Jeremi 2 - Gourmanchéma Bible

¹ Li Miali Diedo teni nni yaa ñoabonli n tie na:

² «Gedi mani ki ban kpaani ki yedi Jelusalema yaaba: Li Miali Diedo yedi nanda: ‹Fini Jelusalema, n baa tiani ŋan den tie jafaano, Ki pia npo yaa buama, Ŋan den ŋua nni mi fanpienma po, Leni yaa tinga yaa niinni n ki pia bonpudikaaliba yaa yogunu.

³ Isalele, a den li ye mini Li Miali Diedo bebe yaa po yo. A den tie n bonbaakaala kuli yaa bonkpiala. Yaaba n den ŋmani la kuli den kua i tagili nni, Mi yebiadima mo den yen ŋma ba. Li Miali Diedo n yedi yeni.

⁴ Yinba Jakobo puoliŋuani, Cengi mani Li Miali Diedo maama Isalele yaaba nibuoli.

⁵ Yi yaajanba laa n kani i laa tagile Ki sani ki foagidi leni nni? Be n teni ke bi baan taani ki tu ñoabu Leni yaala n ki pia mayuli, Ki tua biba fanma?›

⁶ Baa buali bi yula ki yedi: ‹Li Miali Diedo yua n teni ke ti ñani Ejipiti diema yeni ye le yo? Wani yua n gobidi ki gedini ti mi fanpienma nni, I tiali leni ti buodi diema nni U yialu leni li *biigili tinga nni Yaa tinga ke nisaalimialiba ki poandi ki niinni.›

⁷ N cuani yi ti tiidi n dua yaa diema nni Ke yin baa ki ŋmani yaa bonluonkaala n mani, Ama yi cua ki teni ke n dogu *joagini Yi teni ke n faali diema kpandi ki tua cagindi bonla.

⁸ Bi kopadicianba naa buali: ‹Li Miali Diedo ye le?› Yaaba n kubi li *bali maama ki bani nni, Bi gobidikaaba ki tegini npo, Bi sawalipuaba pua sawali o bulo *Baali yaa yeli nne. Bikuli sani ki pugi yaa *buli n kan midi yanbu Ki naa pia fuomaba mo.

⁹ Lani n teni n baa jia ti buudi leni yi. N baa jia ti buudi leni yi bijaba yaa bijaba. Li Miali Diedo n yedi yeni.

¹⁰ Gedi mani Kitima boanjaali po ki diidi. Soani mani a tonda Kedala po Ki ban noanli bonŋanla Ki ban diidi lilie yaa ye.

¹¹ Naani li pia yaa diema n ŋa mi buli baa ke yii tie Tienu? Ama yinba wani ŋa mini U Tienu Yua n tie yi kpiagidi ki ŋua i buli.

¹² Tanpoli pali n biidi kelima lani yaa po. Digibi mani, kuodi mani Li Miali Diedo n maadi.

¹³ Kelima n niba tudi figilima lie Bi ŋa mini, yua n tie Li Miali ñinbunli yeni Ki gbini bi yula po yaa ñinbuodi n lugidi lugidi, Ki kan fidi ki kubi ñima.

Li bia hali boncianla ki ŋa Li Miali Diedo

¹⁴ Naani Isalele niba tie yonbi? Naani n mali ba ti yonbidi nne? Li nan ga lede ke bi fagi ba?

¹⁵ Ti yangbanbidi fii ki sedi bipo ki duni Ki mua mi jama ki duni Ki cuani mi diema po li paboanli. Niba ki go ye ban juu bi dogi yi yeni niinni.

¹⁶ Baa Memifisi leni Dafine niba cua Ki kuo bi yula.

¹⁷ Isalele, naani laa bonla ki tieni a Kelima a ŋa Li Miali Diedo a Tienu Yaa yogunu ke o den gobidi a o sanŋamu nni kaa?

¹⁸ Moala mo a tiendi be yo Ejipiti sanu nni? Naani a baan ño u kpenciamu Nili ñima yo? A go tuuni be Asili sanu nni? Naani a baa n ño u kpenciamu Yufilata ñima yo?

¹⁹ A biadima n nandi a A janbi n nandi a. Diidi ki le lan bia ki go gundi maama Ki ŋa mini Li Miali Diedo a Tienu Ki da go pia npo fangiliba kuli. Li Miali Diedo U Paaciamu Kuli Daano n yedi yeni.»

Isalele kan kali kaanyendu ki go conbi

²⁰ Hali yogu n den mudi a landili Ki cie a baabi yi n luo ŋa. Ama a yedi: «N bua ki diedi n yuli.» Die yaa juaga n kpedi kuli po Leni yaa tibu n bundi moko kuli tinga A kpaagi ki buandi nani li poconconli yeni.

²¹ N nan den ŋuu ŋa Nani duven tiidi kuanu yu ŋani bonŋanla Ki tie duven bonŋanmoano tiidi buolu. Li ga lede ke a biidi cain ki tua tilanbu Ke a bonluonkaala mo bedi?

²² Baa a yaa bi wuu leni mi cieñima, Ki tuuni leni mi jiama boncianla A tagili baa yaa baa ye n nintuali. N Diedo Li Miali Diedo n yedi yeni.

²³ A ban tieni lede ki yedi: «Mii joagini, Mii pia *ŋantaado leni o bulo Baali ŋoadima.» Diidi a taabuona ku joaloangu nni, Ki tuo ŋan tieni yaala Fini ki yuoyuoñuaga yaaga n puagi ki lindi!

²⁴ Li fuali nni ŋunñuaga yaaga n maani mi fanpienma Ki bua ti cagindi ki gaani u faalu Ŋme n baa fidi ki sieni ki bobidu. Yaaba n lingi ga kuli, kan lingi ga ki coagi bi yula. Ki yaa pudi yaa yogunu bi baa le o.

²⁵ Ŋan moandi ki da gedi taapiena Ki da tuo ñunñuunu mo n kuodi a nialu. Ama a yedi: «Lebidima kan go tieni, Kelima n bua bi canba yegimu!»

²⁶ Nani ban yen pigini li conconli i fe n cuo li maama yeni, Moko, i fe cuo Isalele yaaba, bani bi badiba, Bi koanbala, bi kopadicianba leni bi sawalipuaba yene.

²⁷ Bani yaaba n tua ku daagu: «A tie n baa!» Ki tua li tanli mo: «A mali nni!» Kelima bi teni nni bi cakodigu, ki naa diidi nni. Bi yaa ye mi yebiadima nni bi yen yedi: «Fii ki faabi ti.»

²⁸ Ŋan tagi a yuli po yaa buli yeni kuli ye le? Ban fii bi yaa fidi ki faabi ŋa fala daali Kelima Juda, a buli yaba ki pundi a dogi.

²⁹ Be yaa po yo ke yi ja leni nni ti buudi Ki fii npo leni mi yiema? Mini Li Miali Diedo n yedi yeni.

³⁰ N pua yi bijaba fanma fanma bebe Bi naa gaani tundi. Nani yaa yangbanli n bolindi yeni Yi ku yi sawalipuaba yene.

³¹ Yinba mi naa nifiima yaaba, Kpaagi mani Li Miali Diedo maama po. Naani n tua Isalele po fanpienma bi biigili diema yo? Be yaa po yo ke n niba tua: «Ti die ti yula, tii bua ki guani a kani?»

³² Naani o jafaano baa sundi o tiabobikaadi po? Naani toginaa baa sundi o bobidi? N niba wani nan sundi npo yaa dana n ki pia bianu.

³³ A bani ŋan baa tagini yaa sanu ki lingi mi buama, Ki teni ke a tagigolimu n tua bangima.

³⁴ A luoda leni yaaba n ki pia tagili Kuli soama ye a tiadi po, Ke a naa ludi ba ke bi bua ki pua Ki luodi a dieli buliñoabu ka.

³⁵ Baa leni lani kuli, A goa ki yedi ke ŋaa pia tagiliba kuli, Ke o pabienli n pegidi ki leli potogu ki cedi a. N baa jia leni a ti buudi kelima a yedi: «Mii tieni *tuonbiadi.»

³⁶ Be yaa po yo ke a baa tieni li naa bonla kuli, Ki baa lebidi a sanu? Ejipiti diema baa janbi a Nani Asili diema n janbi a maama yeni.

³⁷ Lankani moko a baa ña ki tugi a nii a yuli po Kelima Li Miali Diedo ñani a ŋan dugi yaaba yaa po. A kan ŋmani bikani liba mo.