Esayi 53 - Gourmanchéma Bible

¹ Ŋme n den daani ban den togidi ti yaala? Li Miali Diedo nuu paalu den doagidi ŋme yaa po yo?

² O den kpedi o nintuali nani li benkpeli yeni, Nani yaa jiinu n pudi ki tinkuoga nni yeni Waa den pia bugima, bi ŋamuba Hali ke ti baa bua ki diidi o. Wan naani maama mo ki den tie tin baa bua ki ñuadi yaala.

³ Bi niba den fali o, ki ŋa o Wani o falabiado nilo, yua n maani fala, O den naani leni ban den buli yua ki nunga. Ti den fali o ki nua ke waa tie pu.

⁴ Ama moamoani, o den ga ti yaa fala yo ki tugi O den tugi ti yaa paboanle. Ama tinba, ti den nua ke U Tienu n den guandi o, O biadima panpaani Ki duoliti o, ki faligidi o.

⁵ Ama bi den muu o ti yaa yiema po yo. Bi den pua ki moagi o kelima ti yaa *tuonbiadi po. Yaa fala n cuani tinba yaa po mi yanduanma yeni den baa wani yaa po. Li tie o yaa poagilima yaa po yo ke ti faabi.

⁶ Tikuli den yaadi nani i pe yeni. Yua kuli den tagi wan bua yaa sanu. Ama Li Miali Diedo den tuni wani ti yaa tagili kuli.

⁷ Bi den faligi o, ki fiagi o Ke o naa den yaadi o ñoabu Nani ban caani yaa pebiga u yankodikaanu yeni. Nani ban moagi o pia kobidi ke o ŋmini maama yeni Waa yaadi o ñoabu.

⁸ Ban den jia o yaa buudi leni yaa tugutongu den kpa o. O yaa nifiima siiga, ŋme n den yagi o yama ban den ñani o yeni po? Bi den ñani o bi nifuodiba kani Kelima n niba biadima po Leni yaa fala n den baa baa ba po.

⁹ Bi den gbini o kuli bi nibiadiba siiga. O kuli den ye a piada siiga, Baa ke waa den tieni biadimaba kuli Ke boandiba mo ki den ñani o ñoabu nni.

¹⁰ Baa yeni, li den mani Li Miali Diedo Ke wan pua ki moagi o leni fala. Wan puni o miali ke li tua li padili yeni, O baa le o puoliŋuani, O miali dana mo n foagidi, Li Miali Diedo yanbuama mo baa tieni o yaa nuu nni.

¹¹ Wan laa yaa fala lipo yeni, O baa le li ñuadi Leni ban baa bandi o maama po Wani n naacemo yua n tiegi yeni baa saa niba boncianla po moamoani Ki taa bi tagili ki tugi.

¹² Li tie lani yaa po ke n baa teni wan kali ti kpiagiciandi danba siiga, O baa taani leni bi paatieba ki boagidi ti fagidi Kelima o den puni o yuli ki kpe, Ke bi den coadi ki taani o leni i tagili danba, Kelima o den tugi niba boncianla tuonbiadi Ki den baa i tagilidanba po ti candandi.