Esiteri 3 - Gourmanchéma Bible

¹ Laa bonla n den pendi, o bado Asuelusi den duoni Hamedata bijua Hamana. O den tie Agagi buolu yua. O den pugini o ti kpiagidi, ki duoni o bali ke o cie yaa koanbala n ye o diema nni.

² O bado cancantieba, yaaba n den taagi o bado cancanli nni kuli, den gbaandi ki pugi Hamana kelima o bado den ñani o ñoabonli ki bili yeni. Ama Malidoke wani den yie ke o kan gbaani ki pugi Hamana.

³ Lanwani o bado cancantieba, yaaba n den taagi o diegu cancanli nni den buali Malidoke: «Be yaa po ke a miidi o bado maama?»

⁴ Bi den lindi ki buali o laa buali ke waa cengi ba, kelima o den yedi ke o tie Jufi. Lanwani bi den waani Hamana.

⁵ Hamana moko den laa ke Malidoke yiedi kaa gbaandi ki pugi o. O pali den beni boncianla.

⁶ Bi go den waani o Malidoke n tie yaa buolu yua. O den sua ke o yaa kpa Malidoke bebe waa ñani yianu. Lanwani o den bua ki bolini Malidoke buolu, lani n tie yaa Jufinba n den ye o bado Asuelusi diema nni kuli.

⁷ O bado Asuelusi bali piiga n binlieli binli o ŋmakpialo, ban yi yua Nisan yaa niinni, Hamana den teni ke bi luni Pulimi, lani n tie tiatia. Bi den toani tiatia yeni ki bua ki le ban baa taa yaa ŋmaalo leni yaa daali ki bolini Jufinba. Tiatia den cuo piiga n cilie, ban yi yua Adadi.

⁸ Lani yaa puoli Hamana den yedi o bado Asuelusi: «U nibuolu ye ki yayadi a diema kuli nni kaa taa leni yaa nibuolu n sieni. Bi pia yaa balimaama n ki taa leni yaa nibuoli n sieni, baa kubi fini o bado balimaama mo. Bi yaa cedi ba suo, li kan yaa ŋani apo.

⁹ Fini o bado yaa sua ke li dagidi, ŋan ñani a ñoabonli ki diani ki bili ke ban bolini ba. Lani, n baa taa ŋanjilifa yua yaa kpiagu n pundi kilo tuda kobitaa, ki teni yaaba n kubi i ligi ŋantaadi ban tieni a ŋalimano nni.»

¹⁰ O bado den piti o ñoagima ki teni Agagi buolu yua Hamedata bijua Hamana, Jufinba yibali,

¹¹ ki yedi o: «Yaa kubi a ligi, n puni a u nibuolu yeni, ŋan tieni u ŋan bua maama.»

¹² O ŋmakpialo piiga n dataali daali bi den yini o bado tidianla ke bi diani Hamana n yedi ba yaala kuli. Bi den diani ki soani mi diema kuli nni bi yudancianba leni bi badibaanba leni nibuolu kuli yudanba kani. Bi den diani ki soani diebiga kuli po nani kan dangi maama leni yaa nibuolu n ye ki niinni n maadi yaa mabuolu. Bi den diani nani o bado Asuelusi wani oba n diani, ki taa o bado ñoagima ki pua ki tieni o maalima.

¹³ Bi den teni a tila yeni a tonda ke bi gedini a o bado diema nni kuli ki tenteni. A tila yeni niinni li den bili ke ban kpa ki bolini Jufinba kuli, bi nipanba leni a nikpela, a bila leni bi puoba, ki go fagi bi bonpiakaala. Ban bolini bikuli dayenli, piiga n cilie, ban yi yua Adadi, yaa piiga n dataali daali.

¹⁴ A tila yeni den pia o bado ñoabonli ban baa kpaani yaali o diema kukuli nni, ki go waani bi niba ban bogini li daali yeni po.

¹⁵ Ban den teni a tila yaa tonda den jaligi ki fii ki gedi nani o bado n puogi ba maama. Bi den kpaani li ñoabonli yeni u dociamu Suse nni moko. Lani o bado leni Hamana den kaa ki ñu ke Suse yaaba wani womi ke bi gbani kuli wudi.