Esayi 16 - Gourmanchéma Bible

¹ Soani mani mi diema daano po a pebila Ki ña Sela ki tagini mi fanpienma po Ki pundi hali Siyono bisalo juali po.

² Moabi puoba se Alinoni kpenu kane nani ban deli yaa nuanga yene. Bi nani ban pua ki fidi yaa nuantediga Ke mu nuanmu puagi yeni.

³ Moabi puoba tua Jelusalema yaaba: «Pa ti mani i tundi, baa mani tipo jagili Nani ku ñiagu yeni, Wuoni yaaba n sani ki cua a kani Nani ku sabigu yeni,

⁴ Jelusalema yaaba, cedi ti niba yaaba n sani Da daadi yaaba n cua ki wuoni, Ki cedi yaaba n cua ki wuoni yikani n yaa ye. Ku tugumoangu yaa gbeni yaa yogunu, Ke ki mabinga mo baa u bianu yaa yogunu Tua mani bipo wuonkaanu yua bolindi kani, Yua n mabindi yaa bodi mi diema nni yaa yogunu

⁵ Mi ŋanma n baa pugini ti gbandi paalu. Li bali paalu baa pugini kelima mi ŋanma yaa po. Yaa bujialo n lingi mi *teginma, Ki bua ki tieni yaala n dagidi, Baa kali ti gbandi po leni ku yantugupiengu Dafidi gbandieli nni.»

Jelusalema kan fidi ki tieni puu kuli Moabi po

⁶ Juda yaaba yedi: «Ti gbadi Moabi japaadi maama, Yaa japaadi n ki pia bianu, O jigidi leni o japaadi, O kafaama leni o yantiafana maama.

⁷ Lani n teni ke Moabi mua Moabi po, yua kuli wolini. Yi yenbidi Kili-Haleseti dogu n jugi maama po, Li coagi yi boncianla.

⁸ Hesiboni tikuani kuodi Ki taani leni i nibuoli yudanba N den ñu Sibima duven tiidi yi yaa daama ki gaadi yeni. Yi den pundi Yaeseli ki ban caa mi fanpienma po Ke i beni den ban yiini mi ñincianma po.

⁹ Lani n teni ke n baa mua Sibima duven tiidi po Nani Yaeseli n mua maama yeni. N baa mua yinba Hesiboni leni Eleale yaaba po, Kelima yi jetaagu yogunu yo, Ke bu toabu cua ki baa yi.

¹⁰ Li pamanli leni i yigini gbeni yi tikuani nni. I duven tiidi kuani nni yani ki go yiini, pamanli ki go ye. Yua n ŋanbidi a duven tiidi daama kan go tuodi duven daama ti datiadi nni. N teni ke i yigini cuo ki sedi.

¹¹ Lani n teni ke n yiini bu yanbu leni n pali kuli Moabi po Nani u kogidimuanu yeni. N ye leni li pabiidili Kili-Halesa po.

¹² Moabi cua yaa *padibinbinli n ye a juana po ki coagi. O cua wan gagidi yaa kaanu kani ki baa jaandi, Ama o kan ŋmani yanbu.

¹³ Lani n tie hali yogu Li Miali Diedo n den maadi Moabi po yaa maama.»

¹⁴ To moala Li Miali Diedo yedi yaa maama n tie na: «Ne leni bina taa nani yua gaani i ŋmaligi yaa bina yeni, Moabi kpiagidi baa tua faliga bonla. Baa ke ku niligu yaba boncianla, yaala n sieni kan go yaa moani, li kan go yaa pia fuoma.»