Jeremi 22 - Gourmanchéma Bible

¹ Li Miali Diedo yedi nanda: «Gedi Juda bado diegu nni ki maadi yaa maama n tie na:

² Ŋan yedi daa: ‹Cengi mani Li Miali Diedo maama, fini Juda bado yua n kaa Dafidi bali gbandi po, fini, a koanbala, leni a niba yaaba n kua laa buliñoana kani.

³ Li Miali Diedo yedi nanda: Yin yaa tiendi mi *teginma leni yaa bujiali n tiegi. Faabi mani ban janbidi yaa nilo yua n duoliti o nuu nni.

⁴ Kelima i moamoani, yi yaa tieni nani mi naa maama n yedi yaala, yaa badiba n kaa Dafidi bali gbandi po baa kua ku naa diegu buliñoabu kani. Bi baa yaa jagi bi teliti leni bi taami, bani, bi koanbala leni bi niba ki kua a naa buliñoana kani.

⁵ Ama yi yaa cengi mi naa maama, n poli n yaa yeli nni, mini Li Miali Diedo n yedi ke ku naa diegu baa tua diegbengu.› »

⁶ Diidi Li Miali Diedo maadi yaa maama n tie na, Juda bado diegu po: «A tie npo nani Galaadi yene Bi nani Libani juana tanpojoma yeni. Ama baa leni lankuli n poli apo Ke n baa teni ŋan tua fanpienma, Yaa dogu n ki pia nilo.

⁷ N baa lingi apo yaa niba n baa bolini a. Yua kuli se leni o jatiadi Bi baa pedi a sedili tiidi dasaana ya ŋani hali bonŋanla Ki sia ŋa mi fantama nni.

⁸ I nibuoli boncianla baa tagini u naa dogu kani, Ki buali biyaba: ‹Be n teni ke Li Miali Diedo tieni u dociamu yaala n tie ne?›

⁹ Bi baa goa ki yedi biyaba: ‹Li tie kelima bi ŋa Li Miali Diedo bi Tienu n den kuani yaa *ŋantaado leni ba, ki gedi ki ban gbaani i *buli kani ki pugi i.› »

Mua mani o bado Salumi po

¹⁰ Yinba Juda yaaba da go mua mani o bado Josiasi yua guani po! Da mua mani opo! Mua mani, mua mani ban caani o bado Salumi yua ti yonbidi po, Kelima o kan go guani. O kan go le ban mali o yaa diema nni yeni.

¹¹ Kelima Li Miali Diedo maadi yaa maama n tie na ki yedi: «Josiasi bijua Salumi yua n tie Juda bado po, Yua n den kaa ti gbandi po o baa Josiasi kaanu, N ñani nekanba yeni o kan go guani.

¹² O baa n kpe ban gedini o ti yonbidi yaa diema nni. O kan go le mi naa diema.

U Tienu n fu leni o bado Yeojakimi yaala yaa po

¹³ Fala n baa fini o bado Yeojakimi yua n yaagi ki kandi mi*teginma ki maa a diegu, Ki yaagi ki kandi yaa bujiaba n tiegi, Ki maa a dietuatuadi. Kelima a teni ke a nisaalilieba tuuni fanma fanma ki kan pa ba bi panpaani.

¹⁴ Ŋme n tua: ‹N baa maa n yuli po yaa diegu n yaba hali boncianla Leni yaa dietuatuadi n pia mi fanma boncianla?› A teni ke bi cibi apo a diebona Ki kpaa ki tabini a goana leni sedili tiidi daadi. A boali a diegu yeni leni yaa boaligu n moani.

¹⁵ Naani a tama ŋan pia sedili tiidi daadi boncianla yeni N baa doagidi ke a tie bado? Naani a baa ki den pia li bonjekaala leni li bonñokaala ke li dagidi? Ama o den bani ki go tiendi yaa bujiaba n tiegi. Lani yaa po li bonla kuli den cuoni opo bonŋanla.

¹⁶ O den ja o niñinnilo leni o luodo buudi ke li tiegi. Naani lani ka doagidi ke o bani nni? Moko li bonla kuli den cuoni opo bonŋanla. Li Miali Diedo n yedi yeni.

¹⁷ Ama fini wani, a li lingi a yuceli ŋamu bebe yo. A faadi ki wuli yaaba n ki pia tagili soama. A yaa tugumoangu mo yaba boncianla.

¹⁸ Lani n teni ke Li Miali Diedo maadi yaa maama n tie na, Juda bado Yeojakimi, Josiasi bijua po. O kan baa ban ŋanbi o kuuma ki mua ki yedi: ‹Ŋain n kpiiba mi naa yema te? Ŋain mi naa yema te?› O kan baa ban ŋanbi o kuuma ki mua ki yedi: ‹Ŋain n diedo, mi naa yema te?›

¹⁹ Bi baa piini o nani o ŋunbo yeni Bi baa fuli o ki ñani o Jelusalema dogu buliñoana kani ki ban lu.

Jelusalema laa i fe leni u yualu

²⁰ Do Libani juana po ki kpaani! Kpaani bonŋanla Basana penpeligu po! Do Abalimi juali po ki kuudi Kelima a jaconcona kuli mudi yoap.

²¹ Hali a yema n den mani apo yaa yogunu n den maadi leni a, Ama a den yie ke a kan cengi. A tagu nan li tie yene hali a panma nni Ŋaa cengi n nialu.

²² U faalu baa tugi a gobidikaaba kuli. A jaconcona baa gedi ti yonbidi. Lanwani i fe baa cuo ŋa, A baa le u yualu kelima a biadima kuli po.

²³ Fini yua n ye Libani po Ki kaa a badidiegu yaagu n tii leni sedili tiidi daadi nni, Fala yaa nandi a yaa yogunu, a baa duni boncianla, Ki yaa lu ki lebidi nani yaa pua n bua ki maa yeni!

Yaa maama n ye Yeojakimi bijua Konia po

²⁴ N fo. Li Miali Diedo n yedi yeni. Baa Yeojakimi bijua Konia Juda bado yaa tua ñoagima n jienu nni, N baa pidi ma ki lu.

²⁵ N baa ŋa ŋa leni yaaba n bua ki ñani a miali, Ŋan digibi yaaba yaa nuu nni. Nebukanesa, Babilona bado Leni bani Kalide yaaba yeni nuu nni.

²⁶ Fini leni a naa yua mali a, N baa lu yikuli dielanma nni, yin ki mali naani. Lankane ke yi baa kpe.

²⁷ Ban ban kuani bi yama yaa diema yaa niinni Ki bua ki guani mi niinni yeni, Bi kan go guani mi niinni.

²⁸ Naani Konia tie tiamudingu Yaagu n ki go pia mayule? Naani o tie oba n ki go bua yaa tiagu yo? Be yaa po yo ke bi luni wani leni o puoliŋuani Ban kaa bani yaa diema nni?»

²⁹ Ŋain, n diema, n diema, Cengi Li Miali Diedo maama!

³⁰ Li Miali Diedo yedi nanda: «Baani mani o ja ne nani yua n ki pia bila yeni, Nani yaa ja n kan fidi ki midi yanbu O yema nni yeni. Kelima o puoliŋuani siiga oba kan fidi Ki kali Dafidi bali gbandi po Ki diedi Juda diema.»