Jeremi 21 - Gourmanchéma Bible

¹ Li Miali Diedo n den teni yaa maama o sawalipualo Jelemi o bado Sedesiasi po. O bado den soani Malikia bijua Pasehuli Maaseja yaa bijua o kopadiciamo Sofoni, Jelemi kani ki mia o ke wan

² bu bipo Miali Diedo kelima Nebukanesa, Babilona bado tiendi bu toabu leni ti. Daalinba Li Miali Diedo leni o bancianma baa todi ti ki teni wan foagidi leni ti.

³ Jelemi den goa ki yedi ba: «Yin goa ki ban yedi Sedesiasi ke

⁴ Li Miali Diedo Isalele Tienu yedi nanda: ‹N baa pegidi yin kubi yaa jatiadi yi nuu nni ki koani leni Babilona bado leni o niba Kalide yaaba bani yaaba n gaani ki cebini yi diema yeni ki kuani li jatiadi u dogu tugu nni ki koani leni yi.

⁵ Mini nba n baa koani leni yi, ki doagidi n fidu leni n paaciamu, leni li pabiencianli leni mi jama.

⁶ N baa pua u naa dogu niba leni li yandi kuli. U yianbiadipuodiko n baa je ba.›

⁷ Li yaa puoli mini Li Miali Diedo n yedi: ‹N baa taa Juda bado Sedesiasi, o koanbala leni u naa dogu niba kuli bu toabu leni mi koma n dini ki ŋa yaaba, ki ŋa ba Babilona bado Nebukanesa leni yibalinba, leni yaaba n bua ki ñani bi miana nuu nni. Bi baa bolini ba, Nebukanesa kan gbadi bi niñima. Niloba kan cia. O kan juogi ba.› »

⁸ Li Miali Diedo go puogi Jelemi yaa maama n tie na Jelusalema niba po: «Diidi n bili yi nintuali li miali leni mi kuuma sani.

⁹ Yua ye u naa dogu nni bu toabu, mi koma bi u yianbiadipuodiko n baa je o. Ama yua n baa ña ki gedi ki ban teni o yuli Kalide yaaba, yaaba n cua ki baa yi yeni, baa yaa ye leni li miali.

¹⁰ Kelima n fii ki sedi u naa dogu po, ki baa tieni u yaala n bia, ki nan kan tieni u yaala n ŋani. Mini Li Miali Diedo n yedi yeni. N baa ŋa u Babilona bado nuu nni wan juu u leni mi fantama.»

Yaa laabaalo n ye badidiegu niba po

¹¹ Yaa maama n tie na tie Juda bado diegu yaaba yaa po yo: Cengi mani Li Miali Diedo maama!

¹² Dafidi diegu yaaba, Cengi mani Li Miali Diedo maama! Li Miali Diedo yedi nanda: «Yaa tiendi mani mi *teginma yaa yogunu kuli. Faabi mani ban janbidi yua, Yaa nilo n duoliti o nuu nni. Lani n tie n pali n da ti fii ki be nani mi fantama yeni, Ki cuo maama ke bi kan fidi gbindi ma Kelima yi tuona n bia maama po.»

¹³ Li Miali Diedo yedi: «Moala wani mini leni yinba ti lielie dige, Yinba yaaba n kaa ku tangu po ki tua: ‹Ŋme n baa fidi ki jiidi ki taani ti nekanba? Ŋme n baa fidi ki cua ki baa ti nekanba?›

¹⁴ N baa fii ki yie yipo. Nani yi bontienkaala n tie maama, N baa cuoni yi sedili tiidi fuali nni mi fantama Yaama n baa sia yaala n gaani ki lindi yi kuli. Li Miali Diedo n yedi yeni.»