maama. Baa den tieni ŋan den puogi ba ban tieni yaala. Lani n teni ke a cuani bipo o naa fala kuli.

²⁴ Diidi yibalinba gaani ki lindi ki bua ki guli u dogu. Bani Babilona yaaba, yaaba n fii ki sedi u dogu po yeni baa diedi u. Bu toabu, mi koma leni u yianbiadipuodiko baa teni ban paadi u dogu yeni. Ŋan maadi yaa maama tieni, a nua li mo.

²⁵ Baa leni lankuli, fini Li Miali Diedo n yedi nni: ‹Baa i ligi ki daa u kuanu, lingi siedinba.› Bi luni u dogu ki diani Babilona yaaba nuu nni.»

Li Miali Diedo n guani Jelemi po yaa maama

²⁶ Li Miali Diedo den maadi leni Jelemi ki yedi nanda:

²⁷ «Diidi n tie Li Miali Diedo, Miali fo kuli yaa Tienu. Naani li pia yaala n pa npo bi?»

²⁸ Lani n teni ke Li Miali Diedo yedi nanda: «Diidi n ŋa u naa dogu Babilona yaaba nuu nni Leni Babilona bado Nebukanesa nuu nni. Bi baa diedi u.

²⁹ Babilona yaaba, yaaba n baa u dogu nne baa kua u niinni. Bi baa juu u mi fantama ki taani leni ban juugi A *dugibila yaa diena po o bulo *Baali po, Ki go cabi butoe po ki baa biidi n pali.

³⁰ Kelima Isalele yaaba leni Juda yaaba Nan li tiendi yaala n ki mani npo hali bi panma nni. Isalele yaaba leni bi tuada li biidi n pali bebe. Li Miali Diedo n yedi yeni.

³¹ Kelima hali ban maa u naa dogu, U li tie npo pabiidili leni pabienli bonle Hali ki ban tu dinla. Lani n teni ke n baa paadi leni u.

³² N pali biidi kelima Isalele leni Juda yaaba, Bani, bi badiba, bi koanbala, bi kopadicianba, Bi sawalipuaba, Juda yaaba leni Jelusalema yaaba, N tieni nni yaa biadima yaa po.

³³ Bikuli buli nni bi nunmu, baa puni nni nunga. N bangi ba u yogunu kuli ki naa cedi, Ama bi naa gaani mi bangima.

³⁴ Bi kuani bi cancaginbonla n diegu nni Ban taagi n yeli naani ki *joagini gu.

³⁵ Bi maa bi *buli padikaani Baali po Beni-Hinomi joaloangu nni Ki baa padi bi bijaba leni bi bisiaba o bulo *Moloko po. Mii den puogi ba ban tieni laa bonla. Mii den baa li yantiali ki baa tieni laa cagindi bole Ki teni Juda n tieni ti *tuonbiadi.»

³⁶ Moala lani n teni ke Li Miali Diedo Isalele Tienu maadi nanda: «U naa dogu yu yaa po ke yi tua: ‹Bi baa ŋa u Babilona bado nuu nni Ki teni ki jugisiega, mi koma, Leni u yianbiadipuodiko n paadi u dogu yeni.›

³⁷ Diidi n baa taani ba min den yayadi ba yaa dogi nni kuli N pabienli, n mutuoli, n pabiidili Leni n pali n den boandi bipo yaa yogunu. N baa guani ba nekanba ki teni ban yaa ye leni mi yanduanma.

³⁸ Bi baa yaa tie n niba, N mo baa yaa tie bi Tienu.

³⁹ N baa pa ba payenli leni yantiayenli Lani n tie ban yaa fangi nni yaa yogunu kuli Bani leni bi puoliŋuani yema manu po.

⁴⁰ N baa kuani yaa ŋantaado n kan fidi hali abada leni ba. N kan go buli ki ŋa ba. N baa tieni ba mi ŋanma, N baa kuani n fangili bi pala nni Lani n tie ban da foagidi leni nni.

⁴¹ N pali baa yaa mani bipo min tieni ba mi ŋanma. N baa kaani ba bonŋanla mi diema nni.

⁴² Kelima Li Miali Diedo yedi nanda: ‹Nani min teni ke mi yebiadima ŋma bi niba nne maama yeni, Moko, n baa tieni bipo min maadi yaa ŋanma yeni kuli.›

⁴³ Bi baa baa i kuani, yin kua yaa diema nni: ‹Pabiidili kaanu, niba leni yandi n ki ye naani yeni. Bi ŋaa li kaanu Babilona yaaba nuu nne.

⁴⁴ Bi baa da i kuani yeni leni i ligi Ki diani li tili mi daama yogunu. Bi baa tieni ŋa mi maalima, ki lingi siedinba Benjamina diema nni, Jelusalema dogu lindima, Juda dogi nni, a juana dogi nni, Sefela dogi nni leni Niganu dogi nni, Kelima n baa teni bi yonbi n goa ki kpeni.› Li Miali Diedo n yedi yeni.»