Jeremi 27 - Gourmanchéma Bible

¹ Josiasi bijua Sedesiasi, Juda bado n den dini li bali yaa yogunu Li Miali Diedo den maadi leni Jelemi mi naa maama:

² «Li Miali Diedo maadi leni nni mine: Ŋan figi i baabi ki lingi a landa ki laa a tulu nni.

³ Taa laa bonla ki soani Edomi, Moabi leni Amoni buoli yaaba, Tili leni Sidoni badiba po. Ŋan teni u tondu n gedi leni yaaba n cua Jelusalema Juda bado Sedesiasi kani.

⁴ Ŋan go soani n ñoabonbilikaana bi canbaanba po ki yedi: Li Miali Diedo U Paaciamu Kuli Daano, Isalele Tienu yedi: Ban yedi mani yi canbaanba,

⁵ ke mini n tagi ki tinga, bi niba leni ti yandi yaadi n ye ki tinga nni leni n paaciamu leni n banma. N baa pa ki tinga min bua yua.

⁶ Moala po mini n puni laa diema buoli kuli n naacenba Babilona bado Nebukanesa ki go puni o ku muagu nni yandi tin yaa tuuni opo.

⁷ I nibuoli kuli baa soani opo, o bijua po, o yaabili po, hali yaa yogunu ke yaa nibuoli n pa leni yaa badiba n pa ki cie omo baa cua ki diedi o diema.

⁸ Nibuoluba, bi diemaba yaa yie ki kan soani Babilona bado Nebukanesa po, ki yie ki kan teni o tulu Babilona bado n lani o li landili, n baa fii ki sedi laa diema po leni ki jugisiega, mi koma leni u yianbiadipuodiko hali ki ban bolini mi diema yeni leni o nuu. Mini Li Miali Diedo n yedi yeni.

⁹ Yinba, da cengi mani yi sawalipuaba, bi yi lingida, yi dangidi, yi baayuadiida, yi ñoagidanba, bani yaaba kuli n tua yi: ‹Yin da soani Babilona bado po!

¹⁰ Kelima bi pua yi sawali-faama ki bua yin foagidi leni mi diema ke min ña yi maama nni yin kpe.›

¹¹ Li Miali Diedo yedi ke yaa nibuolu n baa teni u tulu Babilona bado ti yonbidi po, ki baa soani opo, n baa pa u mi fuodima o diema nni. Lani n tie li niba n ko bu kpaabu ki go kali mi diema nni.

¹² N maadi leni Juda bado Sedesiasi moko laa maame ki yedi: ‹Tandi mani yi tuli Babilona bado n lani yi li yonbilandili. Soani mani wani leni o niba po, lani n tie yin yaa ye.

¹³ Be yaa po yo ke bu toabu, mi koma leni u yianbiadipuodiko baa kpa yi nani Li Miali Diedo n bili maama yaa nibuolu n yie ke u kan soani Babilona bado po?›

¹⁴ Yin da cengi yaa sawalipuaba n tua yi: ‹Yin da soani Babilona bado po!› Kelima ban pua yi yaa sawalo yeni tie faama.

¹⁵ Mini Li Miali Diedo n yedi yeni ke bi nan pua sawali-faama n yeli nni ki bua min ña yi maama nni ki bolini yi, yinba leni yaa sawalipuaba n pua yipo laa sawali buoli kuli.»

¹⁶ N maadi leni bi kopadicianba leni li nitaanli kuli ki waani ke Li Miali Diedo yedi: «Yin da cengi mani yi sawalipuaba yaaba n tua yi: ‹Moala ke bi guani ban den taa yaa tiadi Li Miali Diedo diegu nni ki gedini Babilona!› Kelima ban pua yi yaa sawalo kuli tie faame.

¹⁷ Da cengi ba mani! Soani mani Babilona bado po. Lani n tie yin yaa ye. Yi baa ga lede ki teni u dogu na n kpandi ki tua diegbena?»

¹⁸ Jelemi go den pugini ki yedi: «Bi yaa tie sawalipuaba moamoani, ke Li Miali Diedo n maadi leni ba, ban jaandi Li Miali Diedo U Paaciamu Kuli Daano ki mia o, wan teni yaa tiadi n sieni Li Miali Diedo diegu nni leni Juda bado diegu nni Jelusalema nni n da gedi Babilona!

¹⁹ Diidi mani Li Miali Diedo n go yedi yaala, yaala n tie a bunbuna, ti kumoandi tadiciangu, ti ñingaandi leni yaa tiadi n sieni u naa dogu nni.

²⁰ Babilona bado Nebukanesa n den gedini Yeojakimi bijua Juda bado Yekonia, o cancantieba leni Jelusalema yaaba kuli ti yonbidi yaa yogunu Babilona po, li den sua ke o den ñani U Tienu diegu tiadi.

²¹ Li Miali Diedo U Paaciamu Kuli Daano, Isalele Tienu n yedi yaa maama nna yaala n tie yaa tiadi n sieni Li Miali Diedo diegu nni leni Juda bado diegu nni leni Jelusalema nni po:

²² ‹Bi baa gedini tikuli Babilona, tin yaa ye lipo hali yaa yogunu ke n baa mua tipo mi jama. Li Miali Diedo n yedi yeni. N baa gobidi ki goa ki kpenni ti nekanba yaa kaanu n tie na.› » Lani n tie Li Miali Diedo n yedi yaala n yeni.