Jeremi 11 - Gourmanchéma Bible

¹ Li Miali Diedo n den maadi Jelemi yaa maama:

² Cengi mani ti *ŋantaado maama, Ki waani Juda leni Jelusalema niba.

³ Ŋan yedi ba ke Li Miali Diedo Isalele yaaba Tienu maadi nanda: «Ti solindi n yaa ŋua yua n naa cengi o naa ŋantaado yaa maama,

⁴ Min den kuani yaa ŋantaado leni yi baanba, Min den ñani ba Ejipiti diema nni yaa daali, Ban den ye yaa buaga yaa niinni. N den yedi ban cengi n nialu ki tieni min yedi yaala kuli. Yeni yi baa tua n niba N mo baa tua yi Tienu.

⁵ Lanwani n baa kubi n ñoanianu Min den niani yi baanba yu yeni Ke n baa pa ba mi naaŋanma leni ti siadi n dua yaa diema nni, Nani yin di nua maama dinla.» N den goa ki yedi: «Lan tua yeni Li Miali Diedo!»

⁶ Li Miali Diedo den yedi ke min kpaani laa maama kuli Juda dogi nni leni Jelusalema sani nni ki yedi: «Cengi mani o ŋantaado nne maama ki tieni wan yedi yaala!

⁷ Hali min ñani yi baanba Ejipiti diema nni yaa daali Ki ban taa ki pundi dinla, Yaa yogunu kuli n li baa maadi leni ba ki tua: ‹Cengi mani n nialu.›

⁸ Ama baa cengi, Baa diadi bi tuba ki cengi. Yua kuli ŋoadi o pajuagijagindi. Lani n teni ke n mo fii ki tieni bipo Laa ŋantaado n den pia yaa buudi Min den yedi ban kubi ki go tieni yaala Ke bi yie kaa tieni yeni.»

⁹ Li Miali Diedo den yedi nni: «Jelusalema leni Juda diema yaaba siiga Pia ban juogi ki baa tieni yaa janbi.

¹⁰ Bi lebidi ki guani bi yaajanba *tuonbiadi kani. Bani yaaba n den yie ke bi kan cengi n maama, Ki ban ŋoadi butoe Ki baa kpiagidi yini yeni. Isalele diegu yaaba leni Juda diegu yaaba biidi, Min den kuani yaa ŋantaado leni bi baanba.»

¹¹ Lani n teni ke Li Miali Diedo yedi mine: «N teni ke fala n nandi ba. Bi kan fidi ki cia, Bi baa mua ki yaa diidi nni N mo nan kan cengi ba.

¹² Juda dogi leni Jelusalema yaaba gedi Ki ban mia ban padi yaa *buli a *dugibila, Ama bi nan kan fidi ga ba bi fala daali.

¹³ Fini Juda, a buli yaba ki pundi a dogi. Fini Jelusalema, a padibinbina Ŋan juugi a dugibila o bulo *Baali po naankani, Yaba ki pundi a sani.»

¹⁴ Fini, da jaandi laa niba po Da kpaani ki mia bipo, da jaandi bipo. Kelima mii cengi ba, bi yaa miadi n todima bi yebiadima po.

Isalele n tie Li Miali Diedo olifie tibu

¹⁵ Li Miali Diedo yedi: «Min bua yaa niba naa pia yantugupiengu. Bi cua ki baa tieni be n diegu nni? Naani bi tama ban niani yaa ñoaniani Bi ban padi npo yaa pada yeni N baa teni ke mi yebiadima kan nandi ba? Bi tama ke lani n baa teni ban cia?

¹⁶ Mini Li Miali Diedo n den puni n niba yaa yeli n tieni na: ‹*Olifie tibu yaabu yaa fabunli leni bu bonluonkaala ŋani.› Ama i tatantani siiga n baa juu bu faadi mi fantama, Ki kua bu beni mo.

¹⁷ Li Miali Diedo U Paaciamu Kuli Daano n den kaani o niba lankani. Wani n den teni ke mi yebiadima ŋma ba Kelima Isalele yaaba leni Juda yaaba n den tieni yaa biadima po. Bi den bieni o pali ki padi o bulo Baali po a dugibila.»

Jelemi diegu nni yaaba n fii ki sedi opo

¹⁸ N bandi la kelima Li Miali Diedo n waani nni la, Lani n teni ke n bandi bi tuada.

¹⁹ N den tie nani yaa pebiga yaa yama n dingi Ke bi caani ga u kodikaanu po yeni. Mii den bani ban den pia npo yaa yanjaga. Bi den tua: «Tin bolini bu tibu leni bu bonluonkaala, Tin ñani o bi nisaaliba siiga Ban da go taa o yeli moko!»

²⁰ Ama Li Miali Diedo tie yaa bujialo n tiegi Yua bani bi niba yantugudi bonŋanla. N baa le ŋan baa tu i panpaani maama Kelima n cua ki buni fine n maama.

²¹ Lani n teni ke Li Miali Diedo maadi nanda ki yie Anatoti yaaba po. Bani yaaba n bua a kuuma Ki tua: «Da pua sawali Li Miali Diedo yeli nni. Lani yaaka tinba n baa kpa ŋa.»

²² Lani yaa po yo ke Li Miali Diedo U Paaciamu Kuli Daano maadi mi naa maama: «Diidi mani n baa yie bipo. Ki jugisiega baa je bi jawaaba Mi koma mo n baa je bi bisiaba leni bi bijaba kuli.

²³ Bi siiga nni oba kan sieni Kelima n baa teni mi yebiadima n ŋma Anatoti yaaba Min baa fii ki sedi bipo yaa binli.»