Jeremi 26 - Gourmanchéma Bible

¹ Yeojakimi, Josiasi bijua Juda bado n dini li bali yaa yogunu Li Miali Diedo den maadi leni Jelemi yaa maama n tie na ki yedi:

² «Mini Li Miali Diedo maadi yaa maama n tie na: Sedi Li Miali Diedo diegu luolu po ki maadi leni yaaba n ña Juda dogi kuli ki baa gbaani ki pugi Li Miali Diedo diegu nni. Ŋan waani ba min puogi a ŋan yedi yaa maama kuli ki da foadi baa mayenma.

³ Daalinba bi baa cengi, yua kuli n ŋa o sanjagindi. Yeni, n baa lebidi min jagi ke n baa tieni ba yaa bonbiadila kelima bi tuongunda po.

⁴ Ŋan yedi ba ke Li Miali Diedo maadi yaa maama n tie na: ‹Yi naa cengi n maama ki baa tieni min bili yaa *balimaama yaa nintuali.

⁵ Cengi mani n naacenba bi sawalipuaba maama bonŋanla min soani yipo yaaba. N tuuni ba yi kani yogunu kuli ki naa cedi ama, yi naa cengi ba.

⁶ N baa soani ku naa diegu tuonli nani min soani Silo yaa tuonli yene. N baa teni ku naa diegu n tua ti solindi bonla ki tinga nibuoli kuli po.› »

⁷ Bi kopadicianba, bi sawalipuaba leni bi niba kuli den gbadi Jelemi n den maadi yaa maama Li Miali Diedo diegu nni.

⁸ Jelemi n den gbeni Li Miali Diedo n den soani o wan yedi yaala li nitaanli yaa yogunu, bi kopadicianba, bi sawalipuaba leni li nitaanli kuli den cuo Jelemi ki yedi o: «A baa kpe, a baa kpe!

⁹ Be yaa po yo ke a pua sawali Li Miali Diedo yeli nni ki tua: ‹Ku naa diegu baa tua nani Silo yeni, fala baa baa u naa dogu ke u kan go yaa pia niba?› » Bi niba kuli den gaani ki lindi Li Miali Diedo diegu nni.

¹⁰ Juda diema koanbala n den ga laabaali, bi den ñani badidiegu ki cua Li Miali Diedo diegu nni kani ki kali bu buliñoapanbu kani Li Miali Diedo kani.

¹¹ Lanwani bi kopadicianba, leni bi sawalipuaba den maadi leni a koanbala yaa maama n tie na: «Se o ja ne n kpe kelima o pua sawalibiado u naa dogu po nani yi tuba n gbadi maama.»

¹² Ama Jelemi den maadi leni a koanbala leni bi niba kuli ki yedi: «Li Miali Diedo soani nni min cua ki maadi yaa maama n pa ku naa diegu leni u naa dogu po nani yin gbadi yaa maama kuli yeni.

¹³ Moala lebidi mani yi tagu leni yi tuongunda. Cengi mani Li Miali Diedo nialu, yeni Li Miali Diedo baa cedi wan bi jagi ke o baa tieni yi yaa bonbiadila yeni.

¹⁴ Min yaa po wani, mini nne tieni nni mani yin bua yaala ki sua ke li dagidi yi nuni po.

¹⁵ Ama yin bandi ke yi yaa kpa nni, yi baa tugi yaa soama n ki pia tagili yi yula po, yinba, u naa dogu leni u niba kuli, kelima moamoani Li Miali Diedo n soani min waani yi laa maama.»

¹⁶ O bado koanbala leni bi niba kuli den yedi bi kopadicianba leni bi sawalipuaba: «O naa ja kan kpe ba. Kelima o maadi leni ti Li Miali Diedo ti Tienu yeli nne.»

¹⁷ U dogu nikpela siiga bi tianba den fii ki maadi leni li nitaanli ki yedi:

¹⁸ «Mise Moeseti yua den pua sawali Esekiasi Juda bado yogunu ki tua Juda yaaba kuli: ‹Li Miali Diedo U Paaciamu Kuli Daano yedi ke Siyono dogu baa tua kuanu. Jelusalema baa kpandi kulinjagbeligu, Li jaandieli juali mo baa tua yaa juali n baa kpandi fuali.›

¹⁹ Naani Juda bado Esekiasi leni Juda yaaba kuli den cuo o ki ku o yo? Naani baa den doagidi ke bi pia li fangili Li Miali Diedo po ki moandi ki baa jiini o pali kaa? Lanwani Li Miali Diedo den cedi wan den jagi ke o baa tieni ba yaala ke li bia yeni. Tinba wani baa tuo ki tuni ti yuli laa janda!»

Yeojakimi teni ke bi ku o sawalipualo Uliya

²⁰ Laa yogunu nitoa moko den pua sawali Li Miali Diedo yeli nni. Lani n tie Semaya bijua Uliya. O den tie Kilijati-Jealima yua. O moko den pua u dogu leni mi diema po yaa sawalo n bia nani Jelemi n den tieni maama yene.

²¹ O bado leni o jakoanda leni o koanbala kuli den gbadi o maama. O bado den moandi ki bua ki kpa o. Uliya n den bandi laa bonla ti jawaandi den cuo o ke o den sani ki gedi Ejipiti diema nni.

²² O bado Yeojakimi den soani Akiboli bijua Elinatani leni nitoaba ke bi den yegi ki gedi Ejipiti diema nni.

²³ Bi den ñani Uliya Ejipiti nni ki cuani o o bado Yeojakimi kani ki ku o leni ki jugisiega ki luni o mi diema niba kula nni.

²⁴ Ama Ahikami bijua Safani den ga Jelemi, ki naa tuo ke bi ŋa o li nitaanli nuu nni ke ban kpa o.