Hebilunba 1 - Gourmanchéma Bible

U Tienu juodi ki maadi o Bijua ñoabu nni

¹ Hali yogu U Tienu den maadi leni ti yaajanba bi sawalipuaba ñoana nni yogini boncianla leni mabuoli boncianla.

² Ama moala, mi juodima dana nni, o maadi leni tinba o Bijua yaa ñoabu nni. O den bili ke wane n diedi li bonla kuli, o yaa niinne ke o go tagi li ŋandunli kuli.

³ Wani Bijua yeni n yadi U Tienu kpiagidi yendima. U Tienu n tie maama, o Bijua moko tie yeni cain. O go kubi mi tagima kuli ke mi ye kelima o maama paaciamu po. Wan den soani ti *tuonbiadi ŋuudi-ñanma tuonli ki dudi, o den kali hali tanpojoma, U Tienu yua n pia ti kpiagidi jienu po.

U Tienu Bijua n cie malekinba maama

⁴ Bijua den tua yua n pia ti kpiagidi ki cie malekinba nani wan baa yaa yeli n pia ti kpiagidi ki cie bi yaa yela maama.

⁵ Kelima u laa yogunu ke U Tienu maadi leni o malekinba siiga baa yendo ki yedi o: «A tie n Bijua, Mini n mali a dinla.» U laa yogunu ke o maadi malekoba maama ki yedi: «N baa tie a Baa, A mo baa tie n bijua.»

⁶ Ama U Tienu n soani o Bijakpiaga ŋanduna nni yaa yogunu o go yedi: «O malekinba kuli n kpiagi o.»

⁷ Wan maadi malekinba po, o yedi: «O teni ke o malekinba Tua nani u faalu yeni, Ki go teni ke o naacenba tua mupienu.»

⁸ Ama wan maadi o Bijua yaa maama o yedi: «Fini U Tienu, a bali kalikaanu Baa ye hali yaa yogunu kuli, A badigbiamu mo tie mi *teginma gbiamu.

⁹ A bua mi teginma, Ki nani mi biadima. Li tie lani yaa po, fini U Tienu, ke a Tienu gandi a Ki wuli a yuli po li pamanli kpama, Ki teni ke a pia ti jigidi ki cie a lieba.»

¹⁰ O go yedi: «Fini o Diedo, hali mi cilima, A den pu ki tinga tanpuuli. Tanpoli mo tie a yaa tagime.

¹¹ Lani kuli baa bodi, Ama fini wani, a baa ye, Likuli baa kpeligi Ki cadi nani li liadili yeni.

¹² A baa kokoli la nani bu kpalibu yeni, Likuli baa lebidi nani o nilo N lebidi o liadili maama. Ama fini, a tie yenma yogunu kuli, A bina mo ki pia gbenma hali abada.»

¹³ U laa yogunu ke U Tienu go maadi leni o malekinba kuli siiga baa yendo ki yedi: «Kali n jienu po, Hali min guli a yibalinba ŋan ŋmaa ba?»

¹⁴ Malekinba yeni kuli ki tie fuoma yaaba, yaaba n tuuni wani U Tienu po, wan tuuni yaaba ke bi todi mi *tindima yaa faajieba kaa?