Jeremi 14 - Gourmanchéma Bible

¹ Li Miali Diedo n den maadi leni Jelemi u tayialu yogunu yaa maama n tie na:

² «Juda diema ye leni li paboanli Mi diema dogi coagi, Ki ye leni li paboanli ki kaa tiipo. Jelusalema bubula fii ki loli.

³ Bi paatieba tuuni taliginba u kpenu po Ke ban ban kabidi mi ñima. Bi fii ki gedi a caana po, baa ban baa ñima. Bi guani denpo leni bi coakuoma, I fe leni i tagili cuo ba ke bi libini bi yula.

⁴ Ki tinga pudi ki yagidi Kelima taaga ki go ye mi diema nni. Bi kpakpaaba jigi cie, baa bani ban kuandi bi yula naani.

⁵ Baa ku muagu nni ki boaliga Yen maa o biga ki ŋa ga. Kelima moasoangidi ki ye.

⁶ I fuaŋunbi jagi a juana po Ki gaani u faalu nani i tanboe yeni. Bi nuni noanlima pia mi niñima kelima muadi ki ye.»

⁷ Bi yedi: «Ti tagili yaba ki pendi. Li tie moamoane. Ama fini Li Miali Diedo, baa ŋan baa tieni yaala Ke a yeli n da fiagi. Ti tudi apo hali boncianla. Ti tieni apo ti *tuonbiadi.

⁸ Fini yua n tie Isalele dugidi A tie gaapo li paboanli daali. Li ga lede ke a tie nani yaa caano N cua mi diema nni ki baa pendi yeni? Li ga lede ke a tie nani yua caa u dogu Ki tii o gbandieli ki baa duani ku ñiagu bebe po yeni?

⁹ Be n teni ke a tie nani yaa ja yaa pali n biidi yeni Nani yaa jakoando n kan fidi ki faabi oba kuli yeni? Baa leni lankuli, Li Miali Diedo, a ye ti siiga, Ti taagi a yeli. Ŋan da lu ki diani ti.»

¹⁰ Li Miali Diedo yedi bi naa niba yaa maama n tie na: «Bi faadi ti puagidi Bi kan fidi ki kali kaanyendu.» Li Miali Diedo ki ye leni ba. Moala o tiadi bi tagili po Ki waani ba fala bi tuonbiadi po.

¹¹ Li Miali Diedo yedi nni: «Da jaandi bi naa niba po Da jaandi bi ŋamu po.

¹² Baa bi yaa loli bu ñoabu n kan cengi bi paboandanmoe. Baa bi yaa cuani a padijuukaana leni bu paabu pada N kan cengi ba kelima n baa teni bu toabu, Mi koma leni u yianbiadipuodiko n dudi ba.»

¹³ N den goa ki yedi: «Ŋain Li Miali Diedo, diidi bi sawalipuaba tua ba Ke bi kan le toabu, Koma mo kan cuo ba. Ama nekanba yo ke n baa pa ba mi yanduanmoanma.»

¹⁴ Li Miali Diedo den yedi nni: «Bi sawalipuaba pua mi faame n yeli nni. Mii soani ba, Mii puogi ban yedi liba. Mii maadi leni ba mo. Bi pua mi faama ke bi laadi li bonla Bi tuonli n tie baayuadiidu leni *buli ŋoadima bebe yaaka, Bi pala nni boandi yo ke bi taani ki pua yipo sawali.»

¹⁵ Lani n teni ke Li Miali Diedo yedi nanda: «Yaa sawalipuaba n pua mi faama Ke mii soani ba ki tua ke toabu kan cua mi naa diema nni, Ke koma mo kan tieni. Baa leni lankuli, bu toabu leni mi koma n baa bolini ba.

¹⁶ Ban pua yaaba yaa po sawali, Mi koma leni bu toabu Baa bolini ba Jelusalema sani nni, Bi kan baa yua n baa doagini ba mo. Bani bi puoba, bi bijaba leni bi bisiaba, N baa teni bi biadima n jiidi bi yula po.»

¹⁷ Yedi ba yaa maama n tie na: «N mua ku ñiagu leni u yensiinu ki naa cedi, Kelima u nafanu pua n niba. Laa yebiadima pa hali boncianla.

¹⁸ A yaa gedi ku muagu po, Diidi bu toabu n dini yaaba nne. Min didi kua u dogu nni mo, Mi koma n teni ke yaaba n yiagi nne. Baa o sawalipualo leni o kopadiciamo Goadi mi diema nni ke li paki ba.»

¹⁹ Naani a luni ki diani Juda cain yo? Naani a pali kuli fa Siyono po bii? Be yaa po yo ke a pua ti Ke gaapo naa ye tipo? Ti bi daani mi yanduanma, Ama bonŋanliba kuli ki ye. Ti den daani laafia, Ti jawaandi bebe n cua ki taani ti!

²⁰ Li Miali Diedo, ti tuo ti biadima, Leni ti baanba tagili, Kelima ti tieni ti tuonbiadi.

²¹ A yeli yaa po ŋan da faligi ti. Da fali a bali kalikaanu kpiagidi Tiadi ŋan kuani leni ti yaa *ŋantaado, Ki yaa kubi o bonŋanla.

²² Naani i nibuoli buyuodi siiga pia yaa bulo n baa fidi ki teni ki taaga n mii? Ti tawadi yaadi n kpendinni ki taaga ye le? Naani laa tie fini Li Miali Diedo ti Tienu kaa? Ti dugi apo, kelima fini n tiendi laa bonla kuli.