Jeremi 13 - Gourmanchéma Bible

¹ Li Miali Diedo den maadi leni nni nanda ki yedi: «Gedi ki ban da *len gaali gbanñagidigu ki taa gu ki yie a ciaga nni. Ŋan da pagini gu mi ñima nni.»

² Nani Li Miali Diedo n den yedi nni maama yeni, n den da ku gbanñagidigu ki ñagini n ciaga.

³ Li Miali Diedo go den goa ki maadi leni nni mi liema ki yedi:

⁴ «Taa ŋan da yaa gbanñagidigu ke ku ñaagi a ciaga nni, ki gedi u kpenciamu Yufilata po ki ban wuoni gu li tanli tinga.»

⁵ N den gedini ki ban wuoni gu nani Li Miali Diedo n den yedi nni maama.

⁶ Lan den waagi, Li Miali Diedo den yedi nni: «Fii ki gedi Yufilata po ki ban taa min den teni ke a wuoni yaa gbanñagidigu yeni.»

⁷ N den gedi Yufilata po ki ban lingi ki laa, ki taa ku gbanñagidigu min den wuoni gu naankani. Ama ku gbanñagidigu den biidi, ki naa go den pia fuomaba kuli.

⁸ Li Miali Diedo den maadi nni yaa maama n tie na:

⁹ «Li Miali Diedo yedi nanda: Min baa bolini Juda japaadi maama n yeni. N baa tieni Jelusalema japaaciandi mo yene.

¹⁰ Laa nibiadiba n yie ke bi kan cengi n maama. Bi ŋua bi pajuaga, ki ŋua i *buli ki gbaandi ki pugi yi. Ban tua nani ku naa gbanñagidigu yaagu n ki go pia fuomaba kuli yeni!

¹¹ Li Miali Diedo yedi: ‹Moamoani nani ban yen loli ku gbanñagidigu Ki ciaga nni maama yeni, N moko den taa Isalele yaaba kuli leni Juda yaaba kuli Ke ban tua n niba, n yeli, n pagidi, leni n jilima, Ama bi naa cengi nni.› »

Mi daama leni U Tienu pabienli

¹² Ŋan yedi ba yaa maama n tie na: «Li Miali Diedo Isalele Tienu yedi ke ti gbandayuadi kuli baa gbie leni mi daama. Bi baa yedi a: ‹Naani tii bani ke ti gbandayuadi kuli baa gbie leni mi daama?›

¹³ Lanwani ŋan yedi ba: ‹Li Miali Diedo maadi yaa maama n tie na: Diidi n baa teni mi naa diema niba kuli, bi badiba yaaba n kaa Dafidi bali gbandi po, ki tie o puoliŋuani, bi kopadicianba, bi sawalipuaba, leni Jelusalema niba kuli baa ño mi daama hali ki gaadi.›

¹⁴ Mini Li Miali Diedo yedi ke n baa taa ki pua ba leni biyaba ban mumudi ki taani bi bidanba leni bi bila kuli. Oba kan cia, o kan gbadi bi niñima. Pu kan teni ke o kan bolini ba.»

Cengi mani ke u yogunu daa pendi

¹⁵ Cengi mani, diadi mani yi tuba! Cedi mani ti japaadi! Kelima Li Miali Diedo n maadi!

¹⁶ Kpiagi mani Li Miali Diedo yi Tienu Hali ke o daa teni ke li *biigili cua, Hali ke yi taana daa tuudi li biigili juali, Yi baa guudi mi yenma, Wan go lebidi man tua biigicianli. O baa teni man tua tawaligu yaagu n biigi boncianla.

¹⁷ Yi yaa cengi line, n baa buudi ŋasiili nni, Kelima yi japaadi po. N baa wuli ti ninsiidi N baa mua boncianla kelima bi baa gedini Li Miali Diedo niba ti yonbidi.

U Tienu n pia yaa maama badidiegu po

¹⁸ Yedi o bado leni o badipua: «Kali mani tiipo! Yi badifogiliŋanga cibidi ki baa.

¹⁹ Bi luoni niganu po dogi. Oba kuli ki ye yua n baa luodi i. Bi gedini Juda diema yaaba kuli ti yonbidi.»

²⁰ Yaadi ki diidi a yibalinba yaaba n ñani nijienu po ki kpendi. Min bi piani ŋa yaa niba yeni Ŋan bi jigini a yuli yaaba yaa po yeni ye le?

²¹ A baa yedi be ŋan den tama ke yaaba n tie a danlinba yaa ti cua Ki pua ki paadi a ki diedi a yaa daali? Li baa koani a nani u maditugukoanu n yen cuo yaa pua n baa maa maama yeni.

²² A yaa yedi a pali nni: «Be teni ke line tieni nni?» A tagilibiadi po n teni ke a tiadi kaadi ki doni Ke a taajentindili poagili boncianla.

²³ Naani Etiopi yua baa fidi ki lebidi o boanu? Naani o naamunpieno wani baa fidi ki lebidi o gbanu lega? Naani yinba wani n maani ki tieni yaala n gundi yeni, Yi go baa fidi ki tieni yaala n ŋani?

²⁴ N baa yayadi ba Nani mi fanpienma faalu n yen yadi ti muadi maama yene.

²⁵ Yaala n baa tieni a n yeni. Min bili apo yaala n yeni. Mini Li Miali Diedo yedi: «Nani ŋan sundi npo, Ki dugi mi faama po yeni,

²⁶ N baa kaadi a kpalibu hali ki ban yilini a nunga, Ki teni ban le a mubima.

²⁷ N laa a *conconma, yaama n ñiidi leni a cagindi kuli. A juana yuli po leni i kuani nni, Fala jagi a yuli po Jelusalema, Fini yua n ki ŋanbidi aba! Laa tuongunda baa gbeni be yogunu yo?»