Filipi 1 - Gourmanchéma Bible

I fuondi

¹ Mini Polo leni Timote, Jesu Kilisiti yaa naacenba, n diani yipo li tili, yinba yaaba n tie bi *nigagidiŋanba Jesu Kilisiti nni ki ye Filipa dogu nni, leni yi nitaanli yudanba leni yi todikaaba kuli.

² Ti Baa U Tienu leni o Diedo Jesu Kilisiti n pa yi li *ŋanbili leni mi yanduanma.

I jaandi leni ti pagidi

³ N tuondi n Tienu min tiadi yipo yaa yogunu kuli.

⁴ Min jaandi yikuli po yaa yogunu kuli, n jaandi leni li pamanli,

⁵ kelima yin taa leni nni ki todi nni o Laabaaliŋamo wangima po maama, ki cili yin den kpa gbadi o yaa daali ki pundi hali moala.

⁶ N daani ki go bani cain ke wani yua n cili laa tuonŋanli yi niinni, baa tuuni li hali lin dudi Jesu Kilisiti goacuama daali.

⁷ Li pundi min yaa tiani yikuli po yeni, kelima n kubi yi n pali nni. Min ye leni ti kpaadi, leni min maadi ki ga o Laabaaliŋamo ki teni ke o se ki pa, yikuli taa leni nni ki baadi min baadi yaa ŋanbili U Tienu kani.

⁸ U Tienu tie npo n siedo ke n bua yikuli leni Jesu Kilisiti yaa buamoanma.

⁹ Min miadi U Tienu yipo yaala n jaandi nni tie ke yi buama n yaa yabidi ki pugidi leni mi bandima leni u fanmoanu,

¹⁰ ke yin bandi ki gagidi ki gandi yaala n ŋani ki cie. Lani n baa teni yin yaa ŋani cain ki naa pia ban baa fidi ki kuli yi leni yaala Kilisiti goacuama daali.

¹¹ Yeni, yi baa yaa tuuni mi *teginma tuona ya n ñani Jesu Kilisiti kani, lan tua ti kpiagidi leni ti pagidi U Tienu po.

Kilisiti n tie li miali

¹² N kpiiba, n bua ke yin bandi line, yaala n den baa npo teni ke o Laabaaliŋamo wangima suagi liiga.

¹³ Moamoani, li doagidi yaa minteela n gu o bado diegu kuli leni nitoaba kuli po ke n lo li kpaadidieli nni kelima Kilisiti yaa po.

¹⁴ N kpaadi teni ke ti kpiiba boncianla dugi o Diedo po ki cie ki go paagi bi pala ki wangi U Tienu maama kaa go jie.

¹⁵ Li tie moamoani ke bi siiga bi tianba wangi Kilisiti Laabaaliŋamo kelima bi pia npo li nunponli ki bua ki cie nni. Ama bi tianba mo li wangi o leni li yantiaŋanle.

¹⁶ Bine wangi o Laabaaliŋamo kelima bi bua nni, ki bani ke n ye ne kelima U Tienu puogi nni ke min maadi ki ga o Laabaaliŋamo ki doagidi ke o tie moamoani.

¹⁷ Bine mo wangi o ki bua ki cie nni, bi yantiana naa ŋani. Bi tama ke bi yaa tieni yeni li baa pugini npo fala li kpaadidieli nni.

¹⁸ Likuli tie npo yenma. Baa lan tie maama kuli, bi yaa wangi o leni mi tuonanma, bi ban wangi o leni li yantiamoanli, bi wangi Kilisiti Laabaaliŋamo. N mangi n pali lipo ki go baa mangidi li ki pugidi.

¹⁹ Kelima n bani ke likuli baa juodi ki tua n *tindima yaa po kelima yin jaandi ki miadi npo maama, leni Jesu Kilisiti Fuoma todima yaa po.

²⁰ Nani min bua ki go sugini maama tie ke n kan le i fe liba kuli po. Ama nani lan den kpa tie maama, li go tie yeni moala. N sugini ke Kilisiti baa baa ti kpiagidi n miali yema nni kuli, li yaa tie ke n baa kpe leni n yaa baa ye kuli.

²¹ Kelima mini yaa po Kilisiti n tie n miali, mi kuuma mo tie npo ñuadi.

²² Ama, li yaa tie ke li ŋani min tuuni yaa tuonli yaa po ke min yaa ye n gbanandi nni, mii bani min baa gandi yaala.

²³ Laa bonliedila miabi nni. N bua ki ña ki gedi ki ban yaa ye leni Kilisiti, lani n cie npo hali boncianla.

²⁴ Ama yi mo yaa todima po, li baa cie min yaa ye ki fo.

²⁵ N daani ki go bani ke n go baa fo, ki ye leni yikuli, ke yin fidi ki yaa suagi liiga ki go pia li pamanli li *dandanli nni.

²⁶ Yeni, n goacuama yikani go baa teni yin baa li pamankandikaali Jesu Kilisiti nni.

²⁷ Lanwani bonyenla tugi li yuli, lani n tie ke yi tagi n yaa de leni Kilisiti yaa Laabaaliŋamo. N yaa fidi ki cua yikani ki laa yi, leni n yaa fidi ki cua, min yaa gba ke yi se bonŋanla ki pia yantiayenli, ki moa o Laabaaliŋamo n cuani yaa dandanli yaa muali.

²⁸ Yin da cedi yi koanginkaaba n jieni yi baa waamu. Lani n tie bipo siedi ke bi baa bodi, ama li tie yinba yaa po siedi yi tindima po. Laa bonla ñani U Tienu yaa kani.

²⁹ Kelima U Tienu n tieni yipo yaa ŋanbili yeni, laa tie ke yin daani Kilisiti bebe ka, ama yin go yaa laadi opo fala moko.

³⁰ Yi moko taa leni nni ki moa yin den laa ke n moa yaa muali, ki go gba moala ke n baa moa.