Jeremi 1 - Gourmanchéma Bible

¹ Jelemi yua n den tie Hilikiya Anatoti kopadicianba siiga yendo, Benjamina diema yua maama n tie na:

² Li Miali Diedo den maadi leni o Juda bado Josiasi Amoni bijua yogunu o piiga n bintaali ti gbandi po.

³ O go den maadi leni o Juda bado Josiasi bijua Yeojakimi n den kaa ti gbandi po yaa yogunu, ki taa Josiasi bijua Sedesiasi bali piiga n binyenli juodima, ki ban pundi hali ban gedini Jelusalema yaaba ti yonbidi o cimuulo nni.

U Tienu yini Jelemi ke wan cua ki tua o soaginka

⁴ Li Miali Diedo den maadi leni nni mi naa maama:

⁵ «Hali ke n daa tagi a a naa tugu nni, n den tuodi ki bani a. Hali ke a daa ñani a naa tugu nni, n den gandi a ki gagidi ki ŋanbi a, ki dini a mi diema buoli sawalipualo.»

⁶ N den yedi: «Ŋain n Diedo Li Miali Diedo, mii bani maama, Kelima n da tie bonwaaga.»

⁷ Lanwani Li Miali Diedo den yedi nni: «Da yedi ke a tie bonwaaga, Kelima min baa soani a ŋan ban yie yaaba yaa po kuli, A baa gedi. N yaa yedi ŋan ban yedi yaala kuli mo a baa n yedi lane.

⁸ Da jie ba kelima n ye leni a Ki baa faabi a. Mini Li Miali Diedo n yedi yeni.»

⁹ Lan yuandi Li Miali Diedo den tandi o nuu ki sii n ñoabu ki yedi: «Diidi n kuani n maama a ñoabu nni.

¹⁰ Diidi, dinla n kaani a mi diema nni leni i nibuoli kani Ke ŋan ŋabi ba, ki pua ki lu, ki teni ban kpe, Ki bolini, ki maa ki go ŋuu.»

¹¹ Lanwani Li Miali Diedo den buali nni: «A nua be yo Jelemi?» N den yedi: «N nua yaa tibu n yen jaligi ki puudi yaa benu.»

¹² Li Miali Diedo den yedi: «A laa bonŋanla, kelima n moko Baa tuodi ki tieni n maama n yedi yaala.»

¹³ Li Miali Diedo go den maadi leni nni mi liema ki yedi: «A nua be yo?» N den guani o: «N nua bobili ke li pu loabiloabi ki goa nijienu po.»

¹⁴ Lanwani Li Miali Diedo den yedi nni: «Nijienu po yo ke mi yebiadima Baa cili yaaba n ye mi diema nni kuli po.

¹⁵ Kelima diidi daa, N baa yini mi diema yaaba, Yaaba n goa nijienu po kuli. Bikuli baa cua ki kali bi bali kalikaani po Jelusalema dogu buliñoabu kani Ki gaani ki lindi i naa bilini Yi n ye Juda dogi nintuali kuli.

¹⁶ N baa jia laa buudi leni ba Kelima bi biadima po, Kelima bi ŋa nni ki juu a *dugibila i *buli po, Ki gbaani ki pugi bi nii n tagi yaala.

¹⁷ Amo, ŋan fii ki ñagini a ciaga ku gbanñagidigu. Fii ki yedi min baa puogi a yaala kuli. Ŋan da digibi bi nintuali, Lani n tie min da ti teni ŋan digibi bi nintuali.

¹⁸ Diidi dinla yaa daali n puni a u paalu Nani u dopaalu, li kudasaali leni ti kumoandi bilinu yeni, Likuli baa yie Juda badiba po, bi koanbala po, Bi kopadicianba po ki taani leni mi diema yaaba kuli po.

¹⁹ Bi baa fii ki sedi apo, Ama bi kan fidi ki paadi a Kelima n ye leni a ki baa faabi a. Mini Li Miali Diedo n yedi yeni.»