Hebilunba 12 - Gourmanchéma Bible

¹ To, kelima yaa siedinba n yaba boncianla lindi ti nani ku tawaligu yeni, tin tugidi mani yaa tugili n yie tipo kuli leni yaa*tuonbiadi n yaba ki lindi ti, ki yaa tiini leni li juunli yaa nuama n bili tipo.

² Tin yaa tiini ki nua Jesu yua n tie li *dandanli cilika leni li ŋanbika. Kelima yaa pamanli n den bili opo yaa po, o den tuo li*dapoanpoanli yaa kuuma, ki fali yaa fe n ye lienni, ki kali U Tienu bali kalikaanu jienu po.

³ Yin kpaagikpaagi opo mani, wani yua n den juuni leni ti tuonbiadi danba n den yie opo maama kuli, ke lan todi yi yin da coagi ki luo li papaali ki cedi.

⁴ Yin koani yaa koanli leni ti tuonbiadi yeni, yi daa koani hali ke bi wuli yi soama.

⁵ Yi sundi U Tienu n tundi yi yaa tundi nani bibaa n baa tundi o bila maama ki yedi: «N bijua, ŋan da fali o Diedo N tundi a yaa tundifala, Ki da luo li papaali Wan fu leni a yaa yogunu.

⁶ Kelima o Diedo tundi Wan bua yua leni fala, Ki pua wan nua yua Ke o tie o biga kuli.»

⁷ Yin juuni mani leni laa fala. U Tienu tiendi yi yeni kelima o nua yi ke yi tie o bijaba. Ki laa bonjaga n ye ke o baa kan tundi o tundifala?

⁸ Ama yi yaa baa a bila kuli n baadi yaa tundifala, yi tie kpiaba, yii tie bimoana.

⁹ Ti baanba yaaba n tie nisaaliba den tundi ti tundifala ke ti fangi ba. Lanwani li pundi tin miini ti yula ti Baa yua n ye tanpoli kani, ke tin yaa pia li miali.

¹⁰ Ti baanba den yen tundi ti tundifala u yogunu waamu bebe nani ban sua ke li dagidi maama, ama U Tienu tundi ti tundifala ti ŋamu po ke tin taani leni o o gagidiŋanma nni.

¹¹ Li tie moamoani ke tundifala kuli yen cili ki yaa tie pabiidili bonla kaa tie pamanli. Ama li yen yuandi ki cuani lan bangi yaaba yaa po mi *teginma leni mi yanduanma.

¹² Lanwani yin paagi mani yi nii yi n yoaligi, leni yi duna ya n tadigi.

¹³ Yi taana n yaa ŋua yaa sani n cuubi ke yua n diani taali n da kpigidi, ama lin paagi.

Mi yegagidikaama

¹⁴ Yin lingi mani mi yanduanma leni bi niba kuli, ki go lingi mi gagidiŋanma, kelima yua n naa pia mani kan le o Diedo.

¹⁵ Yin fangi mani yi yula ke oba n da muni o yuli U Tienu*ŋanbili. Yin go fangi mani yi yula ke yaa jiinu n bia ki to kuli n da toa a benkpela, ki cuani ti yanyagidi ki yaa *joagindi bi niba boncianla.

¹⁶ Yin go fangi mani yi yula ke oba n da tie conconma daano, leni yua n fali yaala n gagidi nani Esayu yeni, yua n den kuadi o nikpedi kelima jeyenma po.

¹⁷ Yi bani ke lan pendi, wan den bua o baa n gaali o, waa den baa. Baa ke o den lingi leni ti ninsiidi, waa den fidi ke o baa lebidi jagili.

¹⁸ Yii nagini ban den baa fidi ki sii yaa juali, yaali n co mi fantama. Yii nagini ku gbangbadibiadigu leni li *biigicianli leni ku faaciangu

¹⁹ leni kakaci piebima leni u nialu fuugu n den ye naankani. Yaaba n den gbadi laa nialu den mia ke wun da go maadi ba baa mayenma ki pugini,

²⁰ kelima baa den fidi yaa ñoabonli n tie na: «Baa yanga yaa sii li juali ban lugidi o a tana.»

²¹ Ban den laa yaala yeni kuli den pia i jeje hali ke Musa yedi: «N jie ti jawaandi hali ki digibi.»

²² Ama yi cua Siyono juali, lani n tie U Tienu yua n ye ki fo yaa dogu, yaa Jelusalema n ye tanpoli kani, malekinba yaaba n yaba ki pundi a tuda tuda bam yaa kani.

²³ Yi cua yaaba n tie U Tienu bikpiala, ban diani yaaba yaa yela tanpoli po nitaanli kani, yi cua U Tienu kani, bi niba kuli bujialo kani. Yi cua bi niteginkaaba naani n ye naankani, bani U Tienu n ŋanbi yaaba ke bi dagidi cain kani.

²⁴ Yi cua Jesu kani, wani yua n tie o *ŋantaadipaano yaa*candanbaalo, leni o soama kani yaama n mii ki maadi yaa maama n ŋani ki cie Abela yaa soama n den maadi yaala.

²⁵ Fangi mani yi yula ki da yie ke yi kan cengi yua n maadi leni yi moala. Kelima yaaba n den yie kaa cengi yua n soagindi ba U Tienu maama ŋanduna nni naa den fidi ki sani ki cia. Lanwani ti yaa yie kaa cengi yua n ye tanpoli po, laa pia tama ke ti kan fidi ki sani ki cia.

²⁶ Laa yogunu o nialu den teni ki tinga digibi, ama moala o niani ti yaa ñoanianu n tie na: «Yenma goga, n baa teni ki tinga n digibi. Li kan yaa tie ki tinga bebe ka. N baa teni tanpoli moko n digibi.»

²⁷ Lan yedi: «Yenma goga,» yeni waani ti ke yaala n tagi ki baa fidi ki digibi kuli, baa pendi, ke yaala n kan digibi mo n suagi ki yaa ye.

²⁸ Lanwani, kelima ti baa baa yaa diema n kan digibi, tin yaa ye leni i tuondi, ki kpiagidi U Tienu ki ŋua o leni li fangili leni i jeje ke li mani opo,

²⁹ kelima ti Tienu tie yaa fantama n bolindi.