Danieli 9 - Gourmanchéma Bible

¹ Medi buolu yua Asuelusi bijua Daliyusa n den diedi Babilona diema,

² o bali binkpiali binli, mini Danieli den cogi U Tienu maama tila. N den bandi ke Jelusalema baa yaa tie diegbena ki pundi hali bina piilele, nani Li Miali Diedo n den waani o sawalipualo Jelemi maama.

³ Lane n den loli bu ñoabu ki lani li paboanli tiadi, ki wuli n yuli po mi fantanpienma ki jigidi o nunga ki diidi o Diedo U Tienu ki jaandi ki miadi o todima.

⁴ N den mia Li Miali Diedo n Tienu ki tuo ti *tuonbiadi ki yedi o: «O Diedo, fini U Tienu yua n yaba ki pia li fangili, fini yua n kubi ŋan den kuani yaa *ŋantaado, ki tiendi o yaaba n kubi a ñoabonbilikaana po, ki ŋanbidi yaaba n bua ŋa po.

⁵ Ti tieni ti tuonbiadi, ti tudi apo, ti tieni yaala n bia ki yie a bali, ti lebidi ki ŋa a *balimaama leni a ñoabonbilikaana.

⁶ Tii den cengi a naacenba bi sawalipuaba, yaaba n den maadi leni ti badiba leni ti badijaba leni ti baanba leni ti diema yaaba kuli a yeli nni.

⁷ Fini o Diedo, a tiegi, tinba ti ye leni i fe dinla, tinba Juda yaaba leni Jelusalema dotieba leni Isalele yaaba kuli, yaaba n ye koanma koanma nni leni yaaba n ye foagima, ŋan den deli ki yadi yaaba mi diema nni kuli kelima tin den ŋa ŋa maama yaa po.

⁸ Li Miali Diedo, ti ye leni i fe, tinba leni ti badiba leni ti yudanba leni ti baanba, kelima ti tieni apo ti tuonbiadi.

⁹ Ama fini ti Diedo ti Tienu, a gba tipo mi niñima ki tieni tipo sugili baa ke ti yie a bali.

¹⁰ Tii cengi fini ti Diedo ti Tienu yedima ki tuo ki ŋoadi a naacenba bi sawalipuaba n den waani ti yaa balimaama.

¹¹ Isalele yaaba kuli miidi a balimaama ki lebidi ki ŋa, kaa cengi a yedima. Lani n teni ke yaa solindi leni yaa tundifala n diani a naacemo Musa balimaama tili nni baa tipo, kelima ti den tieni ti tuonbiadi fini U Tienu po.

¹² A tieni ti ŋan den yedi ke a baa tieni tinba leni yaa batieba n die ti kuli yaala. A luni ti o falabiado. Yaa fala n tieni Jelusalema nni buolu daa kpa tieni kaanuba ŋanduna nni.

¹³ Laa yebiadima ŋma ti nani lan diani Musa balimaama tili nni maama. Ama baa lankuli, tii mia ke fini Li Miali Diedo n je sugili, tii kuani ti yama ki faami a moamoani po.

¹⁴ Li tie lani yaa po ke a teni ke laa yebiadima ŋma ti kelima fini Li Miali Diedo ti Tienu tiegi ŋan tiendi yaala kuli nni, ama tii cengi a yedima.

¹⁵ O Diedo ti Tienu, ŋan den ñani tinba a nibuolu Ejipiti nni leni a nuu paalu, a den ñani a yeli ke li kpedi ki pundi hali dinla. Ama tinba, ti tieni ti tuonbiadi, ti tieni yaala n bia.

¹⁶ Ti Diedo, nani a niñingbadima n yaba maama yaa po, ŋan jiini a pali a dogu Jelusalema a joagagidikaali po, kelima ti tuonbiadi leni ti baanba yaa tudima po. Yaaba n lindi ti kuli fali ti ki yuandi Jelusalema leni a niba.

¹⁷ Moala ti Tienu ti Diedo, kelima a kpiagidi po, go mangi a nunga a *kaangagidiŋamu ban den bolini yu yeni po.

¹⁸ N Tienu, cengi, diidi ki le ti diegbena, diidi a dogagidiko. Tii cua a kani ki mia ŋa kelima ti *teginma po ka, ama kelima a niñingbadicianma po.

¹⁹ Ti Diedo, cengi ti! Ti Diedo pa ti sugili! Ti Diedo cengi ti bonŋanla! Kelima a kpiagidi po, n Tienu, jaligi ki tieni la kelima a dogagidiko leni a nibuolu yu n gagidi po.»

Maleki Gabiyeli bundi Danieli po Jelemi sawalo fuuli

²⁰ Danieli go den suagi ki yedi: «N den baa jaandi ki tuodi n tuonbiadi leni n nibuolu Isalele yaaba yaa tuonbiadi, ki miadi Li Miali Diedo n Tienu o joagagidikaali po.

²¹ Min den jaandi yeni yaa yogunu, Gabiyeli, min den kpa laa yua li bonlekaala nni yeni den yugi ki jaligi ki cua n kani ku yenjuogu padili yogunu.

²² O den maadi leni nni ki waani nni ki yedi: ‹Danieli, n cua ki baa doagidi apo sawali yeni fuule.

²³ Ŋan cili ki jaandi ki miadi U Tienu todima yaa yogunu, U Tienu ñoabonli ñani ke n cua ki baa waani a li, Kelima U Tienu bua ŋa. Moandi ki ga li ñoabonli yeni, Leni li bonlekaala mo n bua ki yedi yaala.

²⁴ Li bili bina lele taalima piilele a nibuolu leni a dogagidiko po. Laa yogunu bili ke mi yiema n gbeni, ke mi tudima n baa u bianu, ke ti tuonbiadi n baa sugili, ke yaa teginma n baa yaa ye hali yaa yogunu kuli n doagidi, ke li bonlekaala leni U Tienu sawalipuaba n den soagini yaala kuli n tieni, ke u *kaangagidiŋanmoanu mo n go gagidi.

²⁵ Lanwani ŋan bandi ki ga min baa yedi a yaala ne: A yaa cili ki coadi hali mi maama n ñani ki yedi ke Isalele yaaba baa goa ki kuni bi denpo, ke bi go baa goa ki maa Jelusalema, ki pundi hali o yudangagidika cuama, li baa yaa tie bina lele taalima lele. Bi go baa yaa maa Jelusalema ñiana ki go lindi yaala n baa yaa guu ŋa bu toabu po, lan pundi hali bina lele taalima piiluoba n milie. Ama li yogunu baa tie fala yogunu.

²⁶ Laa binleleeda taalima piiluoba n milie yeni yaa pendi, bi baa kpa o nigagidika ke oba kan ga o. Yaa bado n baa ti cua toagola baa bolini u dogu yeni leni U Tienu kaangagidiŋamu. O bado yeni bolinma baa cua nani yaa ñingola n koadi yeni. Li bili ke mi bolinma baa yaa tiendi hali bu toabu juodima.

²⁷ O bado yeni baa kuani leni yaa niba n yaba yaa ŋantaado n pa, ki dagidi leni ba a binleleedi-juodikaana nni. O baa yaa tendi ke U Tienu *padijuukaana leni o pienma pada n da go yaa padi hali ki pundi bina taa leni boagidima. Wani o bolinka yeni baa yaa tiendi yaa tuoncagindi n bia ki pendi hali yaa bolinma n bili n baa o yuli po.› »