Jeremi 29 - Gourmanchéma Bible

¹ Diidi mani o sawalipualo Jelemi n den ye Jelusalema ki diani yaa tili yaa nikpeliba n den gedi ti yonbidi, bani bi kopadicianba, bi sawalipuaba leni Nebukanesa n den ñani yaa niba Jelusalema kuli ki gedini ba Babilona diema nni.

² Li yogunu sua ke o bado Yekonia, o bado naa, badidiegu tuonsoanba, o bado koanbala Juda leni Jelusalema yaaba, a tuonsoanbanda leni a buliñoaguuda kuli den ñani Jelusalema.

³ Bi den teni li tili yeni Safani bijua Eleasa leni Gemalia Hilikiya bijua Juda bado Sedesiasi n den soani yaaba Babilona diema nni o bado Nebukanesa kani. Li tili yeni den yedi:

⁴ «Li Miali Diedo U Paaciamu Kuli Daano, Isalele Tienu, yedi nanda: ‹Min ñani yaaba Jelusalema ki gedini ba ti yonbidi Babilona,

⁵ maa mani ti diedi ki yaa ye ti niinni. Ŋuu mani ti kpintiidi ki je li bonluonkaala.

⁶ Taa mani yi yaba ki maa a bonjala leni a bonpola. Taa mani bi puoba yi bijaba po ki pa yi bisiaba bi jaba. Lani n tie ban maa a bonjala leni a bonpola. Yaa maa ki pugidi mani bonŋanla yin ye naankani, da wadi mani.

⁷ Lingi mani yin ye naankani ti yonbidi yaa dogu nni mi yanduanma. Jaandi mani Li Miali Diedo u dogu yeni ŋamu po, kelima u yaa pia mi yanduanma yo ke yi mo baa ye leni mi yanduanma.› »

⁸ Li Miali Diedo U Paaciamu Kuli Daano, Isalele Tienu yedi mine: «Yin da teni yi sawalipuaba yaaba n kaa yi siiga n boandi yi. Yin da teni yi baayuadiida moko n boandi yi. Yin da tama ke yi dangidi bua ki bundi liba kuli!

⁹ Kelima ban pua yaa sawalo n yeli nni yeni tie faame. Mii soani ba. Mini Li Miali Diedo n yedi yeni.»

¹⁰ Ama mini Li Miali Diedo yedi nanda: «Diidi mani bina piilele yaa pendi Babilona po, n baa cua ki todi yi ki kuani yipo min den niani yi yaa ñoanianu. N baa ñani yi Babilona po ki guani yi Jelusalema po.

¹¹ Mini Li Miali Diedo yedi: N bani min jagi yipo yaala. N jagi yipo yaala n ŋani. Mii jagi yipo yaala n bia ka. Lani n tie yin baa mi suginma saala po.

¹² Lanwani yi yaa cua ki yini ki mia nni, n baa guani yipo yi miabu.

¹³ Yi baa lingi nni ki le nni, kelima yi baa lingi nni leni yi pala kuli.

¹⁴ N baa teni yin le nni. Li Miali Diedo n yedi yeni. N baa teni yi yonbi n goa ki kpeni. N baa ñani yi min den gedini yi ti yonbidi yaa diema nni leni yin den yayadi ki ye yaa nibuolu leni yaa kaani kuli nni. N baa taani yi ki go kpenni yi min den deli ki ñani yi naani. Li Miali n yedi yeni.»

¹⁵ Ama yimo nan kpaagi ki tua ke U Tienu teni ke yi baa yi siiga nni bi sawalipuaba Babilona diema nni.

¹⁶ Li Miali Diedo maadi mi naa maama leni yaa bado n kaa Dafidi bali gbandi po leni bi niba yaaba n kaa mi naa diema nni kuli leni a kpiiba yaaba n ki gedi ti yonbidi.

¹⁷ Li Miali Diedo yedi nanda: «Diidi n baa cuani bi siiga bu toabu leni mi koma, ki teni ban yaa naani leni yaa kankanbedima n ki go pia ŋmanma kelima ŋan bedi maama po yeni.

¹⁸ N baa ŋoadi ki deli ba leni bu toabu, mi koma leni u yianbiadipuodiko. N baa teni ban tua ti jawaanciandi bonla ki tinga diema nibuoli po, ti solindi bonla, li pakili, ti laadi, li ñuali leni u yualu bonla min baa yadi yi yaa nibuoli siiga kuli.

¹⁹ Kelima baa cengi n maama, baa min tuuni n naacenba bi sawalipuaba yaaba yaa kani ki naa cedi. Baa leni lankuli yii cengi. Li Miali Diedo n yedi yeni.»

²⁰ Ama yinba, cengi mani Li Miali Diedo, min ñani yinba yaa yonbi Jelusalema ki gedini nni Babilona yeni!

²¹ Li Miali Diedo U Paaciamu Kuli Daano, Isalele Tienu maadi Kolaya bijua Akabi leni Maaseja bijua Sedesiasi yaaba n pua sawali-faama n yeli nni: «Diidi n baa ŋa ba Babilona bado Nebukanesa nuu nni. Bi baa pua ki kpa ba yi nunbu nni.

²² Ban den gedini Juda yaaba ti yonbidi Babilona diema po yeni kuli baa taagi laa niliediba yaa yela yo ki solini ki tua: ‹Li Miali Diedo n soani a nani Sedesiasi leni Akabi, Babilona bado den taa yaaba ki ŋoabini ba mi fantama po yeni!›

²³ Kelima bi tieni ti cagindi Isalele diema nni ki ban conbi leni bi nisaalilieba puoba, ki pua mi faama n yeli nni yaa yogunu ke n naa den puogi ba liba. N bani la, mini n go tie li siedi mo. Li Miali Diedo n yedi yeni.»

Semaya n diani yaa tili

^24-25 Li Miali Diedo U Paaciamu Kuli Daano, Isalele Tienu den puogi o sawalipualo Jelemi ke wan yedi Semaya Nehelama yua mine: «A soani a yeli nni Jelusalema niba kuli po o kopadiciamo Maaseja Sofoni bijua leni bi kopadicianba kuli po a tila yaa yedi mine:

²⁶ ‹Li Miali Diedo gandi a, ŋan tua kopadiciamo Yeoyada kaanu, ke ŋan yaa guu Li Miali Diedo diegu ki yaa diidi yua yini o yuli sawalipualo ki wolini ke ŋan cuo ki kpaa o ti kpaadi ki go lani o li landili.›

²⁷ Moala li ga lede ke a cedi Jelemi Anatoti dogu yua, yua yedi ke o tie sawalipualo yi siiga,

²⁸ soani ke bi yedi ti Babilona po: ‹Yi baa waagi lipo! Maa mani yi diena ki yaa ye a niinni! Ŋuu mani yi kpintiidi ki ŋmani li bonluonkaala!› »

²⁹ O kopadiciamo Sofoni den cogi li tili o sawalipualo Jelemi kani.

³⁰ Li Miali Diedo den maadi leni Jelemi ki yedi:

³¹ «Soani ban yedi yaaba n gedi ti yonbidi kuli ke Li Miali Diedo yedi Semaya Nehelama yua po line: ‹Nani wan n pua yipo sawali ke n naa soani o, ki teni ke yi dugi yaala n naa pia yipo todima yeni po.› »

³² Li Miali Diedo n yedi yaama nne: «Diidi n baa fii ki sedi Semaya Nehelama yua po leni o puoliŋuani kuli po. Bi siiga oba kuli kan yaa ye bi naa niba nni, oba kuli kan le min baa tieni n niba po yaa ŋanma mo. Kelima o maama tie yiema yaa maama Li Miali Diedo po. Li Miali Diedo n yedi yeni.»