Esayi 51 - Gourmanchéma Bible1 Yinba yaaba n tiini ki ŋua mi *teginma, Ki lingi Li Miali Diedo Cengi mani nni! Yaadi ki diidi mani ban kpie yi yaa tangu kani Leni ban ñani yi yaa tanlongu nni. 2 Yaadi ki diidi mani yi yaaja Abalahama Leni Sala yua n mali yi po. O den ye o bebe yo, min den yini o yaa yogunu, Ama n den seligi o ki teni ke o mali boncianla. 3 Yeni, Li Miali Diedo gba Siyono po mi niñima. O gba yaaba n ye ti diegbendi nni po mi niñima. O baa teni o fanpienma mo n tua nani Edena yeni, O tialu mo n tua nani Li Miali Diedo sadingo yeni. Li pamanli leni li pamancianli baa ye o niinni, Leni ti pagidi yani leni i kogidimuani. 4 N niba, sieni mani yi yama kuli n kani! N nibuolu, diadi a tubili ki cengi nni bonŋanla! Kelima li *balimaama baa ña a yaa kani N baa teni n bujiali n doagidi Ki tua i nibuoli yenma. 5 N teginma nagini N *faabima mo baa doagidi N buadi mo baa jia i nibuoli buudi Yaaba n ye a kpendega po, baa bili bi suginma n kani. Bi baa yaa dugi n buagu paalu po. 6 Yaadi ki diidi mani tanpoli po Ki nan yuandi ki tibini ki diidi tiipo! Kelima tanpoli baa bodi nani i muñii yeni, Ki tinga mo baa yondi yondi ki baa nani yaa tiadi n bedi yeni Ki niba mo baa bodi nani i sii yeni. Ama n faabima wani baa ye hali yaa yogunu kuli po, N teginma mo kan gbeni hali abada. 7 Cengi mani nni yinba yaaba n bani mi teginma! Yinba yaa nibuolu n kubi n bali maama yi pala nni Yin da jie bi niba n baa waani yi yaa fe Ki digibi leni ban baa fali yi maama po. 8 Kelima ti lulugidi baa bolini ba nani ti tiadi yeni I nanboe mo baa bolini ba nani ti pekobidi yeni. Ama n teginma baa waagi ki ye hali yaa yogunu kuli. N faabima mo baa ye nifiima n tu nifiima. Li Miali Diedo, fundi 9 Fundi, Li Miali Diedo! Fundi! Fundi tontoni leni a buagu n den pia yaa fidu! Fundi nani u yogu nni Nani yaa nifiima n pendi yogu nni yeni! Fini ka den pua ki guli Ejipiti Ki den muu o bonfuodibiado? 10 Naani fini ka den teni ke mi ñincianma Leni u *kulu nni ñima kuli ñuudi? Fini ka den tieni u sanu mi ñincianma tiipo, Ke ban da ki faabi yaaba, n baa ki tagini? 11 Li Miali Diedo n faabi yaaba, baa lebidi ki kpeni yene. Bi baa pundi Siyono leni li pamanli yani Yaa pamanli n ki pia gbenma mo n baa yilini bi yula Li pamanli leni li pamankandikaali n baa sani ki cua. Li paboanli leni i figindi mo baa sani ki foagidi. N niba, yi go jie ŋme? 12 Li tie mini lige, mini n baagidi yi. Be yaa po ke ke yi baa yaa jie o nisaalo yua n baa kpe, O nisaalo biga, yua yaa miali n tie nani ku muagu yeni, 13 Ki sundi Li Miali Diedo yua n den tagi a po, Yua n den dadi ki tandi ti tawadi, ki bili ki tinga tanpuuli, Ki baa yaa ye daali kuli yaa jawaandi n ki pia gbenma nni? Kelima yua n faligidi a pabiencianli po, Nani wan bogini ki baa bolini yaa yogunu yeni. Yua n faligidi pabienli ye le? 14 Li kan waagi ke bi baa luodi ban den luoni yua. O kan kpe kpaadidieli nni O jiema mo kan poadi o. 15 N tie Li Miali Diedo yi Tienu Yua n lengidi mi ñincianma, Ki teni ke mi ñingola fu. O yeli n tie: «Li Miali Diedo U Paaciamu Kuli Daano.» 16 N kuani n maama a ñoabu nni Ki ŋoagini a leni n nuu soangu Ki tandi ti tawadi Ki bili ki tinga tanpuuli Ki yedi Siyono yaaba: «Yinba n tie n niba.» Goa ki kpaagi mani yinba Jelusalema yaaba 17 Fundi mani, fundi mani! Fii mani, yinba Jelusalema yaaba! Yinba yaaba n ñuni Li Miali Diedo nuu nni O pabienli tadiñokaaga. Yinba yaaba n ñuni ki fuadi Yaala n den ye ki nunfufuuga tadiñokaaga nni. 18 Yin den mali yaa bijaba kuli siiga, Oba kuli ki ye, yua n baa gobidi yi. Yin den wubi yaa bijaba kuli siiga, Oba kuli ki ye yua n baa muubi yi buagu ki dadi yi. 19 Yaa bonliedila n tie na kuli nandi yi Ŋme n baa mua yipo? Lani n tie bu febu leni mi bolinma. Mi koma leni bu toabu. Ŋme n baa baagi yi? 20 Yi bijaba gbali Ki bibili i sankuni kani kuli Nani yaa kabilo n baa ku diagu nni yeni, Ke Li Miali Diedo pabienli jagi bi yula po Ke yi Tienu mo fu leni ba. 21 Ama moala cengi mani, Yinba, yaaba n ye leni fala, Yi ñuni ki gaadi ke li naa tie leni daama ka. 22 Yi Diedo, Li Miali Diedo yua n ga o niba koanli yedi mine: «Diidi n fie yi nuu nni Ki nunfufuuga tadiñokaaga N pabiencianli n ye yaa tadiñokaaga nni Ke yi kan go ño ki niinni. 23 N baa mubini ga yaaba n den faligidi yi yaa nuu nni, Bani yaaba n den tua: ‹Labini mani tin tagini!› Lani yaa po den teni ke yi buani tua nani ki tinga yeni. Ki naani leni u sanu bi santagiba po.» |
Gulmancema Bible © Bible Society of Burkina Faso, 2003.
Bible Society of Burkina Faso