Jaki 1 - Gourmanchéma Bible

I fuondi

¹ Mini Jaka, U Tienu leni o Diedo Jesu Kilisiti naacemo, n diani yinba i piiga n buoliedi yi n yayadi ki ye ŋanduna nni kuli po. N fuondi yi bonŋanla.

Li dandanli leni mi yanfuoma

² N kpiiba, yin yaa nua mani ke yaa biigima buoli kuli n cua yikani tie pamanli bonla.

³ Kelima yi bani ke yi *dandanli biigima baa cuani li juunli.

⁴ Ama li tie tiladi ke li juunli n yaa tuuni li tuonli ki dudi cain, ke yin tua yaaba n ŋani ki dagidi cain ki da luo liba kuli.

⁵ Yi siiga niloba yaa luo mi yanfuoma, wan mia U Tienu yua n puuni bi niba kuli leni ti bulicindi kaa fu leni ba, o baa pa o ma.

⁶ Ama wan mia leni li dandanli, ki da bangi o yaa baa baa bi o yaa kan baa. Kelima yua n maliti ke daalinba o kan baa tie nani mi ñincianma ñinguona, u faalu n lengidi ki pengi ya yeni.

⁷ Yaa nilo n tie yeni kuli n da tama ke o baa baa liba kuli o Diedo kani.

⁸ Kelima o tie yama lie daano, waa se kaanyendu o bontienkaala kuli nni.

Mi luoma leni mi piama

⁹ Ti kpiiba siiga yua n tie luodo n yaa mangidi o pali boncianla leni U Tienu n jigini o maama.

¹⁰ Yua n tie piado mo n yaa mangidi o pali leni U Tienu n jiini o maama, kelima o baa pendi nani ti muadi puuma yeni.

¹¹ U yienu pudi ke u wulitonma teni ke ti muadi kuodi ke ti puuma mo suodi, tin pia yaa jawaama mo bodi. O piado moko baa mali ki suodi yene o ŋantaadi siiga.

Mi biigima leni mi tulinma

¹² Li pamanli ye leni yua n fidi ki juuni mi biigima nni. Kelima bi yaa biigi o ki pagi o yaa yogunu, o baa baa li miali badifogiliga, o Diedo n niani ke o baa pa yaaba n bua o kuli yaaga.

¹³ Ban tulini o nilo yaa yogunu, wan da yedi: «U Tienu n tulini nni.» Kelima bi kan tulini U Tienu wan tieni yaala n bia, wani oba mo kan tulini niloba kuli.

¹⁴ Bi tulini nilo kuli wani oba bonbuaka-biadila yaa dia o ki cuo o yaa yogunu.

¹⁵ Lanwani, o bonbuaka-biadila yaa punbi, li baa maa ti*tuonbiadi. Ti tuonbiadi mo yaa kpedi ki dagidi, tini mo baa maa mi kuuma.

¹⁶ N kpibuadiba, yin da boandi mani yi yula yaa maama n tie na po:

¹⁷ Li semoanli leni yaa paabu n ŋani kuli ñani tanpoli po, mi yenma Baa kani, wani yua n ki lebidi, ke lebidima jinjingu mo ki ye o niinni.

¹⁸ O yanbuama po, o den mali ti kelima i moamoani maama yaa po ke tin yaa tie o tagima kuli siiga li bonkpiala.

Ki tieni U Tienu maama n yedi yaala

¹⁹ N kpibuadiba, yin bandi line: Li pundi nilo kuli n cengi tontoni, ki da maadi tonma, ki da bieni o pali tontoni mo.

²⁰ Kelima o nisaalo pabienli kan cuani U Tienu *teginma.

²¹ Lanwani yin lu mani yaala n tie ti *joagindi leni mi biadima kuli, ki yaa gaani U Tienu n buli yaa maama yi pala nni leni li yumiinli, kelima mi baa fidi ki tindi yi naani.

²² Yin da cengi U Tienu maama bebe, ki boandi yi yula ke mi cengima yeni dagidi, kali yin yaa tiendi man yedi yaala mo.

²³ Yua n cengi U Tienu maama ki naa tieni man yedi yaala tie nani yua n nua o nunga n tie maama ki maduubiga nni,

²⁴ ki ñani ki gedi ki sundi tontoni wan tie maama.

²⁵ Ama yua n nuali bonŋanla yaa balimaama n ŋani cain ki faabidi bi niba yaa niinni, ki suagi ki tiendi yeni kaa sundi wan cengi yaala, ki tiendi man yedi yaala, laa nilo baa baa li seli wan tiendi yaala kuli nni.

²⁶ O nilo yaa tama ke o jaani, ki naa kubi o lanbu, o boandi o yuli. Laa nilo yaa jaanma tie fanma fanma.

²⁷ Yaa jaanma n ŋani cain ki naa pia joagindi ti Baa U Tienu nintuali tie, ki yaa todi a kpienbila leni a kpepuona bi fala nni, ki go kubi o yuli leni ŋanduna joagindi.