Danieli 8 - Gourmanchéma Bible

¹ O bado Belisasa bali bintaali binli, mini Danieli go den laa li bonlekaala min den kpa laa yaala yaa puoli.

² Min den laa li bonlekaala yeni yaa yogunu, li den tie npo nani ke n ye Elami diema dociamu Suse nni yeni. N bonlekaala nni n den sua ke n ye Ulayi kpenu kunu.

³ Min den diidi yaa yogunu, n den laa ke li petonli se u kpenu boanjaali kani ki pia yinfoaga lie. Yaali n den yuandi ki pudi den foagi ki cie li lieli.

⁴ N den laa ke li petonli yeni to leni li yina ki tiegi nintuali leni nijienu leni niganu. Yangiba kuli mo kan den fidi ki tuogi leni li lan gedi kaanu, oba kuli kan den fidi ki ga wan paadi yaaba. Li den tiendi lin bua yaala kuli ke li paalu pugidi.

⁵ Min den kpaagi min nua yaala po yaa yogunu, li ŋuabuali den ñani nintuali po ki tiini ki gaandi ki tinga nni. Li den jaligi hali ke li taana ki siigi ki tinga. Li ŋuabuali yeni den pia li yincianli li nuni siiga.

⁶ Li den pundi min den laa yaa petonli ke li se li boanjaali kani ki pia yina lie yeni kani. Li den sani ki libi li leni li fidu kuli.

⁷ N den laa ke li pundi li petonli kani ki fiini li pali ki tuoni li ki kua li yinlieda yeni kuli ke li petonli yeni ki fidi ki tuogi leni li ke li gedi kaanu. Li den guli li petonli yeni ki ŋmaa li, oba kuli ki den fidi ki ga li li ŋuabuali yeni kani.

⁸ Li ŋuabuali yeni paalu den pugidi boncianla. Ama lin den pundi li paalu banlu, li yincianli den kua. Yinciama naa den pudi ki sedi li kaanu ki teli nintuali leni puoli, ganu leni jienu po.

⁹ A yinnaada yeni niinni, yintoali den pudi yaali n wa ki cie akuli yaa kani, ki pugini li paalu boncianla ki teli ganu po leni puoli po leni yaa diema n ŋani ki cie mi diema kuli yaa po.

¹⁰ Li yinli yaali n den pudi yeni den tuogi leni tanpoli yaaba ki teni ke bi siiga bi tianba leni a ŋmabila siiga a tiama baa tinga nni ke li ŋma bikuli.

¹¹ Li den tuogi leni tanpoli gola Yudaano ki teni ke baa go padi daali kuli pada opo. Li go den biidi o *kaangagidiŋamu.

¹² Bi den cedi ke li yinli yeni diedi li toagoli leni daali kuli padili kelima ti *tuonbiadi po. Li den luni mi jaanmoama tiipo. Lin den tieni yaala kuli den cuoni lipo bonŋanla.

¹³ N den gbadi ke maleki maadi. Malekitoa den buali o: ‹Li bonlekaala n waani ke yaala n baa tieni yeni baa waagi ki pundi u laa yogunu? Bi baa sieni daali kuli padili ki pundi hali u laa yogunu? Yaa bolinma n bolindi baa yaa ye hali u laa yogunu? Bi baa yaa ŋmaadi u kaangagidiŋamu leni tanpoli gola hali u laa yogunu?›

¹⁴ N den gbadi ke yaa maleki n den kpa maadi yeni goa ki yedi: ‹Li baa yaa tie yenjuodi leni tiŋaadi tudalie n kobitaa (2 300). Li yaa puoli bi go baa gagidi ki ŋanbi u kaangagidiŋamu.›

Maleki Gabiyeli bundi Danieli po o bonlekaala

¹⁵ Mini Danieli n den diidi li bonlekaala yeni ki bua ki bandi li bundima, yua n naani leni o nisaalo den cua ki sedi n nintuali.

¹⁶ N den gbadi u nialu ke u ñani Ulayi kpenu siiga nni ki kpaani ki yedi o: ‹Gabiyeli, bundi o ja ne po li bonlekaala yeni.›

¹⁷ Gabiyeli den nagini min se naankani. Wan den nagini yaa yogunu ti jawaandi den cuo nni ke n baa ki labini. O den yedi nni: ‹Danieli, a tie nisaalo, ama ŋan bandi ke yaa bonlekaala n tie ne waani mi juodima maama fuule.›

¹⁸ Wan den maadi leni nni yaa yogunu n de baa laabi ke ti jawaandi den pugini npo ke n pabi. O den sii nni ki fiini ki sieni nni.

¹⁹ O den yedi nni: ‹N baa waani a yaala n baa cua U Tienu pabienli juodima yogunu, kelima li bili o pabienli juodima n baa cua yaa yogunu no.

²⁰ Ŋan bi laa yaa petonli ke li pia yina lie yeni tie Medi yaaba diema leni Pelisa yaaba yaa diema.

²¹ Li ŋuabuali yeni tie Gileka yaaba yaa diema. Yaa yincianli n ye o nuni siiga yeni tie Gileka yaaba badikpialo.

²² Li yincianli yeni n den kua ke yaa yinnaada n pudi ki ga li kaanu yeni tie diema naa yaama n baa fii ki ga mi bonkpiama kaanu. Ama laa dienaadima kan yaa pa nani mani mi diekpiama n den pa maama.

²³ Mi dienaadima yeni paalu yaa tuoni mi bianu ke ti tuonbiadi danba yiema biagi ki pundi mi bianu, yaa bado yaa nunga n bia ki bani i janbi baa fii.

²⁴ O paalu baa yabidi, ama li kan yaa tie o yaa fidiceli po ka. O baa cuani yaa bolinma n pia ki lidiga. O bonla kuli baa yaa cuoni opo bonŋanla. O baa bolini bi paatietianba leni U Tienu nigagidiŋanba.

²⁵ Kelima o nunfanbiadibu po, o baa baa ki boandi nitoaba. Ti japaadi baa kua o niinni wan bolini bi niba boncianla yaaba n ye leni mi yanduanma. O baa fiini mi yiema bi badiba Bado po. Ama o baa bodi ke nisaalo nuu ki sii o.

²⁶ Ŋan dangi ki laa ke bi maadi yaa tiŋaadi leni yaa yenjuodi maama li bonlekaala nni yeni tie moamoani. Ama ŋan yaa kubi li bonlekaala yeni lan yaa tie ŋasiili, kelima li maadi yaa yogunu n ye hali liiga yaa po.

²⁷ Laa yogunu mini Danieli den tadigi ki yiagi danaba. Min den paagi, n den fii ki go tuuni o bado tuonli. Ama laa bonlekaala den wudi n gbanu, kelima mii den ga lan bua ki yedi yaala.› »