Esayi 12 - Gourmanchéma Bible

¹ Laa daali a baa yedi: «N pagi a yeli fini Li Miali Diedo Kelima a pali den beni npo, Ama a pali kuugi ke a baagi nni.

² N *faabima Tienu, n baa dugi apo, n kaa jie, Kelima Li Miali Diedo n tie n paalu leni n yanbu. O tua n faabima.»

³ Yi baa yaa kabidi mi ñima leni li pamanli mi faabima ñinbuna kani.

⁴ Laa daali yi baa yedi: «Pagi mani Li Miali Diedo, mia mani o todima. Teni mani bi niba n bandi o bancianma i nibuoli siiga, Kpaani mani ki waani bi niba o yeli n yaba maama.

⁵ Yiini mani Li Miali Diedo kpiagidi Kelima o tieni yaa bonla n ŋani ki pia mi ñuadima. Teni mani ki tinga n bandi laa bonla kuli.»

⁶ Kpaani ki doagidi a pamanli fini yua n ye Siyono nni, Kelima Isalele Tienu wani Yua n Gagidi ki ŋani yeni yaba boncianla. O ye o niba siiga mo.