Jeremi 3 - Gourmanchéma Bible

¹ Guani mani npo: O ja yaa ñani o pua Ke o ñani o kani ki ban kuni jatoa. Naani laa ja go baa guani o pokpelo yeni kani? Naani laa diema kan *joagini cain, bi mani kaa? A mo conbi leni a jaconcona boncianla Moala wani, a di bua ki guani n kani. Mini Li Miali Diedo n yedi yeni.

² Yaadi ki noanli a juana yula po, Diidi mani, naani a pia naani ke ŋaa cagini a yuli? Bi den teni ke a kaa i sani nni Nani Alabi nibuolu n kaa mi fanpienma nni maama. A joagini mi diema Leni a cancagintuada leni a *conconma.

³ Lanwani n yie kaa puni a taaga, Ki tayuankaaga mo naa cua. A li baa pia a poconcona leni mi kafaama, Ŋaa ban jie baa fe mo.

⁴ Moala a di kpaani ki maadi leni nni ki tua: «N baa, fini n den tie n bonwaama nni *nidugika.»

⁵ Naani o pali baa waagi ki bee? Naani o cili kan jiidi abada? Diidi ŋan den tua yaala n yeni. Ama a tieni yaala n bia A den pia li paalu mo.

Isalele kan sedi kaanyendu, Juda mo conbi

⁶ Li Miali Diedo den yedi nni o bado Josiasi yogunu: «Naani a laa Isalele, “Kan sedi kaanyendu” n tieni yaala? O fii ki gedi yaa juana kpedi kuli po leni yaa tiidi n bundi kuli tinga ki cagini o yuli.

⁷ N den yedi n yuli: ‹O yaa ban tieni laa bonla kuli ki gbeni, o baa guani n kani. Ama o naa guani. O naataanpuoga Juda yua tie janbi daano yeni laa laa bonla.›

⁸ Baa ke n ñani Isalele “Kan sedi kaanyendu,” kelima o conconma po, ki teni o o poñatili, n laa ke baa leni lankuli o naataanpuoga Juda i janbi daano naa baa fangili lipo. O moko gedi ki ban cagini o yuli.

⁹ O cancagintuada ya n ki wuo joagini mi diema. O cagini o yuli ki pugi ti daadi leni a tana.

¹⁰ Leni baa lankuli o naataanpuoga Juda i janbi daano naa guani n kani leni o pali kuli, faama bebe. Li Miali Diedo n yedi yeni.»

¹¹ Li Miali Diedo den yedi nni: «Isalele “Kan sedi kaanyendu,” tiegi ki cie Juda i janbi daano.

¹² Gedi mani ki ban kpaani nijienu po ki yedi: Isalele “Kan sedi kaanyendu,” Li Miali Diedo yedi mine: ‹N kan go yaa pia apo nunbiadiga Kelima n yama dingi. Li Miali Diedo n yedi yeni. N pali mo kan go waagi ki be apo yogunu kuli.

¹³ Ŋan li tuo a tagili bebe Kelima a yiema kuli Taa ki sedi Li Miali Diedo a Tienu po yo. A den ŋoadi bi nilanba *buli, Ki ban conbi yaa tibu n bundi kuli yaa tinga, Ki naa den cengi n nialu mo. Li Miali Diedo n yedi yeni.›

¹⁴ Guani mani ne, yaaba n kan sedi kaanyendu, Li Miali Diedo n yedi yeni. Kelima mini n tie yi canbaa N baa gandi niyendo u naa dogu nni, Niba lie mo, u naa buolu nni, N baa guani yi Siyono po.

¹⁵ N baa pa yi min bua yaa yankpaaba Bi baa yaa kpa yi leni mi yanfuoma.

¹⁶ Yi yaa pili ki gbieni mi diema yaa yogunu, Laa yogunu bi kan go yaa maadi Li Miali Diedo *ŋantaadikpaku maama. Bi kan go tiadi kupo Oba kuli kan go maadi baa ku maama. Bi kan go faami ku kaayema po, Bi kan go tieni bontoagu mo.

¹⁷ Laa yogunu bi baa yaa yi Jelusalema “Li Miali Diedo bali kalikaanu”. Mi diema nibuoli kuli baa sani ki cua u dogu yeni niinni, Li Miali Diedo yeli nni, Jelusalema dogu yeni po. Bi kaa go baa ŋua bi pajuaga sanyuodi.

¹⁸ Laa dana yaa niinni, Juda diegu yaaba leni Isalele diegu yaaba Baa taani ki yegi ki ña nijienu diema po, Min puni yi baanba yaa diema man tua bi faali yeni.»

Yaa niba n ki bani ban bua yaala guani U Tienu kani

¹⁹ N den buali n yuli: «N sugini hali bonŋanla fine n tua N bijaba siiga kuli liiga yua, Ki pa ŋa yaa diema n mani hali boncianla, Yaa tinga n ŋani ki cie mu tinmu kuli li ŋandunli nni.» N den tama ke a baa yini: «N baa!» Ki kan go buli nni a nunga mo.

²⁰ Yende, nani o pua n yen janbi o calo maama yeni, Yinba Isalele buolu yaaba moko janbi nni yene. Mini Li Miali Diedo n yedi yeni.

²¹ I moe fii ki loli i kaani kuli Isalele bila n mua ki figindi Kelima bi biidi bi tagu Ki sundi Li Miali Diedo bi Tienu.

²² Guani mani n kani, yinba yaaba n kan sedi kaanyendu yeni. N baa paagi yi leni yi yanlengidima Bi yedi: «Diidi ti kpendi a yaa kane, Fini n tie Li Miali Diedo ti Tienu.»

²³ Tin gba a joabila leni a joaciama po Yaa lanbu kuli tie faama bebe. Yeni de, Li Miali Diedo ti Tienu yaa kane Ke Isalele yaaba *faabima ye.

²⁴ Hali ti bonwaama nni o cancaginbulo *Baali ŋoadima pia i fe, li dini ti baanba N den faligi bi yula ki bili yaala, Bi yangbenga leni bi yanbidi kuli, Bi bijaba leni bi bisiaba kuli.

²⁵ Ti fe n tie ti duankaagu Ti jigidima mo n tie ti kpalipinkaabu. Kelima tinba leni ti baanba, Ti tieni ti *tuonbiadi Li Miali Diedo ti Tienu po. Ki cili ti panma yogunu ki ban pundi hali dinla Tii cengi Li Miali Diedo ti Tienu yedima.