Jeremi 19 - Gourmanchéma Bible

¹ Li Miali Diedo yedi nanda: «Gedi o maado po ki ban da li cuali ki yegi leni li nitaanli nikpela leni bi kopadicianba nikpela.

² Ŋan yuandi ki ñani a tancacala buliñoabu po, yaabu n goa Beni-Hinomi joaloangu po. Lankani a baa waani ba min baa puogi a ŋan waani ba yaa maama.»

³ A baa yedi ba: «Juda diema badiba leni Jelusalema yaaba, cengi mani Li Miali Diedo Isalele Tienu, U Paaciamu Kuli Daano n yedi yaala: ‹N baa teni mi yebiadima n cua u naa kaanu, hali ke yua n gbadi li laabaalo kuli tuba n womi.›

⁴ Kelima bi ŋa nni ki teni ke u kaanu ne ki go pia bandima. Bi padi likani i *buli po a *dugibila, bi baanba leni Juda badiba leni bani biba n ki den bani yaa buli. Bi gbieni u naa kaanu leni yaaba n ki pia tagiliba kuli soama.

⁵ Bi maa i buli pada kaani ke yi kpedi Ki taa bi bijaba ki padi a padijuukaana o bulo *Baali po. N naa den puni ba laa sanu, Mii den maadi ba laa maama, Mii den baa li yanjagili mo.

⁶ Li tie lani yaa po ke Li Miali Diedo yedi ke a dana kpendi, Ke u naa kaanu kan go ti yaa yi “Tofeti” bi “Beni-Hinomi joaloangu”. Bi baa yaa yi likani “li kukpali joaloangu”.

⁷ Lankane n baa bolini Juda leni Jelusalema yaaba juogu. N baa teni bi yibalinba yaaba n ki gba niñima yeni jugisiemu n kpa ba. N baa teni i yobili leni i tanboe n ŋmani bi tinkpiba.

⁸ N baa teni u naa dogu n tua i jeje leni li ñuali bonla. Yaaba n baa tagi laa dogu kani kuli Baa jie lan paki ba, ban go ñuadi u mo. Kelima wun laa yaa fala kuli po.

⁹ Kelima bi yibalinba yaaba n ki gba niñima Leni yaaba n sedi bi miana po n baa paagi bi yama maama po, Baa teni ban ŋmani bi bijaba leni bi bisiaba gbanandi. Yua kuli baa ŋmani o yieninlielo gbanandi.»

¹⁰ A baa mudi li cuali yaaba n yegi leni a nintuali ki yedi ba:

¹¹ «Li Miali Diedo U Paaciamu Kuli Daano yedi: N baa mudi bi naa niba leni u naa dogu yeni Nani o maado n mudi li cuali maama Ke li naa go pia ŋanbima yeni. Bi baa yaa piindi bi tinkpiba Tofeti Kelima piinkaanu kan go yaa ye potogu.

¹² Li Miali Diedo yedi ke o baa tieni yene leni u naa dogu leni yaaba n ye u niinni kuli. N baa teni laa dogu n nandi leni Tofeti.

¹³ Jelusalema diedi leni Juda badiba diedi Baa tua yaa kaani n *joagini nani Tofeti po yeni. Li baa tua yene laa diedi kuli po, Ban den juugi yaadi yaa yula po a dugibila tanpoli ŋmaali po, Ki go cabini a ñincaba i nilanbuli po yeni.»

Bi kpaa Jelemi ti kpaadi

¹⁴ Jelemi den ñani Tofeti ki guani Li Miali Diedo n den soani o naani ke wan ban pua sawali. N den gedi ki ban sedi Li Miali Diedo diegu luolu nni ki yedi yaa niba n den taani likani kuli:

¹⁵ Li Miali Diedo U Paaciamu Kuli Daano, Isalele Tienu yedi mine: «N baa teni min den maadi yaa yebiadima maama yeni n ŋma u naa dogu leni wun die yaa dogi kuli.»