Esayi 2 - Gourmanchéma Bible

¹ Amotisi bijua *Esayi n den baa yaa maama Li Miali Diedo kani Juda diema leni Jelusalema dogu po.

I nibuoli kuli taani ki kadi Jelusalema

² Mi juodima yogunu yaa pundi, Li Miali Diedo bili, Ke o diegu n ye yaa juali po Baa kpedi ki cie a joabila kuli, Baa a joaciama moko. I nilanbuoli kuli mo baa tigibi ki caa likani.

³ I nibuoli boncianla baa caa likani ki tua biyaba: «Cua mani tin do Li Miali Diedo juali yuli po, Wani Jakobo Tienu diegu kani, Ke wan bangi ti o sani, Ke tin yaa cuoni yini yaa niinni.» Kelima li tie Siyono po yo ke li *bali maama baa ña Li Miali Diedo maama baa ña Jelusalema.

⁴ O baa tua i nibuoli bujialo O baa tua nibuoli boncianla koanpaado Bi baa taa bi jugisiemu ki maa a cecela Bi baa taa bi kpaana mo ki maa ti moaciedi. Nibuoluba kan go fii ki tuogi uyu. Bi kan go bangi bu toabu n tiendi maama.

⁵ Yinba Jakobo buolu yaaba Fii mani tin cuoni Li Miali Diedo yenma nni.

Li Miali Diedo daali baa tua buudi daali

⁶ Li Miali Diedo, a ŋa a niba, Jakobo buolu yaaba Kelima puoli lingida gbie bi diema nni. Bi kua i ñoagi nni mo nani Filisiti yaaba, Ki taa ñoabu leni bi nilanba.

⁷ Bi diema gbie leni ŋanjilifa leni wula Bi ŋalimano mo ki pia bianu Bi diema gbie leni i taami, Bi toateliti mo ki pia bianu.

⁸ Bi diema gbie leni i *buli Bi yen gbaani bi nii n tagi yaala yaa nintuali ki pugi la.

⁹ Li tie lani yaa po ke bi nisaaliba godi ki buani. Bi baa le i fe Ŋan da tieni bipo sugili.

¹⁰ Wuoni mani ti joatanlondi nni. Kua mani ki tinga nni, Ki fidi ki sani ki foagidi leni Li Miali Diedo pabiencianli, Leni o kpiagiciandi yabinu.

¹¹ O kafaadaano baa tibini o yuli, Bi niba japaadi n baa u bianu. Li Miali Diedo bebe n baa baa ti jigidi laa daali.

¹² Li Miali Diedo U Paaciamu Kuli Daano bili laa daali Ki baa yie yaala n pia kafaama leni japaadi kuli po, Moko, yaala n fiini li yuli kuli ki baa goa jiidi po.

¹³ Libani diema sedili tiidi yi n foagi Ki go kpedi boncianla kuli po, Basana seni tiidi kuli po

¹⁴ Leni yaa joaciama n kpedi kuli po, Leni yaa joabila n kpedi kuli po,

¹⁵ Leni a toadiefoaga kuli po, Leni yaa bilini n kpedi ki pia u fidu kuli po,

¹⁶ Leni Talisisi ñinbiaciandi kuli po Leni yaa bonla n pia li yankuali kuli po,

¹⁷ O nisaalo kafaama, leni bi niba japaadi baa jiidi Li Miali Diedo bebe n baa baa ti jigidi laa daali.

¹⁸ I buli kuli baa bodi.

¹⁹ Yaa daali ke Li Miali Diedo baa fii ki jieni ki tinga, Bi niba baa sani ki wuoni ti joatanlondi nni Leni ki tinga buodi nni, Ki bua ki sani ki foagidi leni Li Miali Diedo pabienli, Leni o kpiagidi yabinu.

²⁰ Laa daali o nisaalo baa taa o buli Yi n tie ŋanjilifa leni wula ke o den tagi ki baa pugi yi yeni Ki lu a dapola leni ti janjandi po.

²¹ Ti joatanmabidi nni leni ti joaloandi nni N tie ban baa sani ki wuoni naankani Ki le bi yaa baa sani ki foagidi Leni Li Miali Diedo pabienli leni o kpiagidi yabinu, O yaa fii ki baa jieni ki tinga yaa yogunu.

²² Cedi mani ki da go dugi nisaalo po, Yua yaa miani n ki pia fuoma. Kelima o mayuli n tie lile?