Habakuki 3 - Gourmanchéma Bible

¹ Li Miali Diedo sawalipualo Habakuki n mia Li Miali Diedo yaa miabu ke li naani leni i wanli yeni.

² Li Miali Diedo, n gbadi ke bi togidi ŋan den tieni yaala, Ke li fangili cuo nni. Moala, go tieni timo yaa yogunu ne laa tuona buolu, Ki teni bi niba n bandi a. Baa a pabienli nni ŋan go gbadi tipo mi niñima.

³ Li Miali Diedo ñani Temana ki kpendi Li Miali Diedo yua gagidi ki ŋani ñani Palana juana po ki kpendi. *Joma Tanpoli gbie leni o kpiagidi Ki tinga mo gbie leni o pagidi.

⁴ O kpendi leni mi yenma boncianla, Mi yenma ña o nuu nni ki tuodi nani u yienu yeni, O paalu n wuo naani n yeni.

⁵ O yen soani i yianbiadipuodike o liiga Ki teni ke mi kuuma mo ŋua o puoli.

⁶ O yaa sedi ki tinga yen digibi, O yaa diidi i nibuoli ti jawaandi yen cuo ba ban yaa digibi. A joaciama ya n den ye hali yogu yen digibi. A joabila ya n den ye hali yogu yen ñuani. Ŋani ya n den tie wan den kpa tagi yaa sani hali yogu.

⁷ N den laa ke Kusani yaaba gbandiena bia fanma, Ke Madiana mo yaa diedi yaaba ye leni ti jawaandi.

⁸ Li Miali Diedo, naani i kpenciami n fiini a pali? Naani a pali beni i kpenciami po yo? Naani mi ñincianma n teni ke a pali fii? A den jagi ti tawadi nani ku toateligu yeni, Ki baa koani ki paadi.

⁹ A kpali a dabanli, A piemi mo tie a maama. Joma A budi ki tinga ke i kpeni tiini.

¹⁰ A juana laa ŋa ki digibi. Mi ñima ña tanpoli ki cuudi ki tinga nni. Mi ñincianma fu ki fiindi a ñinguona Ke a pua ki yugi hali tanpoli.

¹¹ A toani a piemi ke i pelini, Ki lugidi a kpaanli mo ke li ñuliti ki tuodi, U yienu leni o ŋmaalo jidi bi cenli ki se kaanyendu.

¹² A pali fii ke a goadi ki tinga nni, Ki ŋma ki midi i nibuoli kelima a pabienli po.

¹³ A ñani ki baa faabi a niba, Ki baa faabi ŋan den gandi yaa bado. A pua ki guli bi nibiadiba diedi, A bolini bi diedi cain.

¹⁴ A muudi ki cibidi yibalinba yudanba yula Leni bani biba yaa piemi. Bi den fii nani ku tafaaciangu, Ki jaligi ki kpendi Ki bua ki yadi ti, Ki kuudi leni li pamanli, Ki bua ki bolini ŋasiili nni yaa niba n ki pia paalu.

¹⁵ A jagi a taami ki gaandi mi ñincianma po, Ki fiindi a ñingociama.

¹⁶ N den gbadi lani kuli, Ke n tugusoama sani. N ñoacuuna jeli kelima ti jawaandi po. N gbanu wudi, N taana digibi. N ŋmini ki guu li pabiidili daali, Tin baan baa yaaba n mabindi ti yeni yaa daali.

¹⁷ I kankandi kan go tieni puuma. I duven tiidi kan luoni. *Olifie tiidi kan luoni liba kuli. Kpaangu kan tieni i kuani nni. I pe kuli baa bodi a yanlola nni I ne mo n bodi i naapagi nni.

¹⁸ Baa leni lani kuli n baa yaa mangidi n pali Li Miali Diedo po. N baa yaa mangidi n pali kelima n faabima Tienu po.

¹⁹ Li Miali Diedo, n Diedo n tie n fidu O teni ke n taana yua nani o kabilo yeni, Ke n cuoni yaa juana n kpedi po. Bi yanyanba yudaano n baa bangi yaa yanbu ke bi pua ti kogiditi.