Jeremi 15 - Gourmanchéma Bible

¹ Li Miali Diedo den yedi nni: «Baa Musa leni Samueli yaa cua n kani, N yama kan guani bi naa niba kani. Deli ba ban foagidi n kani Ban yaa caa!

² Lanwani bi yaa yedi a: ‹Ti baa gedi le?› Ŋan guani ba: Li Miali Diedo yedi nanda: Mi kuuma n je man baa je yua, Bu toabu n je bun baa je yua, Mi koma n je man baa je yua, Ti yonbidi mo n taa tin baa taa yua!

³ N baa fii ki sedi bipo leni fala buoli naa: ‹Li Miali Diedo n yedi yeni Bu toabu baa cua ki kpa ba, I sangbanli n cua ki ŋmani, I yobili leni i tanboe mo n cua ki ŋmani ki go bolini ba.

⁴ N baa teni lan tua jawaanciandi bonla ŋanduna tinbuona kuli po. Laa bonla baa tieni kelima Juda bado Esekiasi bijua Manase N den tieni yaala Jelusalema dogu nni kuli po.› »

Li Miali Diedo pali beni ki kandi

⁵ Li Miali Diedo yedi: «Jelusalema, oba kuli kan gbadi a niñima. Oba kuli kan mua apo. Oba kuli kan gbegi baa ki buali yaala n pia ŋa.

⁶ A sundi npo! A buli nni a nunga! Lani n teni ke n tandi n nuu ki baa bolini a. N gbadi Jelusalema po mi niñima ki coagi.

⁷ N baa lendi ba ki yayadi ba mi diema nni. N baa muni ba a bila, Ki teni n niba yaaba n naa lebidi ki ŋa bi sani yeni n bodi.

⁸ N teni ke bi kpepuona yabidi Ki cie mi ñincianma tanbiili. N teni ke mi yebiadima ŋma o jakoando naa u yensicocolu. N teni ke ti yanyagidi leni i yanbani cua ki ludi o yenma.

⁹ Yaa pua n mali jaba lele coagi, O baa kpe. U yienu baa baa ke li nan da li baa yiene. I fe gbadi o bonŋanla, i fe cuo o. Yaaba n sieni, n baa ŋa ba leni ki jugisiega bi yibalinba nintuali. Mini Li Miali Diedo n yedi yeni.»

Jelemi fu, U Tienu doagidi opo cain wan puogi o yaala

¹⁰ N naa, kelima ŋan mali nni yeni po, Ke mi yebiadima ŋma nni. Mini n tie mi diema kuli po, Yua fiini mi niama leni ku fuugu. Mii dini panli, mii teni nitoa mo panli, Ke bi niba kuli nan solini nni.

¹¹ Li Miali Diedo yedi: «Naani mii den faabi a, A yema ŋamu po kaa? Naani mii den pua yibali apo, Fala leni li paboanli yogunu?

¹² Naani ti kuboandi baa kua? Naani nijienu kudi leni ti kumoandi baa kua?

¹³ Ŋan tieni yaa *tuonbiadi kuli mi diema nni po, N baa teni ban fagi a ŋalimano leni a piama kuli.

¹⁴ N pali fii yipo nani yaa fantama cuo ki baa juu yeni. N baa teni yibalinba n gedini yi yin kaa bani yaa diema nni.»

¹⁵ Fini Li Miali Diedo a bani likuli Tiadi npo, todi nni Tu npo n panli leni yaaba n wangi nni fala. Da kpa nni, fini yua yaa pali n ki be tontoni. Bandi ke n laa i fe buoli kuli kelima a yaa po.

¹⁶ N yaa li gbadi a maama kuli, N li yen ga ma hali bonŋanla. A maama yeni mani ki go nuagi npo bonŋanla, Kelima fini Li Miali Diedo U Paaciamu Kuli Daano n die nni. A yeli mo ye n niinni.

¹⁷ Mii gedi ki ban kali a ñuañuada siiga ki baa jeli. Kelima a paaciamu teni ke n ye n bebe A den teni ke n pali beni boncianla.

¹⁸ Be n teni ke n fala ki pia gbenma? Be n teni ke n nali mo kan soangi? Li naa bua ki paagi yo? Naani a baa yaa tie npo yogunu kuli li pabiidili bonla yo? Naani a baa go tie npo nani yaa ñima n ki pia ŋan dugi mipo yeni yo?

¹⁹ Lani n teni ke Li Miali Diedo maadi nanda: «A yaa guani n kani, N baa goa ki taa ŋa, Ŋan yaa tuuni npo.» A yaa paadi yaala n pia li mayuli leni yaala n ki pia, A baa yaa tie nani n ñoabu yeni, Bani n baa guani a kani, Laa tie fini ka n guani bikani.

²⁰ N baa teni ŋan tua bi naa niba po kumoanguonli. Bi baa tieni leni a bu toabu. Ama bi kan paadi a, Kelima n ye leni a, Ki baa faabi a, ki go kubi a. Mini Li Miali Diedo n yedi yeni.

²¹ N baa faabi a leni bi nibiadiba, N baa faabi a leni ku tugumoangu danba.