Jeremi 25 - Gourmanchéma Bible

¹ Ban den maadi leni Jelemi yaa maama Juda buolu yaaba kuli po o bado Yeojakimi Josiasi bijua, yua den tie Juda bado, li den tie Babilona bado Nebukanesa bali binkpiali.

² Jelemi n den maadi leni Juda yaaba, Jelusalema yaaba kuli nintuali ki yedi:

³ «Hali Josiasi Amoni bijua Juda bado, piiga n bintaali binli, ki ban tu dinla, piilie n bina taa ke Li Miali Diedo maadi leni nni. N goa ki tiadi yi laa maama ki naa cedi, ama yi naa cengi mo.

⁴ Li Miali Diedo soani yikani o naacenba ki naa cedi, ama yi naa cengi. Yii diadi yi tuba ki cengi moko.

⁵ Bi tua: ‹Yua kuli n ŋa o sangolimu ki cedi yi bontienkaala yaala n bia yeni. Lani n tie yin yaa ka yaa yogu n tu yaa yogu Li Miali Diedo n puni yinba leni yi yaajanba yaa diema nni.

⁶ Yin da ŋoadi i *buli ki yedi ke yi baa yaa kpiagidi i, ki gbaani ki pugi i. Yin da tagi i buli ki bieni n pali, min da ti tieni yi yaala n bia.›

⁷ Ama yi naa cengi nni, yi bua ki bieni n pali ki tagi yi buli ki lingi yi yula po fala. Li Miali Diedo n yedi yeni.»

⁸ Lani n teni ke Li Miali Diedo U Paaciamu Kuli Daano maadi nanda: «Nani yin naa cengi n nialu yeni, mini nne.

⁹ N baa soani ban yini nijienu po yaa niba kuli leni Nebukanesa Babilona bado n naacemo. N baa teni ban cua ki fii ki sedi mi naa diema leni mi niba po leni yaa nibuoli n gaani ki lindi ba kuli po. N baa kpa bikuli cain lan tua gbanankpiendi bonla leni ñuali bonla. Likani mo baa tua diegbengu yaa yogunu kuli po.

¹⁰ N baa teni bi siiga li pamancianli leni i laayieni, togibaa leni toginaa yani, li naali leni ki fidisanga yenma n gbeni.

¹¹ U naa dogu kuli baa tua diegbena, nilo n ki ye naani. Babilona bado baa diedi laa nibuoli kuli bina piilele.

¹² Ama a binpiileleeda yaa pundi n baa fii kelima bi tagili po. N baa fii ki sedi Kalide yaaba yaa diema po moko ki teni man tua diegbena yaa yogu n tu yaa yogu.

¹³ N baa teni min den tuodi ki pua sawali ki yedi ke yaala n baa baa mi naa diema kuli n tieni. Yaala n diani li naa tili nni leni Jelemi n den kpa pua yaa sawalibiado i nibuoli kuli po mo baa tieni.

¹⁴ Kelima yaa nibuoli n pia u paalu leni bi badicianba baa cuo ba ti yonbidi. N baa pa bani moko bi panpaani ki ŋoadi bi nii tuonli.»

Ti buudi tadiñokaaga

¹⁵ Kelima Li Miali Diedo Isalele Tienu maadi nanda: «Tandi ki ga n nuu nni ki naa tadiñokaaga yaaga n gbie leni li pabiencianli daama ki teni min soani a yaa nibuoli kani kuli n ño ma.

¹⁶ Ban ño ma ki yaa jadibi. Bi yama n paagi hali boncianla bi yaa laa min baa soani yaa jugisiega bi siiga.»

¹⁷ N den ga ki tadiñokaaga Li Miali Diedo nuu nni, ki den ñuni Li Miali Diedo n den soani nni yaa nibuoli kani yeni kuli.

¹⁸ Jelusalema leni Juda dogi, li badiba leni li koanbala kuli baa tua diegbendi, lidiga bonla, ñuali leni ti solindi, nani dinla lan tie maama yeni.

¹⁹ Ejipiti bado *Falono, o naacenba, o koanbala leni o niba kuli,

²⁰ nintuali po kuli, Utisi badiba kuli, Filisiti diema badiba kuli, Asikaloni, Gasa, Ekiloni leni yaaba n sieni Asidodi,

²¹ Edomi yaaba, Moabi yaaba, Amoni yaaba,

²² Tili badiba kuli, Sidoni badiba kuli leni mi ñincianma duoli kpendega yaaba,

²³ Dedana yaaba, Tema yaaba, Busa yaaba leni yaaba n yen kugini ki koagidi bi langbiadi,

²⁴ Alabi badiba kuli, nintuali po badiba kuli yaaba n ye mi fanpienma nni baa ño.

²⁵ Simili badiba kuli, Elami badiba kuli, Medi badiba kuli,

²⁶ yaa badiba n ñani nijienu po kuli yaaba n kuu leni yaaba n foagi leni biyaba kuli leni ki tinga nni nibuoli yaaba n ye u tingbanu nni kuli leni Sesaki bado moko baa yuandi ki ño, bi yaa ñuni ki gbeni.

²⁷ Ŋan yedi: «Li Miali Diedo U Paaciamu Kuli Daano Isalele Tienu yedi mine: ‹Ño mani ki gaadi, ki go sii. Baa mani ki da go fii ki sedi yin baa le ke n cuani ki jugisiega yi siiga yaa yogunu!›

²⁸ Bi yaa yie ke bi kan ga a nuu nni ki tadiñokaaga ki ño ŋan yedi ba: Li Miali Diedo U Paaciamu Kuli Daano yedi nanda: ‹Ño mani, ño mani!›

²⁹ Diidi mani ban taagi n yeli yaa dogu yaa niinni yene, ke n baa cedi fala n cili ki baa ba. Naani yinba wani baa cia? Yi moko kan cia! Kelima n yini ki jugisiega ki tinga niba kuli po, Li Miali Diedo U Paaciamu Kuli Daano n yedi yeni.»

³⁰ Fini ŋan pua bipo yaa sawalo n ye kuli ki yedi ba: «Li Miali Diedo fu hali tanpoli po. Hali o *kaangagidiŋamu nni o maadi. O fu leni wan die yaa diema O tangi yaaba n ŋmaadi u datuodikaanu po. O fu leni yaaba n ye ki tinga nni kuli po.

³¹ O fuugu baan pundi hali u tinbianu. Kelima Li Miali Diedo baa jia ti buudi leni i nibuoli. O baa jia ti buudi leni nisaalimiali kuli. O baa teni ki jugisiega n nandi bi nibiadiba. Li Miali Diedo n yedi yeni.»

³² Diidi Li Miali Diedo U Paaciamu Kuli Daano n yedi yaala: «Fala baa tuadi diema ki go baa diema, Hali maama ke ku tafaaciangu baa fii u tinbianu po.

³³ Li Miali Diedo n baa kpa landaali yaaba yeni, baa bibili i kaani kuli. Ki cili u naa tinbianu ki ban tu u naa tinbianu, bi kan ŋanbi bi kuuma, bi kan doagini ba. Bi kan baa piinma. Ama bi baa kpandi ki tua bugidi u tingbanu po.

³⁴ Bi yankpaaba, mua mani, kuudi mani! Baa mani tiipo ki bilini bilini yinba a yangola yankpaaba! Kelima ban baa kodi yi Ki go yadi yadi yi yaa daali yeni cua. Yi baa ŋmadi ki baa ki mumudi nani a boba yeni.

³⁵ Wuonkaanu kan go yaa ye bi yankpaaba po! Yaaba n kpaa ti yandi kan go yaa pia denkaanu.

³⁶ Gbadi mani bi yankpaaba niali, Yaaba n gobidi ti yandi kuudi Kelima Li Miali Diedo pua ki biidi u yankpaakaanu.

³⁷ Yaa yanlola n den pia ti yandi kuli bili suo. Kelima Li Miali Diedo pabiencianli po.

³⁸ O ŋa o diegu nani li yangbanbili n fii ki ŋa o buoli maama yeni. Bi diema kpandi fanpienma kelima yua n bolindi Yaa pabiencianli leni o pali yaali n beni, Ki co nani mi fantama yeni po.»