Hebilunba 6 - Gourmanchéma Bible

¹ Lanwani tin cedi Kilisiti maama bangicilikaama, ki suagi ki pundi yaa bangima n tie yaaba n kpedi ki dagidi yaa po. Tin da go pu yaa tanpuupanli n tie: Ki lebidi ki ŋa yaa tuona n baa cuani mi kuuma leni li *dandanli U Tienu po

² leni mi *batisima bangima, leni i nii maanma, leni bi tinkpiba fiima leni yaa buudi n baa yuandi ki cua.

³ Lani n tie tin baa suagi ki tieni yaala U Tienu yaa tuo.

⁴ Yaaba n den baa ke U Tienu yendi ba yenma, ke bi leni yaa paabu n ñani tanpoli po, ki taani leni yaaba n baa o U Tienu Fuoma Yua,

⁵ ki leni ki bandi U Tienu maama n mani maama, ki go bandi yaa yogunu n kpendi yaa paalu,

⁶ bani yaa yaadi, li kan tuo yanlebidima n yaa go ye bipo. Kelima bani biba go joani U Tienu Bijua li *dapoanpoanli po, ki go fiagi o a sala nni.

⁷ Yaa tinga n baadi ke ki taaga mi boncianla yaa pudi yaala n pia mi fuoma yaaba n ko ga po, laa tinga baadi U Tienu seli.

⁸ Ama ki yaa pudi i konkoni leni muadimalikoni, kaa pia fuoma. Bi kan waaginni ke bi soli ga, ki go juodi ke bi juu ga.

⁹ Ama n buakaaba, baa ke ti maadi yeni, ti bani cain ke yi se u sanŋamu nni yaala n tie mi *tindima yaa po.

¹⁰ U Tienu tiegi. O kan sundi yin den tieni yaala ki doagidi yi buama opo leni yin den todi bi *nigagidiŋanba ki go baa todi ba maama.

¹¹ Ti bua hali bonŋanla ke yi siiga yua kuli n go yaa pia li yankuali yeni hali mi juodima yogunu, ke yin baa yin sugini yaala kuli cain.

¹² Tii bua yin yaa tie kpadijedanba, ama yin yaa togidi yaaba n baadi U Tienu n niani yaala kelima li dandanli leni li juunli yaa po.

U Tienu ñoanianu tie ñoaniandugiko

¹³ U Tienu n den niani Abalahama u ñoanianu yaa yogunu, o den poli ke o baa kuani u. Oba n ki ye ki cie o yeni, o den taa wani oba yaa yeli ki poli

¹⁴ ki yedi: «Moamoani n baa seligi a ki yaa pugidi a puoliŋuani.»

¹⁵ Abalahama n den juuni ki gu, o den baa U Tienu n niani o yaala.

¹⁶ Bi nisaaliba yaa poli li poli, bi yen taa yua n cie ba yaa yeli ki poli. Li poli mo tie yaali n tie nani i *kpaaligi yeni ki teni mi niama kuli n gbeni.

¹⁷ U Tienu moko n den bua lan doagidi cain yaaba n baa baa wan niani ba yaa ñoanianu yaa po ke o yanjagili kan lebidi, o den niani u ñoanianu ki pugini li poli.

¹⁸ U Tienu den bili laa bonliedila, yaala n kan lebidi, wan kan pua faama yaala yaa po, ki bua ki yaa paagidi ti pala boncianla, tinba yaaba n sani ki baa opo ki cuo wan bili tipo yaa suginma ki muubi.

¹⁹ Laa suginma tie tipo nani ku ñinbiagu kubikpiagili yaali n siendi gu bonŋanla. Mi se ki go pa bonŋanla ki piani bu *kpalidoaginkaabu ki pendi ki kua liiga po u *kaangagidiŋanmoanu nni,

²⁰ Jesu n den ga ti liiga ki kua naankani tinba yaa po, o tua yaa kopadicianba bado n tie nani *Melikisedeki yeni ki baa ye hali yaa yogunu kuli.