Jeremi 17 - Gourmanchéma Bible

¹ Juda diema yaaba tagili diani leni ki celiga yo, Ki diani bonŋanla leni diama tanli. Li diani yi pala nni leni yi *padibinbinli joma po.

² Yeni, yi bila baa tiadi bi padibinbina po, Leni bi bulo *Akela daadi po yaadi n kuu Leni yaa tiidi n bundi bonŋanla a joabila po,

³ Leni a joaciama ya n ye li fuali nni yula po. Juda diema yaaba, N baa teni ban fagi Yi piama leni yi ŋalimani kuli, Kelima yin tieni yaa *tuonbiadi mi diema nni kuli po, Bi baa fie ki taani leni yi juana po padibinbina kuli.

⁴ Yinba yiba n baa ŋa min den puni yi yaa diema. N baa taani ki teni yin tua yi yibalinba yonbi Yin kaa bani yaa diema nni Kelima yi teni ke n pabienli tua nani mi fantama yene. Mi baa yaa co yogunu kuli.

⁵ Li Miali Diedo yedi nanda: «Ti solindi n yaa ye yua n dugi o nisaalilielo po, Ki taa o jigi kuli ki bili o nisaalo kani, Ki foagidi leni Li Miali Diedo!

⁶ O tie nani yaa fatuuga n ye u tialu nni. O kan baa yemanmaba kuli. O yekaanu n baa tie mi fanpienma tana siiga, Yaa tinga n tie lianli nni Nilo n ki ye naankani.

⁷ Li seli ye leni yua n dugi Li Miali Diedo po, Ke Li Miali Diedo mo n tie o suginma!

⁸ O tie nani ban ŋu yaa tibu u kpenu kani, Ke bu jiini tandi ki ban pundi ku baagu nni. Laa tibu naa bani ke wulugu ye. Bu faadi mo kan mali abada. U tayialu binli, bu yama naa yagini. Bu go baa yaa baa luoni bu bonluonkaala mo.

⁹ O nisaalo pali goli ki cie bonla kuli Li naa pia ñoagu mo. Ŋme n baa fidi ki bandi li ki gbeni?

¹⁰ Mini Li Miali Diedo n biigidi a pala, Ki bandi yaala n ye o nilo yantugu nni, Ki baa guani yua kuli nani o sanbila n tie maama, Ki pa yua kuli mo o panpaani nani o tuona n tie maama.»

¹¹ Nani yaa ñuñuuga n wugini wan kaa ŋa yaa jena, Li tie yene leni yua baa piama ke laa tiegi. O baa tuadi ki baa o panma siiga. O miali yema juodima po mo wan tua yanluodaano.

O Diedo bebe n tie li miali ñiali

¹² Bi tua: «Ti jaandieli tie nani yaa bali kalikaanu n pia ti kpiagidi boncianla yeni. Li jagi yaa juali n kpedi po hali mi cilima.

¹³ Li Miali Diedo, fini Isalele suginma Yaaba n ŋa ŋa kuli baa le i fe. Yaaba n foagidi leni nni kuli baa kpe. Kelima bi ŋa Li Miali Diedo yua n tie li miali ñinbunli.»

Jelemi jaandi

¹⁴ Li Miali Diedo paagi nni, lani n tie min paagi. Faabi nni, lani n tie min faabi. Kelima fini n tie n pagidi!

¹⁵ Bi yedi nni: «Li Miali Diedo maama ye le? Man cua ne naa!»

¹⁶ A bani ke mini wani naa yie ke n baa tua yankpaalo ki yaa ŋua ŋa. A bani ke mii den mia Ke fala daali na n cua. Yaa maama n ña n ñoabu nni kuli ye a nintuali.

¹⁷ Ŋan da tua yaala n jiendi nni Fini yua n tie n wuonkaanu fala daali yeni!

¹⁸ Teni i fe n cuo yaaba n sedi npo. Ama mini wani n da fiagi, Teni ban digibi, Ama mini wani n da digibi. Teni fala daali n cua bipo Teni fala buoli lie n taani ki cuo ba yenma.

Fangi mani mi fuodima daali

¹⁹ Li Miali Diedo maadi leni nni nanda: «Gedi ki ban sedi bi niba buliñoabu kani Juda diema badiba n tagi naankani leni Jelusalema dogu niba n kua yaa buliñoana kani.»

²⁰ Ŋan yedi ba: «Cengi mani Li Miali Diedo maama Juda bado, Juda diema kuli, Jelusalema dogu niba kuli yaaba n kua a buliñoana kani.»

²¹ Li Miali Diedo yedi mine: «Fangi mani yi yula! Yin da tugi tugikpiagili mi *fuodima daali. Yin da kuani Jelusalema buliñoana kani tugikpiagili.

²² Yin da ñani tugikpiaga yi diedi nni mi fuodima daali. Yin da soani tuonliba mo. Gagidi ki ŋanbi mani mi fuodima daali Nani min puogi yi baanba maama yeni.

²³ Ama yi baanba yeni naa den cengi, Baa diadi bi tubili, Bi juagi bi pala Kelima baa bua ki gbadi ki go ga mi bangima.»

²⁴ Li Miali Diedo yedi: «Cengi mani bonŋanla! Mi fuodima daali yin da tugi tugikpiagili Ki poandi u dogu buliñoana kani. Gagidi mani ki ŋanbi laa daali npo. Da soani tuonliba kuli laa daali.

²⁵ Yaaba n baa tagi u naa dogu buliñoana kani tie bine: Bi badiba yaaba n kaa Dafidi bali gbandi po, Ki jagi bi taami leni bi teliti Ki taani leni bi koanbala leni Juda niba leni Jelusalema yaaba. Lanwani u naa dogu baa yaa pia bi niba yaa yogunu kuli.

²⁶ Bi niba baa ña Juda dogi leni yi n gaani ki lindi Jelusalema, Benjamina diema dogi, Sefela po li juali leni niganu po yaaba. Bi baa cuani a padijuukaana, a pada, bu paabu, a *dugibila leni i tuondi pada Li Miali Diedo diegu nni.

²⁷ Ama yi yaa cengi nni, ki naa gagidi ki ŋanbi mi fuodima daali ki tugi a tugikpiaga ki nan tagini ki kua Jelusalema buliñoana kani mi fuodima daali, lanwani n baa juu u dogu buliñoana mi fantama. Mi baa buoni Jelusalema badidiedi, ki nan kan gbindi mo.»