Esayi 8 - Gourmanchéma Bible

¹ Li Miali Diedo den yedi nni: «Taa yaa tanpabu n yaba ki diani lipo yaa maama n tie na: ‹Jaligi ki fie, jaligi ki fagi.› »

² N den yini siedi dugikaaba lie, lani n tie o kopadiciamo Uli leni Belekia bijua Sakali ke bi yegi leni nni ki baa tieni siedi ke n tieni Li Miali Diedo n den puogi nni yaala.

³ N den kua n pua yua moko n den tie sawalipualo kani. O den punbi ki mali bonjaga. Li Miali Diedo den yedi nni, yini o yaa yeli n tie na: «Jaligi ki fie, Jaligi ki fagi.

⁴ Kelima hali ke ki biga yeni daa bandi ki yedi: ‹N baa› leni ‹N naa› bi baa tugi Damasa piama leni Samali fagidi ki cuani Asili bado nintuali.»

Asili yaaba cua ki baa mi diema

⁵ Li Miali Diedo go den maadi nni ki yedi:

⁶ «Nani bi naa niba n fali Silowe ñima yaama n puubi dindini Ki mangi bi pala Letisini po leni Lamalia bijua po yeni.

⁷ Lani yaa po yo ke O Diedo baa teni u kpenciamu yaa ñingola Yaa n yaba ki go pia u paalu n duodi ki kandi mi boanjaana kuli. Lani n tie Asili bado leni o kpiagidi kuli.

⁸ O baa fii ki sedi Juda po, ki gbie ki duodi Mi baa pundi hali o tulu, U fiabi tandima baa gbieni a diema, Emanuweli!»

Bi niba yanjaga ya n ki pia fuoma

⁹ I nibuoli, kuudi mani boncianla Yi baa jie ki luodi Yi kuli n cengi bonŋanla mani Yinba yaaba n ye hali foagima, Bogini mani bu toabu po. Yi baa jie ki luodi.

¹⁰ Jagi mani yin bua ki tieni yaala Liba kuli kan baa yuli. Yin maadi yaa maama mo kan tieni Kelima U Tienu ye leni ti.

Li tantuudikaali

¹¹ Li Miali Diedo den maadi nni yaa maama n tie na, Wan den tandi o nuu yaa yogunu ki muubi nni Ki tuodi ki waani nni min da ŋoadi bi naa niba yaa sanu.

¹² Bi naa niba yaa yini yaala janbi kuli Yin da yini la janbi. Yin da jie ban jie yaala, Yin da jie la baa waamu.

¹³ Li Miali Diedo U Paaciamu Kuli Daano Tie yin baa nua yua ke o gagidi ki ŋani, Yi baa jie wani bebe yo Yi baa yaa fangi wani bebe yo.

¹⁴ Yeni o baa yaa tie u *kaangagidiŋamu, Ama o go baa tie li yuboantanli, li tantuudikaali Isalele dieliedima po Taali leni diagu Jelusalema yaaba po.

¹⁵ Bi niba boncianla baa tuudi Ki baa ki kua kua biba. Bi baa baa ku diagu nni kun cuo ba.

Mi ŋminma leni mi guudima yogunu

¹⁶ Kubi o naa siedo bonŋanla. Kubi mi naa bangima bonŋanla n ŋoadikaaba siiga.

¹⁷ N dugi Li Miali Diedo po wani yua n buli o nunga Jakobo diegu yaaba po. N dugi opo hali bonŋanla.

¹⁸ N ye nekanba mini leni U Tienu n puni nni yaa bila. Ti tie sinankeeni leni mi maalima bonla Li Miali Diedo U Paaciamu Kuli Daano po Isalele diema nni, wani yua n ye Siyono juali yuli po.

¹⁹ Bi yaa yedi yi: «Gedi mani ki ban bu ku baagu yaaba n maadi leni bi tinkpiba leni yaaba n soabidi ki bunbidi, ki go wangi yaala n faadi ki ye. Naani u nibuolu kan yaa bu U Tienu ka? Naani bi baa miadi bi tinkpiba n yaa todi yaaba n foo?»

²⁰ Guani mani li *bali maama leni siedi kani. Bi yaa tieni yeni, suginmaba kan yaa ye bi niba po.

Yaa biigili n pia i jeje

²¹ Bi niba baa puagi mi diema nni leni li coagili leni mi koma. Mi koma yaa muubi ba Bi pali yen baa be yogunuba, Ban soli bi bado leni bi Tienu. Bi baa yaadi ki noanli tanpoli,

²² Li yaa yuandi bi baa tibini ki noanli tiipo Ki sua ke paboanli, li *biigili leni i yanbani bebe. Bi yen baa sua ke bi se laa biigicianli nni.

²³ Ama li biigili kan waagi ki ye, Ki tinga yaaga yaa niinni n pia li paboanli. Li yaa tie mi kpiama ke U Tienu den teni ke ti laa i fe, Sabulono leni Nefitali diema, Yaa yogunu n kpendi o baa pa, Mi ñincianma yaama n ye Judana kandima sanu ti kpiagidi, I nilanbuoli diema nni.