Jeremi 20 - Gourmanchéma Bible

¹ Imeli bijua Pasehuli yua n den tie kopadiciamo ki tugi Li Miali Diedo diegu cenli ŋamu maama den gbadi Jelemi n pua yaa sawali.

² Lanwani Pasehuli den pua Jelemi ki kpaa o ti kpaadi Benjamina buliñoabu yaabu n yuugi ki cie Li Miali Diedo diegu nni.

³ Ama lan den fii ki faa, Pasehuli den cua ki ñani Jelemi kpaadi. Jelemi den yedi o: «Li Miali Diedo ki puni a Pasehuli yaa yeli ka, ama o yini a “jawaanciandi i kaani kuli.”

⁴ Li Miali Diedo yedi nanda: ‹Diidi bi baa ŋa ŋa leni ti jawaanciandi, fini leni a danlinba kuli. Bi yibalinba jugisiemu baa je ba a nunbu nni. N baa teni Babilona bado n diedi Juda yaaba kuli ki taa bi tianba ki gedini ba Babilona, ki ban kpa bi tianba leni ki jugisiega.

⁵ N baa taa u naa dogu niba n pia yaala kuli, ban soani ki baa yaala kuli, ban pia yaala ke li tie bonmoanla kuli, leni Juda badiba ŋalimano kuli, ki teni bi yibalinba likuli. Bi baa fagi ki wodi likuli ki tugi ki gedini Babilona po.

⁶ Fini Pasehuli mo leni yaaba n ye a diegu nni kuli, yi baa gedi ti yonbidi Babilona. A baan kpe lipo ban piini a, fini leni a danlinba ŋan den pua yaaba yaa po mi sawali-faama yeni.› »

Jelemi yenbidi

⁷ A baa nni, Li Miali Diedo N mo cedi ke a baa nni. A cuo nni ki paadi nni. Yogunu kuli n laadi u yualu, Yua kuli ñuadi nni.

⁸ Min baa maadi yaa yogunu kuli Se min kpaani. N yen tua: «Tugumoangu leni mabinga bebe.» Li Miali Diedo maama po teni ke n tie daali kuli i fe leni ti laadi bonla.

⁹ N yaa yedi ke n kan go maadi o maama Ke n kan go maadi o yeli nni, Li yen nani mi fantama n ye n pali nni ki co yeni, Ki didi go ye n kpaba nni mo yeni. N coagini n yuli ke n baa yaa kubi mi maama yeni, Ama n kan fidi.

¹⁰ N gba bi niba boncianla maadi npo ti mayuodi. Bi tua: «Jawaanciandi i kaani kuli.» Bi ne tua: «Tin daadi ki sieni o mani!» Bi tianba tua: «Yeni de, tin daadi ki sieni o mani!» Baa n danlibuadiba li lingi n ciinu yo, Ki sugini ki cuo o nni n tagili nni. Lanwani bi soabidi ki tua: «Ti baa cuo o Ki tu o ti panpaani!»

¹¹ Li Miali Diedo tie npo nani o jakoandimoano Lani n teni ke yaaba n fii npo baa tuudi ki baa. Bi kan paadi. I fe baa cuo ba leni ban gbali maama. Li baa tua yaa fe n baa waagi ki ye kaa pia sundima.

¹² Fini Li Miali Diedo U Paaciamu Kuli Daano biigidi o niteginka. O nua yaa yanjaga leni yaa yantiana n wuo. N baa le ŋan baa tu ba bi panpaani maama, Kelima n cua ki piani n yuli fini yaa kani.

¹³ Yiini mani Li Miali Diedo po, Pagi mani Li Miali Diedo Kelima wani n faabidi taliga miali Yaaba n tiendi mi biadima nuu nni.

¹⁴ Min mali yaa daali n bia fanma! N naa n mali nni yaa daali n tua solindi!

¹⁵ Ti solindi n jiidi yaa ja n cua Ki puni n baa laa laabaaliŋamo, Ki waani o ke o baa bonjaga, Ki teni ke o pali mangi yeni po.

¹⁶ Laa daali n tua nani Li Miali Diedo n bolini Yaa dogi kaa gbadi ipo niñima yeni! Lin gbadi i moe ku tiŋaagu Leni a bubula u yensicocolu!

¹⁷ Be teni ke waa teni ke n kpe n naa tugu nni? Yeni, n naa n den baa tua n kuli, O kan den maa nni.

¹⁸ Be teni ke n ñani n naa tugu nni, Ki baa le fala leni ku coagingu bebe, Ke n miali yema dana kuli baa n juodi fe nni?