Jeremi 30 - Gourmanchéma Bible

¹ Li Miali Diedo den maadi leni Jelemi yaa maama n tie na:

² «Mini Li Miali Diedo Isalele Tienu n puogi a ŋan diani li tili nni min yedi a yaa maama kuli.

³ Diidi a dana kpendi, mini Li Miali Diedo n yedi ke n baa teni n niba Isalele yaaba leni Juda yaaba, yaaba n den ye ti yonbidi yeni n guani min den puni bi baanba yaa diema nni ban goa ki diedi ma yeni nni.»

⁴ Diidi mani Li Miali Diedo n maadi yaa maama Isalele leni Juda po.

⁵ Wani Li Miali Diedo yedi nanda: «Min gba yaa fuugu yeni naa tie yanduanma fuugu ka. Li tie jawaanciandi yaa fuugu yo.

⁶ Buali mani yiyaba bonŋanla, Ŋme n kpa laa o ja n gbaani ki mali naani? Be yaa po yo ke n nan nua ke bi jaba kuli Ñii bi ciamu nani yaa pua n baa maa yeni? Be yaa po yo ke mu nunmu kuli gbidi?

⁷ Be yaa fala mo nne! Kelima li naa daali tie dacianli. Daaliba kuli ki naani leni li. Li tie Jakobo puoliŋuani po paboanli daale. Ama bi baa baa gaapo.»

⁸ Li Miali Diedo U Paaciamu Kuli Daano yedi: «Laa daali, n baa mudi Nebukanesa n lani Bi tuli nni yaa landili yeni. N baa dadi ki ŋabi ban loli ba leni yaala. Canba kan go diedi ba.

⁹ Bi baa soani Li Miali Diedo bi Tienu po Leni bi bado Dafidi, min baa pa ba yua po.

¹⁰ Fini n naacemo Jakobo, Da jie liba, Li Miali Diedo n yedi yeni. Isalele, da digibi ba! Kelima diidi n baa faabi a ki tinga nni Leni a puoliŋuani n ye ti yonbidi yaa diema nni. Jakobo baa guani ki mangi o pali Mi fuodima po leni mi yanduanma po. Oba kuli kan cua ki lengi o yama.

¹¹ Kelima n ye leni a ki baa faabi a N baa bolini i nibuoli kuli Min yayadi a naani kuli. Ama n kan bolini fini wani ba. N baa faligi a nani lan pundi maama, N kan bi fidi ki ŋa ŋa nani yua n ki pia tagiliba yeni.»

¹² Li Miali Diedo maadi mine: «A yebiadima ki pia lebidima A nali koani boncianla.

¹³ Oba kuli ki koani apo Ki baa fini a nali. Yaa ñoagu n baa todi a mo ki ye.

¹⁴ A jaconcona kuli sundi apo Baa go lingi a. N faligi a nani n yibali yeni. N waani a o falaciamo kelima a tagili n yaba maama po Leni a *tuonbiadi n bia maama po.

¹⁵ Be yaa po yo ke a kaliti yaa bonla n biidi kuli po, Leni a tonu yu n ki pia ñoagu po? Li tie kelima a tagili n kandi po yo, A tuonbiadi n bia maama yaa po yo ke n tieni a laa bonla.

¹⁶ Lani n teni ke yaaba n dini a, bi baa je ba A yibalinba kuli baa gedi ti yonbidi Yaaba n den su ŋa, bi baa su ba Yaaba n kpendi ki fagi a Bi baa fagi bani moko.

¹⁷ Nani ban tua ke ŋaa pia fuomaba kuli Ke oba kuli mo ki yagini o yama apo yeni, Lani yaa po ke n mo baa paagi a leni a poagilima Ki teni a nala n gbeni. Li Miali Diedo n yedi yeni.»

¹⁸ Li Miali Diedo maadi nanda: «N goa ki kpenni Jakobo puoliŋuani yaaba n den ye ti yonbidi N juogi a diedi yaaba. Bi baa goa ki maa u dogu a diegbenbuokpela nni. Ki maa badidiegu ku kaankpelu nni.

¹⁹ Bi siiga nni i pamandanyani leni i yigimi baa fii ki loli. N baa teni ban pugini boncianla, bi kan wadi. N baa kpiagi ba, bi kan go le yualu.

²⁰ O bijaba baa goa ki tua nani kpiama yeni O niba kuli baa yaa se n nintuali N baa fii ki sedi yaaba n wangi a fala kuli po.

²¹ Bi bado baa ña bi siiga Bi gobidika baa ti ña bi siige. N baa teni wan cua n kani. Ŋme n baa ñigini ki cua n kani? Li Miali Diedo n yedi yeni.

²² Yi baa tua n niba, N baa tua yi Tienu

²³ Li Miali Diedo tafaagu nno O pabiencianli fii, Ki tacianga baandi Ki fu bi nibiadiba yula po.

²⁴ Li Miali Diedo pabiencianli kan pegidi ki teli potogu, Hali wan baa tieni o pali nni wan jagi yaala. Li daali kpendi ke yi baa bandi lan bua ki yedi yaala.»