Hebilunba 2 - Gourmanchéma Bible

¹ Lani yaa po li pundi tin fangi ti yula ki cie mi kpiama ki kubi tin den gbadi yaa maama bonŋanla, ke tin da ti yaadi ki ŋa ma.

² Ti bani ke malekinba n den wangi yaa maama, den sedi bonŋanla, ki tiendi mo. Yua n den miidi kaa tuo ki ŋua man bili yaala kuli den baadi yaa panpaani n dagidi.

³ Lanwani ti yaa fangi laa tindicianma, o Diedo wani oba n den kpa waani ti yaama yaa maama, ti baa tieni lede ki sani ki cia o cuonu? Yaaba n den gbadi laa maama o Diedo ñoabu nni mo den tieni tipo siedi ke mi tie moamoani.

⁴ U Tienu moko den ñii bi siedi leni sinankeeninba leni li bonlidikaala leni yaa bancianma buoli n yaba, leni U Tienu Fuoma Yua paabu nani wan bua maama.

Jesu tie yua n gobidi bi niba mi tindima po

⁵ U Tienu ki teni malekinba ke ban yaa die yaa ŋanduna n kpendi, tin maadi yua yaa maama na.

⁶ Niloba yedi kaanuba i Diani nni: «U Tienu, o nisaalo tie be ke a tiani opo, O nisaalo n mali yua, Tie be ke a kubi o bonŋanla Ki lani ti kpiagidi leni ti jigidi?

⁷ A den jiini o u yogunu waamu Ke malekinba cie o, Ki yilini o ti pagidi Leni ti kpiagidi bonyilikaala.

⁸ A teni ke o diedi likuli Nani u bonŋmaakaanu yeni.» U Tienu n den dini o nisaalo li bali ke o die li bonla kuli yeni, waa ŋa liba kuli ke waa die la. Ama ti daa laa ke o die likuli.

⁹ Ama ti laa Jesu, U Tienu n den jiini yua u yogunu waamu ke malekinba cie o, ki puni o ti pagidi leni ti kpiagidi ki go dini o li bali kelima wan den laa fala ki kpe yaa kuuma yaa po. O den kpe bi niba kuli po kelima U Tienu *ŋanbili po.

¹⁰ U Tienu, yua n den tagi li bonla kuli o yuli po ki go kubi likuli, den bua bila boncianla n taani leni o o kpiagidi nni. Lanwani o den sua ke li den pundi wan teni Jesu n dagidi ki yaa ŋani cain kelima wan laa yaa fala po, ke wan fidi ki tindi ba.

¹¹ Jesu yua n gagidi bi niba U Tienu po leni wan gagidi yaaba yeni kuli taa Baayendo. Li tie lani yaa po ke waa jie i fe ki yini ba o waamu

¹² wan den maadi ki yedi: «N baa waani n waamu a yeli, Ki yiini ki pagi a li nitaanli siiga.»

¹³ O go yedi: «N baa dugu o yaa po.» Ki go yedi: «Mini nna, mini leni U Tienu N puni nni yaa bila.»

¹⁴ Kelima a bila n tie nisaaliba ki pia ti gbanandi leni mi soama yeni, Jesu moko den tua nisaalo ki pia ti gbanandi leni mi soama. O den tua yeni ki baa kpe, ke o kuuma n bolini Sutaani paalu wani yua n pia mi kuuma paalu,

¹⁵ ki baa faabi mi kuuma jawaandi n den kubi yaaba ti yonbidi nni hali bi miana dana kuli.

¹⁶ Li doagidi cain ke waa den cua ki baa todi malekinba ka. Ama o den cua ki baa todi Abalahama buolu yo.

¹⁷ Lani yaa po, li den tie tiladi ke wan tua nani o waamu yeni li bonla kuli nni. Yeni, ke wan yaa tie yaa kopadicianba bado n gba bipo mi niñima ki go tie o nidugika wan tuuni bipo yaa tuonli U Tienu kani leni wan go den padi i *candanbaani padili ki baa sugili bi niba*tuonbiadi po maama.

¹⁸ O baa fidi ki todi ban tulini yaaba, kelima wani oba den laa fala ban tulini o yaa yogunu.