Esayi 3 - Gourmanchéma Bible

¹ Diidi Li Miali Diedo U Paaciamu Kuli Daano Baa muni Jelusalema dogu yaaba leni Juda diema yaaba Li bonjekaala, mi ñima, leni lan tie yaa todima buolu kuli.

² Bi kan baa jakoanda leni toatieba, Bujiaba leni sawalipuaba, a lingida leni a nikpela,

³ Niba piimuu yudaanba, bi bulicinba, bi tundikaaba, Bi buligbandanba leni a baayuadiida.

⁴ N baa teni a bonwaala n yaa gobidi ba Ki caani ba ban bua naani.

⁵ Bi niba baa fii ki sedi biyaba po. Yua kuli baa nandi o yieninlielo. A bonwaala baa fii ki paagi a jakpela yama, Ti niyuodi mo baa fii ki pani bi bulicinba po.

⁶ Jayendo baa cuo o kpiilo ku baadiegu nni ki yedi o: «Fini wan pia li bonlakaala, tua ti yudaano Ki yaa gobidi tinba taliginba.»

⁷ Laa daali o baa kpaani ki yedi ba: «N kan fidi ki todi yi, n diegu nni ki pia jiema, Mii pia tiayiekaadi. Da tuni mani nni ku naa niligu yuli.»

⁸ Jelusalema tuudi, Juda mo ŋmadi ki baa Kelima bi ñoana leni bi tuona pegidi ki noanli Li Miali Diedo kpiagidi leni mi kafaama.

⁹ Bi japaadi jia leni ba ti buudi. Bi doagidi bi *tuonbiadi nani Sodoma yeni ki naa wuondi ti mo, Mi yebiadima n ŋma ba kelima bani n lingi fala.

¹⁰ Yedi mani: «O niteginka taagi u sanŋamu O baa je o tuonli ñuadi.

¹¹ Fala baa nandi o nibiado kelima waa ŋua yaa sanu n ŋani. Wan soani yaa tuona baa goa ki baa o yuli po.»

¹² Bonwaala n li wangi n niba fala, Puoba mo n li die ba. N niba yaaba n gobidi yi yaani yi, Ki bolini yin ŋua yaa sanu.

Bi gobidikaaba bujiama

¹³ Li Miali Diedo baani ki gbeni ti buudi jiama po. O fii ki baa buu leni i nibuoli.

¹⁴ O baa jia ti buudi leni o niba siiga a nikpela, Leni bi yudanba ki yedi: «Yi ŋmani n duven tiidi kuanu, Yin fie yaala a luoda kani gbie yi diedi.

¹⁵ Be yaa po yo ke yi wangi n niba fala ki mabindi a luoda? Li Miali Diedo U Paaciamu Kuli Daano n yedi yeni.»

Jelusalema poŋanba

¹⁶ Li Miali Diedo yedi: «Nani Siyono puoba n pia ti popaadi Ki cuoni ki dadi bi tuli, Ki pia mi kafaama, ki cuoni dindini, Ki teni ke bi taana biana mua yeni,

¹⁷ Lani n teni ke Li Miali Diedo baa teni bi yula n pidi, Li Miali Diedo baa sieni ba mubima.»

¹⁸ Li daali kpendi ke Li Miali Diedo baa fie Siyono puoba n pua ti jafandi leni yaa tiadi. Lani n tie: a taana biana, li bontabinkaala, yaa bonlakaala n tie nani o ŋmaalo yeni,

¹⁹ a tubilenlena, a biana, leni ti kpalilibinkaadi,

²⁰ ti finfinjuadi leni li bonlakaala, ti gbanñagiditi, leni i ñoagi, leni a ñoagitila,

²¹ mi ñoagima leni yaa ñoagima n baa tieni i miani kani,

²² ti jaantiadi, leni ti kaabugiti, a caba leni a boaga,

²³ a liadiciama leni a bonbila, a cencenmaada leni yaa cabili n maandi li boacabili po.

²⁴ Li bonbedinla n baa ga a tulale kaanu, U baabu n baa ga ku gbanñagidigu kaanu, Li yuminminli n baa ga u pianŋamu kaanu, Li paboanli tiadi n baa ga li liadikpiagili kaanu, Yaala n tie u ŋamu yeni baa kpandi ki tua fe bebe.

Jelusalema kpepuona

²⁵ Jelusalema, ki jugisiega baa je a jaba, A jakoanda n kpe bu toabu nni.

²⁶ Siyono dogu buliñoana n mua Ki go yaa ye li paboanli nni.