Jeremi 28 - Gourmanchéma Bible

¹ Laa binli nni, Juda bado Sedesiasi n cili ki kali ti gbandi po yaa yogunu, li binnaali cimuulo, Asuli bijua Anania yua n den tie Gabaono sawalipualo den yedi nni Li Miali Diedo diegu nni bi kopadicianba leni li nitaanli nintuali:

² «Li Miali Diedo U Paaciamu Kuli Daano, Isalele Tienu yedi nanda: ‹N mudi Babilona bado paalu!

³ Ne leni bina lie n baa teni ban guani u naa kaanu, Li Miali Diedo diegu nni tiadi, Babilona bado Nebukanesa n den ñani yaadi ne ki gedini ti Babilona diema po yeni kuli.

⁴ Li Miali Diedo n yedi ke o go baa guani nekanba Yeojakimi bijua Yekonia Juda bado leni ban gedini yaaba Babilona kelima min baa mudi Babilona bado paalu maama yaa po.› »

⁵ O sawalipualo Jelemi den guani o sawalipualo Anania po bi kopadicianba leni li nitaanli kuli nintuali yaaba n den ye Li Miali Diedo diegu nni,

⁶ ki den yedi o: «Amina, Li Miali Diedo n tieni yeni! U Tienu n ga a ñoabu nni ki teni Li Miali Diedo diegu nni tiadi n guani ki go teni yaaba n ye Babilona ti yonbidi n goa ki kpeni.

⁷ Min mia ŋa yaala bebe n tie ŋan cengi min maadi apo leni bi niba kuli po yaa maama.

⁸ Li den baa yaa sawalipuaba n liidi mini leni fini hali yaa yogu ki den pua sawali ke bu toabu, mi yebiadima leni u yianbiadipuodiko baa baa diema boncianla.

⁹ Ama o sawalipualo yaa pua sawali ki yedi ke mi yanduanma baa yaa ye wan yedi yaala yaa tiene ke bi baa bandi ke Li Miali Diedo n soani o i moamoani.»

¹⁰ Lanwani o sawalipualo Anania den ñani o sawalipualo Jelemi tulu nni wan den laa yaa landili ki mabi ki mudi li,

¹¹ ki yedi: «Li Miali Diedo yedi nanda: ‹Diidi min baa mudi Babilona bado Nebukanesa paalu maama n yeni i nibuoli kuli po ne leni bina lie siiga.› » Lane o sawalipualo Jelemi mo den taa o sanu ki ban caa.

¹² O sawalipualo Anania n den landi o sawalipualo Jelemi n den laa yaala ki mabi ki mudi yaa yogunu Li Miali Diedo den maadi leni Jelemi ki yedi:

¹³ «Ban yedi Anania: Li Miali Diedo yedi ke a baa fidi ki mudi yaa landili n tie daadi. Fini Jelemi, lingi ti kudi yaa landili ki tieni ti daadi landili kaanu.

¹⁴ Kelima Isalele Tienu U Paaciamu Kuli Daano Li Miali Diedo yedi nanda: ‹N baa lani i nibuoli kuli yaa landili n tie ti kudi ki teni ban soani Nebukanesa Babilona bado po. Bi baa soani opo mo. N go puni wane baa ku muagu nni yandi moko.› »

¹⁵ O sawalipualo Jelemi den yedi o sawalipualo Anania: «Cengi Anania! Li Miali Diedo naa soani a, ke a nan pia bi naa niba ki boandi ki puuni ba ti dugidi.

¹⁶ Lani n teni ke Li Miali Diedo yedi mine: ‹N baa deli ki ñani a mi diema nni. Dunla a baa kpe kelima a maama tie yiema Li Miali Diedo po.› »

¹⁷ Laa binli nni o sawalipualo Anania den kpe o cileleelo nni.