Jeremi 18 - Gourmanchéma Bible

¹ Li Miali Diedo den maadi leni Jelemi ki yedi:

² «Fii ki gedi o maado deni, n baa maadi leni a.»

³ N den gedi o maado deni ki sua ke o kaa ki tuuni o tuonli.

⁴ Wan maa yaa tiagu yaa den tuo, kelima o maado nuu nni li yen tua yeni yogunuba leni ku yoagu. O yen goa ki maa tiatoagu nani wan bua maama.

⁵ Lanwani Li Miali Diedo den maadi leni nni ki yedi:

⁶ «Yinba Isalele yaaba, naani n kan fidi ki tieni yi nani o naa maado n tieni maama yeni. Mini Li Miali Diedo yedi: ‹Nani ku yoagu n tie maama o maado yaa nuu nni yeni, yimoko tie n nuu nni yene.

⁷ Yogunuba n yen maadi leni yi nibuoluba, bi diemaba maama ke n baa ŋabi, ki pua, ki go bolini.

⁸ Li yaa tie ke min maadi yaa nibuolu yaa maama yeni cedi yaa biadima n den fiini n pali yeni, n yen lebidi n yama leni min bi jagi ke n baa waani ba yaa fala.

⁹ Yogunuba mo, n yen yedi ke n baa maa ki ŋuu nibuoluba, bi diemaba.

¹⁰ Ama laa nibuolu yaa tieni yaala n gundi npo ki naa cengi n nialu, n yen lebidi n yama, leni min bi jagi ki tieni bipo yaa ŋanma.›

¹¹ Maadi moala leni Juda yaaba leni Jelusalema yaaba ki yedi ba: Li Miali Diedo yedi: ‹Diidi n bogidi yipo mi yebiadima. N pia min jagi yipo yaala. Goa ki lebidi mani yi sanyuodi. Lebidi mani yi bontienkaala nni.›

¹² Ama bi yedi: ‹Suginma ki ye! Kelima ti baa ŋoadi ti yanjaga. Yua kuli baa ŋoadi o pajuagijagindi.› »

Isalele sundi o Diedo

¹³ Lani n teni ke Li Miali Diedo yedi nanda: Buali mani i nibuoli siiga, Ŋme n kpa gbadi laa bonla buolu? Isalele soani yaa tuona n gundi boncianla.

¹⁴ Naani Libani juana ya n kpedi boncianla po baa luo ñinguankaama? Naani yaa ñima n puubi ki kuugi, Ki ña a juana po baa ñuudi faala po? Kalam!

¹⁵ Ama n yaa niba wani nan sundi npo Bi padi i *buli po a *dugibila. Bi cenli nni bi yen tuudi bi sani nni, Ban den maani ki tagi yaa sankpeli yeni nni. Bi goa ki ŋoadi yaa sani ke baa koadi ki bili.

¹⁶ Bi teni ke bi dogu kpandi ki tua ti jawaandi bonla Leni li ñuali bonla. Yaaba n tagi likani kuli ti jawaandi leni li pakili cuo ba Ke bi fegini bi yula.

¹⁷ N baa yadi ba nani puoli faalu yeni yibalinba nintuali. N baa buli ba n nunga, Fala n baa ŋma ba yaa daali yeni.

Bi juogi ki bua ki kpa Jelemi. Jelemi jaandi

¹⁸ Lanwani li den baa yaa niba n den yedi: «Cua mani tin juogi ki baa tin baa Kuani Jelemi naani! Kelima li *bali maama kan kpe ke bi kopadicianba ye Tundi kan gbeni ke bi yanfodanba ye, Sawali kan gbeni ke sawalipuaba ye. Cua mani tin kpa o leni mi maama, Tin da cengi o mayedikaama.»

¹⁹ Li Miali Diedo, faami npo bonŋanla, Gbadi npo n yibalinba n tua yaala!

²⁰ Naani mi biadima n baa pa mi ŋanma panpaani? Ama bani wani gbini ku buogu ki baa ñani n miali. Tiadi ke n cua ki sedi a nintuali Ki baa maadi ki ŋanbi bipo, Ki teni a pabiencianli n da nandi ba.

²¹ Lani yaa po ŋan teni mi koma n nandi bi bijaba. Ki kodi ba leni ki jugisiega. Teni bi puoba n luo a bila Ban tua kpepuona Mi kuuma n nandi bi ciaba Bi jawaaba mo n kpe bu toabu po.

²² Teni ban gbadi ke a bubula fii ki loli bi diedi nni, Bi nibiadiba n gedi leni bi jatiadi ki baa ba yaa yogunu. Kelima ban gbini yaa buogu npo yeni po. Bi dia nni i taali ki bua ki cuo nni.

²³ Fini Li Miali Diedo bani ban lu yaa janbi kuli Ki bua ki kpa nni. Ŋan da tuo ki tieni sugili bi biadima po. Ŋan da duuni ki ñani bi *tuonbiadi a nintuali. Ban yaa jadibi a nintuali! Fii ki sedi bipo a pabienli daali!