Jeremi 24 - Gourmanchéma Bible

¹ Li Miali Diedo den teni ke n laa baabuodi lie ke ti pia a kankana, ki bili Li Miali Diedo diegu nintuali. Laa bonla den tieni ki sua ke Babilona bado Nebukanesa den cuo Yekonia, Yeojakimi bijua, Juda bado, Juda koanbala, bi kpagikpiela leni a buliñoaŋanbida ki ñani ba Jelusalema ki gedini ba Babilona.

² Ku baabuoyengu den pia yaa kankana n ŋani nani ya n yen kpa luoni yeni. Ku baabuoliegu mo den pia yaa kankana n biidi hali yaala ke ŋaa pia ŋmanma.

³ Li Miali Diedo den yedi nni: «Jelemi a nua be?» N den goa ki yedi: «A kankana ya n ŋani, wani ŋani hali boncianla. Ya n ki ŋani mo biidi hali boncianla, kaa pia ŋmanma kelima ŋan biidi maama yaa po.»

⁴ Li Miali Diedo go den maadi leni nni mi naa maama:

⁵ Li Miali Diedo Isalele Tienu yedi nanda: «Nani ban den ban tieni maama leni yaa kankana n ŋani yeni, n moko baa diidi leni ki nunmanga ban ñani yaaba ti yonbidi Juda diema nni ki gedini ba Kalide yaaba diema nni yeni.

⁶ N baa diidi ba leni ki nunmanga ki go teni ban guani mi naa diema nni. N baa maa ba, n kan mudi ba. N baa ŋuu ba. N kan ŋabi ba hali abada.

⁷ N baa pa ba mi yanfuoma ki teni ban bandi ke n tie Li Miali Diedo. Bi baa yaa tie n niba, n mo baa yaa tie bi Tienu bi yaa guani n kani leni bi pala kuli.»

⁸ Li Miali Diedo yedi nanda: «Nani ban soani yaa kankana n biidi kaa pia ŋmanma maama, n baa soani Juda bado Sedesiasi leni o koanbala yene ki taani leni yaaba n sieni ki ye Jelusalema leni mi naa diema nni, leni yaaba n sieni mi diema nni leni yaaba n ye Ejipiti diema nni kuli.

⁹ N baa teni ban tua ti jawaanciandi bonla, fala bonla li ŋandunli nibuoli po. Bi baa tua i fe bonla, li ñuali bonla, ti laadi leni ti solindi min baa lu ba naani kuli yaa po.

¹⁰ N baa soani ki jugisiega bi siiga, mi koma leni u yianbiadipuodiko hali ban bodi mi diema nni min den puni bani leni bi baanba yaama yeni niinni.»