Jeremi 12 - Gourmanchéma Bible

¹ Li Miali Diedo a tiegi ki kandi hali yaala ke n kan fidi ki bu leni a. Ama baa leni lani kuli n bua ki maadi a a buudi maama. Be n teni ke bi nibiadiba bonla kuli cuoni bipo? Be n teni ke bi yama dua bi yema nni, Bani i janbi danba yeni?

² Fini n ŋuu ba. Bi faadi ki pia i jiini. Bi bundi bonŋanla ki luoni li bonluonkaala. A yeli li ye bi ñoabu nni yogunu kuli, Ama bi pala wani foagi leni a.

³ Fini Li Miali Diedo, a bani nni A nua nni, a bani yaala n ye n pali nni. Nani ban ñani yaa pe ki baan kodi yeni Piadi ki sieni ba mi kodima daali po.

⁴ Hali u laa yogunu yo Ke mi diema baa yaa baa ki ye mi kuuma paboanli nni? Hali u laa yogunu yo ke i kuani mo yaa muadi baa kuodi? Mi diema niba biadima po Ti yandi leni i nuani kuli bodi. Bi yedi: «O kan fidi ki bandi yaala n faadi ki ye tipo.»

⁵ A yaa tiini leni a taana danba Ke bi coagini a, A baa tieni lede ki niagi leni i taami? A yama yaa dua yaa dogu n ye mi yanduanma nni bebe, A baa tieni lede Judana boanjaana yaa duodi yaa yogunu?

⁶ Kelima a kpiiba bani biba moko, Leni a baadiegu nni yaaba se apo leni i janbi. Bani biba ŋua a puoli po ki kuudi Ŋan da daani ba, baa ban maadi apo yaa mamanma kuli.

U Tienu luni o diegu leni o niba

⁷ N ŋa n diegu N ŋa n faali N ŋa n yibalinba nuu nni Min den bua yaala leni n pali kuli yeni.

⁸ N faali tua npo nani o yangbanlo li fuali nni yeni. O yie npo ki duni hali boncianla. Lani n teni ke mii go bua li.

⁹ N faali tie npo nani o kaabo Ke o lieba kuli taani ki bua ki je o yeni. Gedi mani ki ban taani ku muagu nni yandi kuli Ki cuani ti mi jaanjiema po.

¹⁰ Bi yankpaaba boncianla jugi n duven tiidi kuanu Bi ŋma ŋma n kuanu Bi teni ke n koaŋamu kpandi ki tua fanpienma nilo n ki ye naani.

¹¹ Bi teni ke u kuanu yeni kpandi diegbendi. U ye leni mi kuuma paboanli, U kuanu yeni naa go pia mayuli baa waamu. Mi diema kukuli ye leni li paboanli. Oba mo ki yagini o yama lipo.

¹² Mi fanpienma sani nni kuli, Yaaba n bua ki bolini kpendi na. Li Miali Diedo jugisiega bolindi mi diema Ki cili kaliyendu ki ban puodi u kaliyu. Niloba kuli ki pia laafia.

¹³ Bi buli *ŋalikama Ki baa yendi i konkoni. Bi den coagini bi yula fanma bebe, laa baa yuli. Naani, i fe ki pia yi ti naa kpaandi po? Kelima Li Miali Diedo pabiencianli po yo ke o tieni yi laa bonla.

Li Miali Diedo leni Isalele yieninlieba

¹⁴ Li Miali Diedo yedi mine Isalele yieninlieba yaaba n ki ŋani yeni po, Bani yaaba n fie min puni n niba Isalele yaaba yaa tinga. Diidi n baa ñani ba bi tinga nni. N baa ŋabi ki ñani Juda buolu bi siiga nni.

¹⁵ Ama n yaa ŋabi ba yaa yogunu Se mi niñima n goa ki cuo nni bikuli yendo yendo po, Min goa ki guani ba yua kuli o tinga nni, Yua kuli o diema nni.

¹⁶ Bi yaa bangi n niba sani, Bi yaa poli n yeli nni ki yedi: «Li Miali Diedo fo!» Nani ban bangi n niba ke bi polini o bulo *Baali yeli nni maama yeni, Lanwani bi baa guani, Ki kali n niba siiga.

¹⁷ Ama bi yaa cengi puu kuli N baa dadi ki ŋabi laa nibuolu. N baa ŋabi li nibuolu ki teni wun kpe. Mini Li Miali Diedo n yedi yeni.