Esiteri 1 - Gourmanchéma Bible

O bado Asuelusi tieni mi jaanma

¹ Li den tie o bado Asuelusi n die yaa yogunu. Wani Asuelusi den die yaa diecianma n boagidi kobiga n piilie n diema lele, ki cili Inde diema, ki yaa caa hali Etiopi diema.

² O den ye o diema kuli dociamu Suse nni ki kaa o bali kalikaanu po.

³ O bali bintaali binli o den tieni mi jaanma o badijaba leni o naacenba kuli po. Pelisa leni Medi diema toatieba yudanba leni diema kuli yudaano leni mi paatieba den taani o bado kani.

⁴ O den wangi ba o diema ŋalimani leni o bali n pia yaa kpiagidi kuli. Li den waagi dana boncianla, li den pundi kobiga n dana piinii.

⁵ Laa dana n den pendi, o bado den tieni mi jaanjiema yaa niba n den taani o dociamu Suse nni kuli po, a nikpiaga leni taliginba kuli. Mi jaanjiema yeni den tieni o bado diegu nni sadinga yaa fanma nni, ki waagi dana lele.

⁶ U kaanu yeni den pia a bunbuna, ban den taa yaa tanŋama n yi Mabile ki kpie yaa. Bi den taa ŋanjilifa ñoagima ki kpaa ki tabini a bunbuna yeni, ki go taa ban pali yaa gaali leni ti kunkundi ke yi pieni, leni i gaalimoani ki tuuni mi ñoagima nni ke i luo a cabipiena, leni mi cabiwaanuama. Bi den duani sadinga fanma yeni niinni yaa tanbila n moani, leni yaa tanbila n pieni leni yaa tanbila n boani leni yaa tanbila ke bi wuli apo yaala n yen taabi u konkuonu tugu nni ki ñuliti. Bi den bili lankani yaa bonkalikaala n tie wula leni ŋanjilifa.

⁷ Mu tadiñokaamu buolu den yaba, mu kuli den tie wula. *Duven den dua boncianla kelima o bado den puni ma leni ti bulicindi.

⁸ Baa den teni ke oba ñuni leni paalu kelima o bado den teni yaa naacenba n ye o diegu nni kuli li ñoabonli ke ban ŋoadi yua kuli n bua maama.

⁹ O bado pua Fasiti moko den tieni mi jaanjiema bi puoba po o bado Asuelusi badidiegu nni.

O pobado Fasiti yie o calo o bado maama

¹⁰ Li daleleeli daali o bado n den ñuni duven ke o pali mangi, o den yini Mehumani leni Bisita leni Halibona leni Bigita leni Abagita, leni Setadi leni Kadikasi, bani yaa moagilileleedimu n den tuuni wani o bado po.

¹¹ O den soani ba ban yini Fasiti wan cua. Ke o yaa kpendi wan yaa ciibi ki badifogiliga bi paatieba leni taliginba kuli n le o ŋamu, kelima o nunga den ŋani boncianla.

¹² Ama mu *moagilimu n den caa o pobado Fasiti o bado tondu, o den yie ke o kan gedi. Lani yaa po o bado pali den beni hali boncianla.

¹³ Wani o bado yaa den pia maamaba, mi yen maadi ki kadi yaaba n bani li bali maama leni li bujiali nintuali. Lani yaa po o den boe leni bani yaaba n tie o tundikaaba.

¹⁴ Pelisa leni Medi diema yudanleleediba den tie o tundikaaba yeni siiga tianba. Bani bi yudanleleediba yeni yela nne: Kadisena, Setala, Adimata, Talisisi, Melesi, Madisena leni Memukana. O bado den pia bipo ti dugidi ki teni ke bi tugi li yuli ki ŋua o puoli.

¹⁵ O den yedi ba: «N bi soani mu moagilimu ban yini o pobado Fasiti ke o yie waa cua. Li bali maama bili tin tieni o be?»

¹⁶ Bi yudanleleediba yeni siiga yendo, Memukana, den yedi o bado leni o yudanlieba: «O pobado Fasiti ki tieni yaala n bia fini o bado bebe po ka, li bia tinba bi yudanba leni yaa niba n ye fini a diema nni kuli yaa po.

¹⁷ Kelima bi puoba kuli baa gbadi o pobado Fasiti n tieni yaala ki fali bi ciaba. Bi baa yedi: ‹O bado Asuelusi wani n den soani ban yini o pobado Fasiti, waa den yie waa gedi?›

¹⁸ Dinla liiga Medi diema leni Pelisa yaama yudanba puoba baa gbadi o pobado n tieni yaala ki togidi la bi ciaba kani. Yeni mo bi puoba faliga baa fiini bi jaba pala.

¹⁹ Fini o bado yaa sua ke li ŋani, ŋan ñani a ñoabonli ban kpaani ki go diani ki bili Pelisa diema leni Medi yaa diema kuli yaa balimaama nni, ke li kan lebidi hali abada, ke Fasiti kan go cua a kani. Ŋan teni nitoa, yua n cie o, li pobali.

²⁰ Baa a diema n yaba maama kuli, bi baa gbadi i kaani kuli ŋan ñani yaa ñoabonli. Lanwani pua kuli baa kpiagi o calo, o yaa tie niciamo bi o yaa tie taliga.»

²¹ Laa tundi den mangi o bado leni bi yudanba kuli, ke o bado den tieni nani Memukana n yedi maama.

²² O den soani a tila o diema kuli nni. Bi den diani ki soani diebiga kuli po nani kan dangi maama leni yaa nibuolu n ye ki niinni n maadi yaa mabuolu. Laa tila den bili ke ja kuli baa yaa die o diegu nni, ki yaa maadi o buolu maama o diegu nni.