Jeremi 23 - Gourmanchéma Bible

¹ Li Miali Diedo yedi: «Fala n baa yaa gobidikaaba n biandi ki go yadi n niba!»

² Lani n teni ke Li Miali Diedo Isalele Tienu maadi leni yaa gobidikaaba n gobidi o niba: «Yi pua ki yadi n niba, Yi deli ba. Yii kubi ba bonŋanla. Diidi n baa fii ki sedi yipo Kelima yi tuona n bia maama po. Li Miali Diedo n yedi yeni.

³ N baa taani n niba yaaba n sieni Min deli ba yaa dogi nni kuli N baa guani ba li yanloli nni. Bi baa maa ki go pugini hali boncianla.

⁴ N baa lingi bipo yaa yankpaaba n baa taa ba ki ban yaa kpaa ba. Bi kan go yaa jie, bi kan go yaa digibi Baa bonyendo kan poadi bi siiga mo.» Li Miali Diedo n yedi yeni.

⁵ Li Miali Diedo yedi: «Diidi a dana kpendi, N baa teni Dafidi buolu nni n maa ki bimoanga. O baa tie yaa bado n tuuni bonŋanla leni mi yanfuoma. Kelima o baa yaa tiendi yaa bujiali n tiegi Ki go tiegi mi diema nni.

⁶ O jama nni Juda diema baa baa mi *faabima Isalele diema baa yaa ye leni mi yanduanma. Diidi ban baa yini o maama: ‹Li Miali Diedo n tie ti *teginma.›

⁷ Li Miali Diedo yedi: Lani n teni ke a dana kpendi Ke bi kan go poli ki yedi: ‹Li Miali Diedo fo, Wani yua teni ke Isalele yaaba ñani Ejipiti diema nni!›

⁸ Ama bi baa poli ki yedi: ‹Li Miali Diedo fo Wani yua ñani ki go guani Isalele buolu yaaba Ban den ye nijienu diema po Leni min den yayadi ba yaa diema buoli nni kuli.› Bi baa yaa ka bi diema nni.»

U Tienu fu leni bi sawalipua-faadanba

⁹ Jelemi den maadi leni bi sawalipua-faadanba ki yedi: «Yinba bi sawalipuaba, N pali biidi cain N gbanu kuli yoaligi N tie nani o dañogaado yeni Nani mi daama n coagi yua yeni, Kelima Li Miali Diedo leni o maama yaama n gagidi ki ŋani po. O yedi nni:

¹⁰ ‹Mi diema kuli gbie leni yaa niba n tiendi mi *conconma. Bi tiini ki caa mi biadima po yo, Bi gbani saagi yaala n ki ŋani tienma po. Lani yaa po n teni ke mi diema kuli ye leni li paboanli, Bi yankpaakaani kuli mo kuodi.

¹¹ Baa bi sawalipuaba leni bi kopadicianba kuli biidi cain. Baa hali n diegu nni n laa bi biadima. Li Miali Diedo n yedi yeni.

¹² Lani n teni ke bi sanu baa yaa ŋaligi ki go biigi. Bi baa ŋmadi ki baa. N yaa fii ki sedi bipo yaa binli, N baa teni mi yebiadima n ŋma ba. Mini Li Miali Diedo n yedi yeni.›

Yaa sawalipuaba n bia ki cie Samali yaaba

¹³ Samali sawalipuaba kane ke n laa ti cagindi. Bi pua sawali o bulo *Baali yeli nni, Ki yaani n niba Isalele yaaba.

¹⁴ Ama Jelusalema sawalipuaba kani, N laa yaa bonla n gundi hali boncianla. Bi pia mi conconma Ki cuoni i boandi nni. Bi paagidi yaaba n tiendi mi biadima pala, Ki baa teni ke oba kan pegidi ki ŋa o biadima. N nuni po bikuli tie nani Sodoma yeni. Jelusalema niba mo nani *Gomola yene.»

¹⁵ Lani n teni ke Li Miali Diedo maadi bi sawalipuaba po ki yedi: «Diidi n baa ñuni ba li mutuoli Ki teni ban ño yaa ñima n pia ti loabidi, Kelima Jelusalema yaa sawalipuaba n teni ke mi diema niba kuli biidi.»

U Tienu tundi ban da cengi bi sawalipua-faadanba

¹⁶ Li Miali Diedo U Paaciamu Kuli Daano, maadi yaa maama n tie na: «Da cengi mani yaa sawalipuaba n pua yipo sawali yeni maama! Bi boandi yi yo. Bi togidi yi bi pala nni bonlekaala. Laa tie yaala n ñani mini Li Miali Diedo ñoabu nni ka.

¹⁷ Bi ñigini ki yedi yaaba n fali nni: ‹Yi baa baa mi yanduanma!› Ki go yedi yaaba n ŋua bi pajuaga mo: ‹Yebiadima kan nandi yi!›

¹⁸ Ŋme n den ye Li Miali Diedo n kali u juogu po yaa yogunu, Ki baa gbadi o maama? Ŋme n faami o maama po? Ŋme n gbadi ma?

¹⁹ Diidi Li Miali Diedo faagu fii Nani u tafaaciangu yeni. O pabiencianli fii Ki jiidi bi nibiadiba po.

²⁰ Li Miali Diedo pabienli kan pegidi ki teli potogu kuli Se li cua ki tieni wan jagi maama o pali nni. Li daali kpendi ke yi baa bandi lan bua ki yedi yaala.

²¹ Mii soani laa sawalipuaba Ke bi nan sani ki gedi. Mii maadi leni ba Ke bi nan pua sawali.

²² N juogu daali bi yaa den ye lienni, Bi den baa fidi ki teni n niba n gbadi n maama, Ki teni ban ŋa bi tagibiadu leni bi tuongunda.»

O Diedo ye i kaani kuli li ŋandunli nni

²³ Li Miali Diedo buali: «Naani n tie yaa Tienu n nua koanma nni bebe yo? Yeni ka, n tie yaa U Tienu n nua foagima moko.

²⁴ Naani o nilo pia wan baa wuoni naani ke n kan le o? Naani mii gbieni ki tinga leni tanpoli kuli?» Li Miali Diedo n yedi yeni.

Da nandi ti kankagidi leni mi bima

²⁵ N gbadi yaa sawalipuaba n pua mi faama n yeli nni ke bi tua: «N dangi! N dangi!»

²⁶ Hali u laa yogunu yo ke laa sawalipuaba Baa yaa baa ki mangidi bi pala mi faama sawalipuama nni? Hali u laa yogunu yo ke bi go baa yaa pua mi faama ki tulindi n niba?

²⁷ Bi moa n niba n sundi n yeli Leni ban togidi biyaba yaa dangidi, Nani bi baanba n sundi n yeli kelima O bulo Baali po maama yeni.

²⁸ Yaa sawalipualo n dangi ti dangidi wan togidi o dangidi. Yaa sawalipualo n gbadi n maama n caa ma bonŋanla. Li Miali Diedo yedi: «Be n taa yenma ti kankagidi leni mi bonbima siiga?»

²⁹ Li Miali Diedo go yedi: «N maama tie nani mi fantama yeni. Mi go tie nani yaa tuatuaga n baa pua ki mudi ku tangu yeni.»

³⁰ Li Miali Diedo yedi: «Lani n teni ke n nani yaa sawalipuaba n su n maama Ki boagidi bi siiga nni!

³¹ N nani yaa sawalipuaba N yaadi bi ñoana ki pua mi faama n yeli nni.

³² N nani yaa sawalipuaba n pua sawali leni yaa dangidi n tie faama. Yaaba n togidi bi dangidi Ki tulini n niba leni bi boandi leni bi yuboanli po. Mii soani ba, mii puogi ba liba. Baa pia fuomaba kuli bi naa niba po. Mini Li Miali Diedo n yedi yeni.»

Naani o Diedo maama tie tugili yo?

³³ Li Miali Diedo den yedi Jelemi: «Li yaa tie ke sawalipualoba yedi a: ‹Li Miali Diedo yedi ke o baa waani be yaa fala yo?› Ŋan goa ki yedi ba: ‹Li Miali Diedo n yedi ke o baa waani yi yaa fala tie ke o baa lu ki diani yi.

³⁴ Li yaa tie ke sawalipualo bi kopadiciamo, bi niloba yaa yedi ke Li Miali Diedo tuni o tugili, mini nba n baa fii ki sedi landaano leni o diegu kuli po.›

³⁵ Lan bi pundi yua kuli n buali o nisaalilielo maama nne: ‹Li Miali Diedo guani be? Li Miali Diedo yedi be?›

³⁶ Ama yi go ñiini Li Miali Diedo n bi jagi yaala yeni. Kelima yaa jagili n ye leni fala baa ŋoadi yua kuli leni o ñoabonli. Yi golindi U Tienu yua n fo maama. Wani yua n tie Li Miali Diedo U Paaciamu Kuli Daano ti Tienu n yedi yeni.

³⁷ Ŋan yedi o sawalipualo: ‹Li Miali Diedo guani a lede? Li Miali Diedo yedi be?›

³⁸ Yi yaa go yedi: ‹Li Miali Diedo jagi yaala n bia!› Li Miali Diedo nan yedi mine: Kelima yi maadi yeni ki tua: ‹Li Miali Diedo jagi yaala n bia!› Ban ki soani ban yedi yi ke yin da go tua: ‹Li Miali Diedo jagi yaala n bia!›

³⁹ Kelima lani yaa po n baa ña yi maama nni cain. Yinba leni u dogu kuli, n baa lu yi foagima min den puni yi yu, yinba leni yi baanba.

⁴⁰ N baa jiini yi yula po yaa jigidima n ki pia gbenma, yaa fe n baa waagi ki ye kaa pia yipo sundima.»